އެއީ އެހެން ޕާޓީތަކުން އެމްޑީޕީގެ ތެރެއަށް ވަދެގަނެ އެމްޑީޕީގެ ލޯގޯ ބޭނުންކޮށްގެން އުޅޭ ބަޔެއްގެ ގޮތުގައި ރައީސް އިބްރާހީމް މުހައްމަދު ސޯލިހުގެ ފެކްޝަން، އެމްޑީޕީގެ ރައީސް މުހައްމަދު ނަޝީދު ސިފަކުރައްވައިފި އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ބޮޑުތިލަދުންމަތީގެ ރަށްރަށަށް ނަޝީދު ކުރައްވަމުން ގެންދަވާ ދަތުރުފުޅުގެ ތެރެއިން މިރޭ ހދ. ކުޅުދުއްފުށީގައި ބޭއްވި ޖަލްސާގައި އެމަނިކުފާނު ވިދާޅުވީ އެމްޑީޕީން އެތައް މެންބަރަކު ވަކިކޮށް، ރައީސް މަސައްކަތް ކުރައްވަނީ މުޅީން އެހެން ބަޔަކާއެކު ކަމަށެވެ.
"އަޅުގަނޑަށް ފެންނަމުން ދިޔައީ ރައީސް ސޯލިހާއި ޓީމު، މަސައްކަތް ކުރަމުން އައީ، އެމްޑީޕީގެ ދިދަ، އެމްޑީޕީގެ ކުލަ، އެމްޑީޕީގެ ލޯގޯ، އެމްޑީޕީގެ ލަވަ، އެމްޑީޕީގެ ވަސް، އެމްޑީޕީގެ ރަހަ، އެހެން ނަމަވެސް އެހެން ބަޔެއް އެ ކަން ކުރާ ގޮތަށް،" އެމްޑީޕީގެ ފުރަތަމަ ސަރުކާރުގެ ރައީސްކަން ކުރެއްވި ނަޝީދު ވިދާޅުވި އެވެ.
އެހެން ޕާޓީތަކުގެ މެންބަރުން އެމްޑީޕީއާ ގުޅެ އެމްޑީޕީ ބޮޑުވެގެން ދިޔުމަކީ އޭގެ ޒާތުގައި ރަނގަޅު ކަމަކަށް ވިޔަސް، އެ ކަން ކުރަންވާނީ ޕާޓީގެ ދުވަސްވީ ހިދުމަތްތެރި ސަޕޯޓަރުން އެއްކައިރި ކުރުމަށް ފަހު ނޫން ކަމަށް ނަޝީދު ވިދާޅުވި އެވެ.
"ޕާޓީން ކަނޑާލީ މި ޕާޓީ އުފެއްދުމުގެ ރަމްޒު، އެ މީހުން ވަކިކޮށްފައި [އެހެން ޕާޓީތަކުން އައި މީހުން] ޕާޓީ (އެމްޑީޕީ) ހޯދީ، އެ މީހުންގެ ބަދަލުގައި މިހާރު ފުރަތަމަ ބަރިން އަޅުގަނޑަށް ފެންނަނީ ޑީއާރުޕީ،" މަޖިލީހުގެ ރައީސްގެ މަގާމުގައި ވެސް ހުންނެވި ނަޝީދު ވިދާޅުވި އެވެ.
ނަޝީދު އިޝާރާތް ކުރެއްވީ ޑީއާރުޕީގައި އުޅުމަށް ފަހު އެމްޑީޕީއާ ގުޅިވަޑައިގެންނެވި އަހުމަދު ތަސްމީން އަލީ ދުވަސްތަކަށް ފަހު ސިޔާސީ ޕޯޑިއަމެއްގައި ރޭ ވާހަކަ ދެއްކެވުމުންނެވެ. ތަސްމީން ވާހަކަ ދެއްކެވީ ރައީސް ސޯލިހުގެ ކެމްޕޭން ޖަލްސާއެއްގަ އެވެ.
ތަސްމީންގެ އިތުރުން، ޔޫތު މިނިސްޓަރު އަހުމަދު މަހުލޫފާއި ފޮރިން މިނިސްޓަރު އަބްދުﷲ ޝާހިދުގެ އިތުރުން އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި ކިނބިދޫ ދާއިރާގެ މެންބަރު މުހައްމަދު ނާޝިޒަކީ ވެސް ކުރިން ޑީއާރުޕީގައި އުޅުއްވި ބޭފުޅުންނެވެ. އަދި ނަޝީދުގެ ފެކްޝަންގައި މަސައްކަތް ކުރައްވާ، މެދު ހެންވޭރު ދާއިރާގެ މެންބަރު އަލީ އާޒިމަކީ ވެސް ކުރިން ޑީއާރުޕީގައި އުޅުއްވި ބޭފުޅެކެވެ.
ރައީސް ސޯލިހުގެ ބައެއް ސިޔާސަތުތަކަށް ނަޝީދު މިރޭ ވެސް ފާޑުވިދާޅުވި އެވެ. އޭގެ ތެރެއިން ހައުސިން ޔުނިޓްތަކުގެ ކުލި ކައުންސިލަށް ލިބުމުގެ ބަދަލުގައި އެޗްޑީސީއަށް ލިބޭ އެ ސިޔާސަތަށް ނަޝީދު ވަނީ ވަރަށް ބޮޑަށް ފާޑުވިދާޅުވެފަ އެވެ.
އޭގެ އިތުރަށް ކޮންމެ ރަށެއް ވެސް ތަފާތު ނުކުރުމުގެ ވިސްނުމުގައި ހުރެގެން ސަރުކާރުން ހަރަދުކުރަމުން ދާތީ، ބޮޑު އާބާދީގެ ރަށްރަށަށް ދެވޭ އަހަންމިއްޔަތުކަމާއި އިގުތިސޯދީ ބޮޑެތި ހަރަކާތްތަކަށް އިންވެސްޓް ނުކުރެވޭތީ އެ ސިޔާސަތަށް ނަޝީދު މިރޭ ވެސް ވަރަށް ބޮޑަށް ފާޑުވިދާޅުވެ ވާހަކަ ދެއްކެވި އެވެ.
