މި ސަރުކާރަށް ފުވައްމުލަކުގެ ރައްޔިތުން ތާއީދުކޮށް ގޮނޑިތައް ހޯދައިދިން މިންވަރާ ގާތަށް ވެސް ސަރުކާރުން އެ ސިޓީއަށް އަޅާނުލާ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކުރިއަށް އޮތް އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ފުވައްމުލަކަށް ވަޑައިގެން އެ ސިޓީގެ ދޫޑިގަން ޖަގަހައިގައި ވާހަކަ ދައްކަވަމުން ނަޝީދު ވިދާޅުވީ މި ސަރުކާރު ހޮވުމަށްފަހު ބޭއްވި ހުރިހާ އިންތިހާބެއްގައި ވެސް ފުވައްމުލަކުން ސަރުކާރަށް ފުރިހަމަ ތާއިދު ދެއްކި ކަމަށެވެ.
އެގޮތުން, 2019 ވަނަ އަހަރުގެ މަޖިލިސް އިންތިހާބުގައި އަދި ކައުންސިލް އިންތިހާބުގައި ފުވައްމުލަކު ހުރިހާ ގޮނޑިއެއް ސަރުކާރަށް ދީފައިވާ ކަމަށް ނަޝީދު ވިދާޅުވި އެވެ.
"އަޅުގަނޑަށް ކަންބޮޑުވުން އަންނަނީ، ތިބޭފުޅުން އެ ދިން މިންވަރާ ގާތަށްވެސް ސަރުކާރުން، މި ފުވައްމުލަކަށް ދީފައިނުވާތީ" ނަޝީދު ވިދާޅުވި އެވެ.
އަދި ފުވައްމުލަކުގެ ރައްޔިތުން މި ސަރުކާރަށް ކުރި އުންމީދު ހާސިލްވެފައިވޭތޯ ވަނީ ސުވާލުކުރައްވާފަ އެވެ.
ނަޝީދު އިތުރަށް ފާހަގަކުރެއްވީ ސަރުކާރުން ފުވައްމުލަކުގައިވެސް ކަންކަން ކޮށްފައިވީ ނަމަވެސް ފުވައްމުލަކުން ރައްޔިތުން އެންމެ ބޭނުންވާ ޓުއަރިސްޓު އެނދު އިތުރުކުރުމުގެ ހުވަފެނާއި، އެކަމަށް ސަރުކާރުން ވީ ވައުދު ފުއްދިފައިނުވާ ކަމެވެ.
ފުވައްމުލަކުގައި މިހާރު 200 ޓޫރިސްޓު އެނދު ހުރިއިރު، އެމަނިކުފާނުގެ އަމާޒަކީ އެ އަދަދު 1000 އަށް އިތުރުކުރުން ކަމަށް ނަޝީދު ވިދާޅުވި އެވެ.
"ތިޔަ ބޭފުޅުންނަށް ޑޮލަރު ލިބޭނޭ ގޮތް ހަދައިދިނުމަކީ އެމްޑީޕީގެ އަމާޒެއް،" ނަޝީދު ވިދާޅުވި އެވެ.
މި މަހުގެ 28 ގައި ބާއްވާ އެމްޑީޕީގެ ޕްރައިމަރީގައި ރައީސް ސޯލިހާއި ދެކޮޅަށް ނަޝީދު ނުކުންނަވާފައިވާއިރު، އެމަނިކުފާނު އަންނަނީ ރައީސް ސޯލިހުގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވަމުންނެވެ.
