ރޯޑް ޑިވެލޮޕްމެންޓް ކޯޕަރޭޝަނަކީ މުވައްޒަފުންނާމެދު ވަރަށް ރަނގަޅަށް ކަންތައް ކުރާ ކުންފުންޏެއް ކަމަށާއި، ހާއްސަކޮށް އަންހެނުންނަށް ފުޅާ ދާއިރާއެއްގައި އެކި ރޮނގުތަކުން މަސައްކަތްކުރުމަށް މަގުފަހިކޮށްދީފައިވާ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ބައެއް ރަށްރަށުގައި އާރުޑީސީން ހިންގާ މަގުހެދުމުގެ މަޝްރޫއުތަކުގައި އަންހެނުންނަށް އެކި ވަޒީފާތައް ދީފައިވެ އެވެ.
އާރުޑީސީއަށް ތިން އަހަރު ފުރުން ފާހަގަކުރުމަށް ސޯޝަލް ސެންޓަރުގައި ރޭ ބޭއްވި ޖަލުސާގައި ނައިބު ރައީސް ވިދާޅުވީ އާރުޑީސީ އާއި ސަރުކާރުގެ ކުންފުނިތަކާއި އަދި އަމިއްލަ ބައެއް ކުންފުނިތަކުން މި ސަރުކާރުގެ ސިޔާސަތުތަކާއި އެއްގޮތަށް ތަރައްގީގެ މަޝްރޫއުތައް ހިންގުމަށް މަސައްކަތްކުރާ ކަމަށެވެ. އެކަމަށްޓަކައި އެ މަނިކުފާނު ޝުކުރު އަދާކުރެއްވެވި އެވެ.
ނައިބު ރައީސް ފައިސަލް ނަސީމް އާއި އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު ވާހަކަ ދައްކަވަނީ. -- ފޮޓޯ: މުހައްމަދު ޝާބިން/ އަދަދު
އާރްޑީސީއަކީ ސަރުކާރުގެ ސިޔާސަތަށް ވާސިލްވުމަށް ގިނަ މަސައްކަތްތަކެއް ކުރާ ކުންފުންޏެއް ކަމަށާއި، އެކުންފުނިން ގިނަ ރަށްތަކެއްގެ މަގުހެދުމުގެ މަސައްކަތްތައް ހިންގަމުން އަންނައިރު، މާލޭގެ އަމީނީމަގު ހެދުމުގެ މަސައްކަތް ވެސް ކުރަނީ އެ ކުންފުނިންނެވެ.
"އާރްޑީސީއަކީ މަސައްކަތަކަށް ދެންނެވުމުން، އިތުރަށް ހަނދާންކޮށްދޭން ނުޖެހި އެ މަސައްކަތެއް އަވަހަށް ނިންމާ ކުންފުންޏެއް. ކުންފުނީގެ ކުރު މާޒީގައި ކުރެވުނު މަސައްކަތެއް މަދެއް ނޫން." ނައިބު ރައީސް ވިދާޅުވި އެވެ.
ވޭތުވެދިޔަ ތިން އަހަރު ދުވަހުގެ ތެރޭގައި އާރުޑީސީން 34 މަޝްރޫއު ހިންގާފައިވެ އެވެ. މިހާރު ވެސް 24 މަޝްރޫއު ހިންގާއިރު، މި އަހަރު 11 މަޝްރޫއެއް ފެށިފައިވާ ކަމަށެވެ.
އާރުޑީސީގެ މެނޭޖިން ޑިރެކްޓަރު މޫސާ އަލި މަނިކު ވިދާޅުވީ ރަށްރަށުގައި މަޝްރޫއު ހިންގާއިރު އެ ކުންފުނީގެ ސިޔާސަތަކީ އެ ސަރަހައްދެއް ނުވަތަ ރަށެއްގެ ބަޔަކަށް ފުރުސަތު ދިނުން ކަމަށެވެ.
ރޭގެ ޖަލްސާގައި އާރޫޑީސީގެ އެކި ދާއިރާތަކުން ފާހަގަކޮށްލެވޭ މުވައްޒަފުންނަށް ވަނީ ހަނދާނީ ފިލާ ދީފައި. -- މުހައްމަދު ޝާބިން/ އަދަދު
"އެއީ އާއިލާއާ ގާތުގައި ތިބެ މަސައްކަތްކޮށް ފަހުރުވެރި އާއިލާއެއް ބިނާކުރުމަށް ހުޅުވޭ ދޮރެއް،" އޭނާ ވިދާޅުވި އެވެ.
އަންހެނުންނަށް ހުޅުވާލާފައިވާ ފުރުސަތުތަކުގެ އިތުރުން، އެކިއެކި ޒުވާނުންނަށް ދެ ވަނަ ފުރުސަތެއްގެ ގޮތުގައި ހަޔާތް ބަދަލުކޮށްލަން އެ ކުންފުނިން ފުރުސަތު ދޭކަމަށް ވެސް މޫސާ އަލިމަނިކު ވިދާޅުވި އެވެ.
