މިދިޔަ ހުކުރު ދުވަހު ކުރުދީންނަށް އަމާޒުކޮށް ދިން ހަމަލާއަށް ފަހު ފްރާންސްގެ ވެރިރަށް ޕެރިހުގެ މެދުތެރޭގެ ހިސާބުގަނޑެއްގައި ހަމަނުޖެހުން ބޮޑުވެއްޖެ އެވެ.
މުޒާހަރާތައް ހަމަނުޖެހުމަށް ބަދަލުވެ، ކާރުތައް އެފުށްމިފުށަށް ޖަހައި، ހުޅު ޖަހައި، ފުލުހުންނާ ދިމާލަށް އެއްޗެހި އުކުން ފަދަ އަމަލުތައް ހިންގި އެވެ. ރައްދުގައި ފުލުހުން ކަރުނަ ގޭސް ބޭނުންކުރި އެވެ.
ކުރުދީންގެ ސަގާފީ މަރުކަޒަކާއި ރެސްޓޯރެންޓަކަށް ހުކުރު ދުވަހު ދިން ހަމަލާގައި ތިން މީހުން މަރުވެ، ތިން މީހުންނަށް އަނިޔާވި އެވެ.
ހަމަލާގެ ތުހުމަތަށް ހައްޔަރު ކުރި އުމުރުން 69 އަހަރުގެ ފިރިހެން މީހަކު ފުލުހުންނަށް ބުނީ އޭނާ ހަމަލާ ދިނީ ނަސްލީ ތަފާތުކުރުމާ ގުޅުން ހުރި ވިސްނުމުގެ ސަބަބުން ކަމަށެވެ.
ހުކުރު ދުވަހު ހަމަލާއަށް ފަހު ވެސް އެ ސަރަހައްދުގައި ހަމަނުޖެހުން ހިނގި އެވެ. އޭގެ ފަހުން ހޮނިހިރު ދުވަހު ސުލްހަވެރި އެއްވުމެއް ބޭއްވި އެވެ. އެކަމަކު އަނެއްކާ ވެސް ހަމަނުޖެހުން އުފެދުނެވެ.
ކުރުދީން ގޮވަމުން ދަނީ ފްރާންސްގައި އެ މީހުންގެ މުޖުތަމައަށް އިތުރު ރައްކާތެރިކަން ދިނުމަށެވެ. ކުރުދީ ލީޑަރުން ހޮނިހިރު ދުވަހު ޕެރިހުގެ ފުލުހުންގެ ވެރިޔާއާ ވެސް ބައްދަލުކުރި އެވެ.
މީގެ 10 އަހަަރު ކުރިން ވެސް ޕެރިހުގައި ކުރުދީ ދަރިކޮޅަށް ނިސްބަތްވާ ތިން އަންހެން އެކްޓިވިސްޓުން މަރާލި އެވެ. އެ މަރުތަކުގެ ހަގީގަތް މިއަދާ ހަމައަށް ހޯދިފައެއް ނުވެ އެވެ.
