ފްރާންސްގެ ވެރިރަށް ޕެރިހުގެ މެދުތެރޭގެ ހިސާބުގަނޑެއްގައި ބަޑި ޖަހައި ތިން މީހުން މަރުވެ އިތުރު ތިން މީހުންނަށް އަނިޔާވެއްޖެ އެވެ.
ހަމަލާ އަމާޒު ކުރީ ކުރުދީންގެ ސަގާފީ މަރުކަޒަކަށެވެ. މިއީ ނަސްލީ ތަފާތުކުރުމާ ގުޅުން ހުރި މައްސަލައެއްތޯ ފުލުހުން ބަލާނެ އެވެ.
ހަމަލާގެ ތުހުމަތަށް ހައްޔަރު ކުރީ އުމުރުން 69 އަހަރުގެ މީހެކެވެ. ރިޕޯޓުތައް ބުނާ ގޮތުން އެއީ ދާދި ފަހުން ޖަލުން މިނިވަން ކުރި މީހެކެވެ.
ޕެރިހުގެ 10 ވަނަ ޑިސްޓްރިކްޓުގައި އޮންނަ ސްޓްރެސްބޯގް-ސެއިންޓް ޑެނިސް ސަރަހައްދަށް އާއްމުން ނުދިޔުމަށް އިދާރާތަކުން ހުކުރު ދުވަހު ބާރުއެޅި އެވެ.
ހަމަލާ އަމާޒު ކުރި މަރުކަޒު ހިންގަނީ ކާޑިޝް ޑިމޮކްރެޓިކް ކައުންސިލް އިން ފްރާންސް (ސީޑީއެފް-ކޭ) އިންނެވެ. އެ ޖަމިއްޔާއިން ނެރުނު ބަޔާނެއްގަައި ހަމަލާ ކުށްވެރިކުރި އެވެ.
ހަމަލާ ދިން ސަބަބު ޔަގީން ނުވި ނަމަވެސް ޕެރިހުގެ ޕްރޮސެކިއުޓަރު ލޯޔޭ ބެކާއޫ ވިދާޅުވީ ތުހުމަތު ކުރެވޭ މީހާ މީގެ ކުރިން ވެސް ނަަސްލީ ގޮތުން ހަމަލާ ދިނުމުގެ މައްސަލައެއްގައި ހިމެނުނު ކަމަށެވެ.
އެ ފަހަރު އެ މީހާ ވަނީ ފްރާންސަށް ހިޖުރަކުރި އެހެން ގައުމުތަކުގެ މީހުން ދިރިއުޅޭ ކޭމްޕެއްގެ ތެރެއަށް ވަދެ، ކަނޑިން ހަމަލާދީފަ އެވެ. އެ ހާދިސާ ހިނގީ ޑިސެމްބަރު 2021 ގަ އެވެ.
އެ މައްސަލައިގައި ޖަލުގައި ބަންދުކޮށްފައި ހުރުމަށް ފަހު، އެ މީހާ މިނިވަން ކުރީ ކީއްވެ ކަމެއް ސާފެއް ނޫނެވެ.
