އިންޑިއާއިން ކޮންޓްރޯލް ކުރާ ކަޝްމީރުގައި 24 ގަޑިއިރު ތެރޭގައި ފަސް މީހުން މަރާލުމުން ނުތަނަވަސްކަން ބޮޑުވެއްޖެ އެވެ.
އާދީއްތަ ދުވަހުގެ ހަވީރު ރަޖޫރީ ޑިސްޓްރިކްޓުގައި ހަތިޔާރު ހިފައިގެން އުޅުނު ބަޔަކު ތިން ގެޔަކަށް ބަޑި ޖެހުމުން ހަތަރު މީހުން މަރުވެ، ނުވަ މީހުންނަށް އަނިޔާވި އެވެ. އެއީ ހިންދޫ ބަޔެކެވެ.
ހޯމަ ދުވަހު، އަނެއްކާވެސް އެ ގެތައް ކައިރީގައި އެއްޗެއް ގޮވުމުގެ ސަބަބުން ކުއްޖަކު މަރުވެ، ހަތަރު މީހުންނަށް އަނިޔާވި އެވެ. އެއްޗެއް ގޮވަން މެދުވެރިވި ސަބަބު ސާފެއް ނޫނެވެ.
ފުލުހުން ދަނީ ދެ ހާދިސާ ވެސް ތަހުގީގު ކުރަމުންނެވެ. ރަޖޫރީ ޑިސްޓްރިކްޓުގައި އާއްމުން މުޒާހަރާ ކުރަން ފަށާފައިވާ އިރު، އެ މީހުން ބުނީ ސަލާމަތީ ކަންކަން ރަނގަޅަށް ނުބަލަހައްޓާ ކަމަށެވެ.
އެ ސަރަހައްދުގެ އިދާރީ ވެރިޔާ މަނޯޖް ސިންހާ ވަނީ ހަމަލާ ކުށްވެރި ކުރައްވައި، މަރުވި މީހުންގެ އާއިލާތަކަށް މާލީ އެހީތެރިކަން އިއުލާނު ކުރައްވައިފަ އެވެ.
ހިމަލަޔާ ފަރުބަދަތައް ކައިރީގައި އޮންނަ ކަޝްމީރަކީ އިންޑިއާ އާއި ޕާކިސްތާނުން ބޭނުންވާ ތަނެކެވެ. މިހާރު ކަޝްމީރު އޮންނަނީ ދެ ގައުމަށް ބައިކޮށްފަ އެވެ.
އިންޑިއާއިން ކޮންޓްރޯލް ކުރާ ކަޝްމީރުގައި ގްރޫޕްތަކުން އިންޑިއާއާ ދެކޮޅަށް މަސައްކަތް ކުރާތާ 30 އަހަރު ވެއްޖެ އެވެ. އިންޑިއާއިން ތުހުމަތު ކުރަނީ އެކަމުގެ ފަހަތުގައި އޮތީ ޕާކިސްތާން ކަމަށެވެ.
