ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރު އަލީ ހާލިދުގެ ދައުރު ހަމަވުމުން އޭނާގެ އެ މަގާމަށް އަލުން އައްޔަން ނުކުރުމަށް ސަރުކާރުން ނިންމައިފި އެވެ.
އަލީ ހާލިދުގެ ދައުރު ހަމަވީ މިދިޔަ ހޮނިހިރު ދުވަހެވެ. މެނޭޖިން ޑިރެކްޓަރުކަމުގެ މަގާމުން އޭނާ ވަކިވެފައިވާކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އިއްޔެ އަންގައިފަ އެވެ.
"މެނޭޖިން ޑިރެކްޓަރު އަލީ ހާލިދުގެ މަގާމުގެ މުއްދަތު ޑިސެމްބަރު 24، 2022 އަށް ހަމަވެފައިވާތީ އާއި ޑެޕިއުޓީ މެނޭޖިން ޑިރެކްޓަރު މުހައްމަދު ޝަމީމުގެ މަގާމުގެ މުއްދަތު ޑިސެމްބަރު 26، 2022 އަށް ހަމަވާނެތީ އެ ތާރީހުން ފެށިގެން އެ ދެ ބޭފުޅުން މަގާމުން ވަކިވާނެކަމުގައި ދަންނަވަން،" ޕީސީބިން އިއްޔެ ޕީއެސްއެމަށް ފޮނުވި ސިޓީއެއްގައި ބުނެފައިވެ އެވެ.
ހާލިދުގެ އިތުރުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު މުހައްމަދު ޝަމީމުގެ ދައުރު އިތުރު ނުކުރުމަށް ވެސް ޕީސީބީން ވަނީ ނިންމައިފަ އެވެ. އޭނާގެ ދައުރު ހަމަވަނީ މިއަދަށެވެ.
އެ މަގާމުތަކަށް މީހުން އައްޔަން ކުރެވެންދެން ޕީއެސްއެމް ހިންގުމުގެ ޒިންމާ ހަވާލުކޮށްފައި ވަނީ ކުންފުނީގެ ޕްރޮކިއުމަންޓް ޑިރެކްޓަރު މުހައްމަދު ސައީދުއާ އެވެ. ހިންގުމަށް ހަވާލުވެ ހުންނެވި ނަމަވެސް, ބޯޑުގެ ބައްދަލުވުންތަކުގައި ސައީދަށް ބައިވެރިނުވެވޭނެ ކަމަށް ޕީސީބީން ބުނެފައިވެ އެވެ.
މެނޭޖިން ޑިރެކްޓަރުގެ މަގާމަށް މީހަކު އައްޔަން ކުރެވެންދެން މާލީ ބޮޑު މުއާމަލާތެއް ނުކުރުމަށާއި ސިޔާސަތާ ގުޅޭ ނިންމުމެއް ނުނިންމުމަށް ވެސް ޕީސީބިން އޮތީ ޕީއެސްއެމަށް އަންގައިފަ އެވެ.
"ކުންފުނީގެ މެނޭޖިން ޑިރެކްޓަރުގެ މަގާމަށް ބޭފުޅަކު އައްޔަން ކުރެވެންދެން ކުންފުނި ދުވަހުން ދުވަހަށް ހިންގުމުގެ ގޮތުން ނިންމަންޖެހޭ ނިންމުންތައް ފިޔަވައި، ކުންފުނީގެ ސިޔާސަތާ ގުޅޭ ނުވަތަ ކުންފުނީގެ ނިސްބަތުން ބޮޑު މާލީ ނުވަތަ ވިޔަފާރިއާ ގުޅޭ އެއްވެސް ނިންމުމެއް ނުވަތަ ކަމެއް ނުކުރުމަށް ދަންނަވަން،" ޕީސީބީން ބުނެފައިވެ އެވެ.
