މިހާރު ކުރިއަށްދާ 60 ވަނަ ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސް ފައިނަލުން ފާތިމަތު ދީމާ އަލީ އާއި އައިޝަތު ރަފާ ނާޒިމް ޖާގަ ހޯދައިފި އެވެ.
މާލޭ ޓޭބަލް ޓެނިސް ހޯލުގައި ކުރިއަށްދާ މުބާރާތުގައި ބާކީ އޮތީ ޓީމު އިވެންޓްގެ ދެ ފައިނަލާއި، ފުރަތަމަ ޑިވިޝަންގެ ސިންގަލްސް ދެ ފައިނަލެވެ. ޓީމު އިވެންޓް ފައިނަލްތައް މިއަދު ހަވީރު ކުޅޭއިރު، ސިންގަލްސް ދެ ފައިނަލާއި މުބާރާތުގެ އިނާމް ދިނުމުގެ ރަސްމިއްޔާތު އޮންނާނީ މިރޭ އެވެ.
އަންހެން ސިންގަލްސް ފައިނަލުން ދީމާ ޖާގަ ހޯދީ ފާތިމަތު ޖުމާނާ ނިމާލް އަތުން ސީދާ ހަތަރު ސެޓުން މޮޅުވެގެންނެވެ. ރަފާ ފައިނަލުން ޖާގަ ހޯދީ ޝިއުރާ އަތުން ހަތަރު ސެޓުން މޮޅުވެގެންނެވެ.
ގައުމީ މުބާރާތުގެ މިދިޔަ ދެ އަހަރުގެ ފައިނަލްގައި ވެސް ވާދަކުރީ ރަފާ އާއި ދީމާ އެވެ. ދެ ފަހަރު ވެސް ރަފާ ބަލިކޮށް ދީމާ ވަނީ ގައުމީ ތަށި ހޯދައިފަ އެވެ. ރަފާ ވެސް ވަނީ ގައުމީ ތަށި ދެ ފަހަރު ހޯދައިފަ އެވެ. މިއީ ދެ ކުޅުންތެރިން ވެސް ގައުމީ ތަށި ތިން ވަނަ ފަހަރަށް ހޯދަން ލިބޭ ފުރުސަތެކެވެ.
މުބާރާތުގެ ފިރިހެން ސިންގަލްސް ފައިނަލުގައި ވާދަކުރާނީ މޫސާ މުންސިފް އަހުމަދާއި ޝައްފާން އިސްމާއިލް އެވެ. މި ދެ ކުޅުންތެރިންގެ ތެރެއިން ޝައްފާން ގައުމީ ފައިނަލުގައި މީގެ ކުރިން ދެ ފަހަރު ވާދަކޮށްފައިވީ ނަމަވެސް ތަށި ލިބޭ ގޮތެއް ނުވެ އެވެ. ދެ ފަހަރުވެސް ބަލިވީ މުންސިފް އަތުންނެވެ. މުންސިފް ވަނީ ގައުމީ ތަށި ރެކޯޑު އަދަދެއް ކަމަށްވާ 11 ފަހަރު ހޯދައިފަ އެވެ. އޭނާ އަކީ ރާއްޖޭގެ އެންމެ ކާމިޔާބު ފިރިހެން ޓީޓީ ކުޅުންތެރިޔާ އެވެ.
ގައުމީ މުބާރާތުގެ ޓީމް އިވެންޓުގެ އަންހެން ބައިގެ ފައިނަލުގައި ވާދަކުރާނީ އިހާ ޓޭބަލް ޓެނިސް އެކަޑެމީ އާއި ކަސްޓަމްސް ރެކްރިއޭޝަން ކުލަބެވެ. އިހާ ޓީމްގައި ހިމެނެނީ ރަފާ އާއި މިޝްކާ މުހައްމަދު އިބްރާހިމް އަދި މިންހާ މަހުޖޫބު ސުޖާއު އެވެ. ކަސްޓަމް ޓީމުގައި ހިމެނެނީ ދީމާ އާއި ޒާރާ ހަސަން ލަތީފް އަދި ތައިލެންޑުގެ ކުޅުންތެރިއެއް ކަމަށްވާ ވަރިކާން އެވެ.
ފިރިހެން ޓީމު އިވެންޓުގެ ފައިނަލުގައި ވާދަކުރާނީ އިހާ އެކަޑެމީ އާއި ކީންސް ސްޕޯޓްސް ކުލަބެވެ. އިހާގެ ފިރިހެން ޓީމްގައި ހިމެނެނީ ޝައްފާން، މިފްޒާލް އަހުމަދު، ޒީކް ހަސަން ލަތީފް އަދި އިބްރާހިމް ލަތީފް އެވެ. ކީންސް ޓީމްގައި ހިމެނެނީ އަޙްޔަރު އަހުމަދު ހާލިދު، މުހައްމަދު ތާބިން ސުޖާއު، އިންޑިއާ ކުޅުންތެރިއެއްކަމަށްވާ އަބޫ ރިޒްވާން އަދި އިބްރާހިމް އައުޒަމް އަޒީމް އެވެ.
ގައުމީ މުބާރާތުގައި މިއަހަރު 13 އަހަރުން ދަށް، 17 އަހަރުން ދަށް އަދި ފުރަތަމަ ޑިވިޝަންގެ މެޗުތައް ކުރިއަށްދާއިރު، ޖުމްލަ 65 ކުޅުންތެރިއަކު އަންނަނީ ވާދަކުރަމުންނެވެ.
