އައްޑޫ ސިޓީ ހުޅުދޫގައި މިދިޔަ ހުކުރު ދުވަހު ހިނގި އަލިފާނުގެ ހާދިސާގެ ސަބަބުން އައްޑޫ މަގު ހެދުމުގެ މަޝްރޫއަށް އަސަރު ނުކުރާނެ ކަމަށް ޕްލޭނިން މިނިސްޓްރީން ބުނެފި އެވެ.
މިދިޔަ ހުކުރު ދުވަހުގެ ރޭ ހިނގި އަލިފާނުގެ ހާދިސާއެއްގައި ތާރު ކޮންޓެއިނަރުތަކެއްގައި ރޯވެ، ބައެއް ކޮންޓެއިނަރުތައް ވަރަށް ބޮޑަށް ހަލަކުވެފައި ވެއެވެ. އެ ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާއިރު، އަލިފާން ނިއްވާލެވުނީ ދޮޅު ގަޑިއިރެއްހާއިރު ފަހުންނެވެ.
މިކަމާ ގުޅިގެން ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު"އަށް މިއަދު ވިދާޅުވީ ރޯވި ތާރު ކޮންޓެއިނަރުތަކަކީ މިހާރު އައްޑޫގައި ކުރިއަށްދާ މަގު ހެދުމުގެ މަޝްރޫއާ ގުޅުންހުރި ތަކެތި ނޫން ކަމަށާއި، އެހެންކަމުން އެ ހާދިސާގެ ސަބަބުން މަގު ހެދުމުގެ މަޝްރޫއަށް އެއްވެސް އަސަރެއް ނުކުރާނެ ކަމަށެވެ.
"އެއީ މިހާރު ކުރިއަށްދާ ޕްރޮޖެކްޓާ ގުޅުން ހުރި އެއްޗެއް ނޫން،" އޭނާ ވިދާޅުވި އެވެ.
އަކްރަމް އިތުރަށް ވިދާޅުވީ އެ ތާރު ކޮންޓެއިނަރުތަކަކީ މީގެ އެތައް އަހަރެއް ކުރިން އެމްއާރްޑީސީން އައްޑުއަށް ގެންދިޔަ ތަކެތި ކަމަށާއި، އެއީ ބޭނުންނުކޮށް އުކާލާފައި ހުރި ތަކެތި ކަމަށެވެ. އަދި އަލިފާން ރޯވީ ވެމްކޯއާ ހަވާލުކޮށްގެން އެ ތަކެތި ނެގުމަށް ނިންމާފައި ވަނިކޮށް ކަމަށް ވެސް އޭނާ ވިދާޅުވި އެވެ.
އައްޑޫ މަގު ހެދުމުގެ މަޝްރޫއަކީ އިންޑިއާގެ އެފްކޮންސް ކުންފުންޏާ ހަވާލުކޮށްގެން ކުރަމުން އަންނަ މަސައްކަތެކެެވެ. ފެންހިންދާ ނިޒާމާއެކު 107 ކިލޯމީޓަރުގެ މަގު ހަދާ، ސީސީޓީވީ އަދި މަގު ބައްތި ހަރުކުރުމުގެ މަސައްކަތް ކުރަމުންދަނީ އިންޑިއާގެ އެގްޒިމް ބޭންކުން ހަމަޖައްސައިދީފައިވާ 800 މިލިއަން ޑޮލަރުގެ ކްރެޑިޓް ސްކީމުގެ ދަށުންނެވެ.
