ސޯލް، ދެކުނު ކޮރެއާ (ޑިސެމްބަރު 14) - އުތުރު ކޮރެއާއިން ލޯންޗުކުރާ ބެލިސްޓިކް މިސައިލްތައް ފަސޭހަކޮށް ދެނެގަނެވޭނެ ގޮތް ހެދުމަށް އެމެރިކާގެ ސިފައިންގެ "ސްޕޭސް ފޯސް" ޔުނިޓެއް ދެކުނު ކޮރެއާގައި ގާއިމްކޮށްފި އެވެ.
މި އަހަރުގެ ތެރޭގައި އުތުރު ކޮރެއާއިން ވަނީ ރެކޯޑް އަދަދަކަށް ހަތިޔާރު ޓެސްޓުކޮށްފަ އެވެ. އެގޮތުން އެ ގައުމުން އެންމެ ފަހުން އުފެއްދި އިންޓަކޮންޓިނެންޓަލް ބެލިސްޓިކް މިސައިލް ވެސް މިދިޔަ މަހު ޓެސްޓު ކުރި އެވެ.
ޔޫއެސް ފޯސާސް ކޮރެއާ (ޔޫއެސްއެފްކޭ) އިން ނެރުނު ބަޔާނެއްގައި ބުނީ އާ ޔުނިޓުގެ އެހީގައި "ބެލިސްޓިކް މިސައިލް ލޯންޗު ކުރުމުން، ވަގުތުން އެކަން ދެނެގަނެ އިންޒާރު ދެވޭނެ" ކަމަށެވެ.
"އަޅުގަނޑުމެންގެ އެންމެ 48 މޭލު އުތުރުގައި އޮތީ އަޅުގަނޑުމެންގެ ކުރިމަގަށް އޮތް ނުރައްކަލެއް. އަޅުގަނޑުމެން ތިބެން ވާނީ އެ ނުރައްކާ ފަހަތަށް ޖައްސައި، ބަލިކުރިން ޖެހިއްޖެ ނަމަ ބަލި ކުރަން ވެސް ތައްޔާރަށް،" ސްޕޭސް ފޯސް ޔުނިޓްގެ ކޮމާންޑަރު ލެފްޓިނެންޓް ކާނަލް ޖޯޝުއާ މެކްކުލިއޮން ވިދާޅުވި އެވެ.
އާ ޔުނިޓާ އެކު "އެމެރިކާ އާއި ދެކުނު ކޮރެއާގެ އެއްބައިވަންތަކަން އިތުރަށް ވަަރުގަދަ" ވެގެން ހިނގައްޖެ ކަމަށް އޭނާ ވިދާޅުވި އެވެ.
އެމެރިކާގެ 28،500 ސިފައިން ދެކުނު ކޮރެއާގައި އުޅެ އެވެ. އެއީ އުތުރު ކޮރެއާއިން ދީފާނެ ހަމަލާއަކުން ދެކުނު ކޮރެއާއަށް ހިމާޔަތްކޮށްދިނުމަށް ތިބޭ ސިފައިންނެވެ. ދެ ކޮރެއާގެ ހަނގުރާމަ 1953 ވަނަ އަހަރު ނިމުނު ނަމަވެސް ރަސްމީކޮށް ސުލްހައިގެ އެއްބަސްވުމެއްގައި ސޮއިނުކުރެ އެވެ.
އެމެރިކާ ސިފައިންގެ "ސްޕޭސް ފޯސް" ނުވަތަ ޖައްވީ ފައުޖު އުފެއްދީ 2018 ވަނަ އަހަރު ކުރީގެ ރައީސް ޑޮނަލްޑް ޓްރަމްޕް އެވެ. އެމަނިކުފާނު ވިދާޅުވީ ޖައްވުގައި އެމެރިކާގެ ބާރު ދަމަހައްޓައި، ނުރައްކާތަކުން ސަލާމަތްވުމަށް އެފަދަ ފައުޖެއް މުހިއްމު ކަމަށެވެ.
އެމެރިކާގެ އެތެރޭގައި އެފަދަ ގިނަ ޔުނިޓް ހުރެ އެވެ. ދެކުނު ކޮރެއާގައި ގާއިމްކުރީ އެމެރިކާގެ މައި ފަސްގަނޑުން ބޭރުގައި ގާއިމްކުރި ދެ ވަނަ ޔުނިޓެވެ. މިދިޔަ މަހު އެމެރިކާގެ ހަވާއީ ރަށްތަކުގައި ވެސް އޭގެ ޔުނިޓެއް ގާއިމްކުރި އެވެ.
ދެކުނު ކޮރެއާގެ ވައިގެ ސިފައިން ވެސް މި މަހު ވަނީ ޖައްވީ ފައުޖެއް އުފައްދައިފަ އެވެ. ދެކުނު ކޮރެއާގެ ވިސްނުމަކީ އެމެރިކާއާ ގުޅިގެން ކުރިއަށް ދިޔުމެވެ.
