އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ، އިބްރާހިމް މުހައްމަދު ސޯލިހާއި ވާދަ ކުރައްވައިގެން ނާކާމިޔާބެއް ނުވާނެ ކަމަށާއި ނަމަނަމައަކުން ރިހައެއް ނުކެއްކޭނެ ކަމަށް އެ ޕާޓީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ބޮޑުފެންވަޅު ގޭގައި މިރޭ ބޭއްވި ނޫސްވެރިންގެ ބައްދަލުވުމެއްގައި، ޕްރައިމަރީގައި ނާކާމިޔާބުވެއްޖެ ނަމަ ރައީސް ސޯލިހުގެ ފަހަތުގައި މަސައްކަތް ކުރައްވާނެތޯ "އަދަދު" ނޫހުން ސުވާލު ކުރުމުން ޖަވާބުގައި އެމަނިކުފާނު ވިދާޅުވީ ޕްރައިމަރީގައި ނާކާމިޔާބު ވާތަން އެއްވެސް ވަރަކަށް ފެނިވަޑައިނުގަންނަވާ ކަމަށާއި ނަމަނަމައަކުން ރިހައެއް ނުކެއްކޭނެ ކަމަށެވެ.
"ނާކާމިޔާބެއް ނުވާނެ، ނާކާމިޔާބެއް ނުވާނެ، އަޅުގަނޑު މި ދަންނަވަނީ އިރާދަކުރެއްވިއްޔާ ނާކާމިޔާބެއް ނުވާނެޔޭ،" ރައީސް ނަޝީދު ވިދާޅުވި އެވެ.
ދަފްތަރާ މެދު އޮތް ހިތްހަމަނުޖެހުން މިރޭވެސް ތަކުރާރު ކުރައްވައި އެމަނިކުފާނު ވިދާޅުވީ އެމްޑީޕީގެ ދަފްތަރުން އުނި ކުރި 39،000 މީހުންނަކީ ގާތްގަނޑަކަށް ރިޔާސީ އިންތިހާބުގައި 70 ވަރަކަށް ހާސް ވޯޓު ކަމަށާއި އެ ވޯޓުތައް ދެން ރައީސް ސޯލިހުއަށް ނުލިބޭނެ ކަމަށެވެ.
އޭގެއިތުރުން ޕާޓީން ވަކިކުރި މީހުންގެ ތެރޭގައި އެމްޑީޕީ އުފެދުމުގައި ވެސް ތިއްބެވި އެތައް ބަޔަކު ހިމެނޭ ކަމަށާއި އެމީހުން ގާތުގައި އަލުން އަނބުރާ ޕާޓީއަށް ވަންނާށޭ ބުނާނެ ގޮތެއް ވެސް ނޭނގޭ ކަމަށް އެމަނިކުފާނު ވިދާޅުވި އެވެ.
"މިސާލަކަށް ވަކިކޮށްފައި ތިބި މީހުންގެ ތެރެއިން ޑެއިޒީމާގެ އަހުމަދު އައްބާސް، ހާމިދު އަބްދުލް ޤަފޫރު، އަޅުގަނޑުމެން ގޭ ޑޮކްޓަރު ނާޝިދު، ޔާގޫތުގޭ ލައިލާ، އަޅުގަނޑަކަށް ނޭނގޭ މިމީސްމީހުން ކައިރީގައި ދެން، ނޫނެކޭ އަންނަންވީނުހެއްޔޭ [ބުނާނެ ގޮތެއް]،" ނަޝީދު ވިދާޅުވި އެވެ.
ނަޝީދު ވިދާޅުވީ މި އިންތިހާބު އެމަނިކުފާނު ކާމިޔާބު ކުރެއްވުން ނޫން އިތުރު އެއްވެސް ގޮތެއް ނެތް ކަމަށެވެ.
