ތިމާވެއްޓާ ބެހޭ މިނިސްޓްރީން ހުއްދަ ދޭ ހާލަތްތަކުގައި ރާއްޖެއަށް ކުނި އެތެރެކުރެވޭ ގޮތަށް ގާނޫނުގައި ހިމެނުމާއި ސަރުކާރުން މިހާރު ފަށާފައިވާ 'ވޭސްޓް ޓު އެނާޖީ' ޕްރޮޖެކްޓާ އެއްވެސް ގުޅުމެއް ނެތް ކަމަށް މިނިސްޓްރީން ބުނެފި އެވެ.
ކުނި މެނޭޖުކުރުމުގެ އަސާސްތަކާއި ޒިންމާތަކާއި ފީނެގުމާއި ކުންޏާ ގުޅޭ ކުށްތަކާއި ޖޫރިމަނާ ބަޔާންކޮށްފައިވާ އެ ގާނޫނަށް ރައްޔިތުންގެ މަޖިލީހުން ގެނައި ބަދަލުތަކުގެ ތެރޭގައި ގާނޫނުގެ ދަށުން ހަދާ ގަވާއިދުގައިވާ ގޮތުގެ މަތިން ރާއްޖެ އަށް ކުނި އެތެރެކުރެވިދާނެ ކަމަށް ލިޔުނެވެ.
އެ މާއްދާ އާ ގުޅިގެން ގިނަ ބައެއްގެ ކަންބޮޑުވުންތައް ހުރި ނަމަވެސް ރައީސް އިބްރާހިމް މުހައްމަދު ސޯލިހު ވަނީ ބިލު ތަސްދީގު ކުރައްވާފަ އެވެ.
އެ ގާނޫނުގެ 44 ވަނަ މާއްދާގައި ބުނެފައިވަނީ މިނިސްޓްރީގެ ހުއްދަ ލިބިގެން މެނުވީ އެއްވެސް ފަރާތަކުން އެއްވެސް ބާވަތެއްގެ ކުންޏެއް ރާއްޖެ އެތެރެކޮށްގެން ނުވާނެ ކަމަށެވެ. ކުނި އެތެރެކުރުމުގެ ހުއްދައަށް އެދުމުން އެފަދަ ހުއްދައެއް ދޭންވާނީ މިނިސްޓްރީން ހަދާފައިވާ ގަވާއިދާ އެއްގޮތަށް ކަމަށް އެ މާއްދާގައި ބަޔާންކޮށްފައިވެ އެވެ.
ރައްޔިތުންގެ މަޖިލީހަށް ބިލު ހުށަހެޅިއިރު އޮތީ ރާއްޖެއަށް އެއްވެސް ބާވަތެއްގެ ކުނި އެތެރެނުކުރެވޭ ގޮތަށް ހިމަނާފަ އެވެ. މިއީ ޒީރޯ ވޭސްޓު މޯލްޑިވްސް ޖަމިއްޔާގެ ލަފާގެ މަތިން ބިލުގައި ހިމެނި މާއްދާއެކެވެ.
އެ މާއްދާއާ ގުޅިގެން ޒީރޯ ވޭސްޓް މޯލްޑިވްސް އާއި ސޭވް މޯލްޑިވްސް ކެމްޕެއިނުގެ އިތުރުން ޓްރާންސްޕޭރެންސީ މޯލްޑިވްސް ހިމެނޭހެން 17 ޖަމިއްޔާއަކުން ގުޅިގެން ނެރުނު ނޫސްބަޔާނެއްގައި ވަނީ ކުނި އެތެރެ ކުރަން ހުއްދަ ދިނުމާއި ސަރުކާރުން މިހާރު ފަށާފައިވާ 'ވޭސްޓު ޓު އެނާޖީ' ޕްރޮގްރާމަކީ ޓެކްނިކަލް ގޮތުން ވެސް އަދި މާލީ ގޮތުން ވެސް ރާއްޖެއަށް ބޮޑު ބުރައެއް އުފުލަން ޖެހޭނެ މަޝްރޫއެއްކަން ފާހަގަކޮށްފަ އެވެ.
އޭގެ އިތުރުން، އެ ޕްރޮޖެކްޓުގެ ސަބަބުން ރާއްޖެއިން ބޭރުގެ އިންސިނެރޭޓަރު އޮޕަރޭޓަކޮށް ރާއްޖެއަށް ކުނި އެތެރެކުރުމަށް ލޫޕްހޯލްތަކެއް ލިބިދާނެ ކަމަށް ފާހަގަކޮށްފައިވެ އެވެ.
އެކަމާ ގުޅިގެން ތިމާވެއްޓާ ބެހޭ މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި "އަދަދު" އިން ސުވާލުކުރުމުން އެ މިނިސްޓްރީގެ ޑިރެކްޓަރު ޖެނެރަލް އަހުމަދު މުރުތަޒާ ވިދާޅުވީ މިއީ ރާއްޖޭގައި ހިންގާ އެއްވެސް ކުނި މެނޭޖުކުރުމުގެ ހަރަކާތަކާ ގުޅިގެން ގާނޫނަށް ގެނައި އިސްލާހެއް ނޫން ކަމަށެވެ.
"ވޭސްޓު އެނާޖީ ޓެކްނޮލޮޖީއަކަށް މުހިންމެއް ނޫން ރާއްޖެއަށް ކުނި އެތެރެކޮށްގެން އެ ޓެކްނޮލޮޖީ ހިންގާކަށް. ސަބަބަކީ މިހާރު ރާއްޖޭގައި ކުނި އުފައްދާ މިންވަރަށް ބަލާއިރު ކުރިއަށް އޮތް ތަނުގައި އަޅުގަނޑުމެންނަށް އެފޯޑެއް ނުކުރެވޭނެ ރާއްޖެއަށް އިތުރަށް ކުނި އެތެރެ ކުރާ ކަމަށް ވަންޏާ،" މުރުތަޒާ ވިދާޅުވި އެވެ.
އެހެންކަމުން ކުނި މެނޭޖުކުރުމުގެ މަޝްރޫއުތައް ވެސް އަމާޒުކޮށްފައި ހުރީ ކުނި އެތެރެކޮށްގެން ހިންގުމަށް ނޫން ކަމަށާއި އެ ޓެކްނޮލޮޖީ އަށް ކުނި މެނޭޖުކުރަން ނިންމާފައިވަނީ ދިރާސާތަކަކަށް ފަހުގައި ކަމަށް ވިދާޅުވި އެވެ.
"ސިއްހަތަށް ވެސް އަދި ތިމާވެއްޓަށް ވެސް ގެއްލުން ނުވާ ކަހަލަ ގޮތަކަށް ބައްޓަންކޮށް، ޑިޒައިން ކޮށްގެން އިންސްޓޯލް ކުރެވޭ ގޮތަށް ޑިޒައިން ކޮށްފައިވާނީ،" މުރުތަޒާ ވިދާޅުވި އެވެ.
ކުނި މެނޭޖުކުރުމުގެ ބިލު މަޖިލީހަށް ހުށަހެޅިއިރު އޮތީ ކުނި އެތެރެކުރުން މަނާ ވާނެ ކަމަށް ބަޔާންކޮށްފަ އެވެ. ބިލަށް ބަދަލު ގެނައީ ކޮމިޓީ މަރުހަލާގަ އެވެ. އެ ބަދަލާ ގުޅިގެން ކޮމިޓީ ރިޕޯޓުގައިވާ ފާހަގަކޮށްފައިވާ ގޮތުގައި ދުނިޔޭގައި ގިނަ ގައުމުތަކަށް ކުންޏަކީ މިހާރު ވެސް ބޭނުންތެރި އެއްޗަކަށް ވެފައި، އޭގެއިން ހަކަތަ އުފެއްދޭނެކަން ވެސް ސާބިތުވާތީ އެވެ.
ރާއްޖެއިން ވެސް އެކަމަށް ޕްލޭންތަކެއް ގެންގުޅޭއިރު، ރާއްޖެއިން އެފަދަ ބޭނުމަކަށް ބޭނުންވާ ކުނި ލިބުން ދަތިވެއްޖެ ހާލަތެއްގައި އެ ހުއްދަ އޮތުން މުހިންމު ކަމަށް ކޮމިޓީން ދެކޭ ކަމަށް މަޖިލީހުން ބުނެފައިވެ އެވެ.
"ވޭސްޓު ޓު އެނާޖީ" މަޝްރޫއު ހިންގަމުން އަންނަ ޔޫރަޕުގެ ބައެއް ގައުމުތަކުގައި ވެސް ކުނި އަންދާ އިންސިނިރޭޓަރުތަކަށް ނުތަކާ ވަރު [އިންސިނިރޭޝަން އޯވާކެޕޭސިޓީ] ވުމުގެ ސަބަބުން އެހެން ގައުމުތަކުން ކުނި އެތެރެކުރަން ޖެހިފައިވެ އެވެ.
