ރާއްޖޭގެ ގައުމީ މިކްސް ޑަބަލްސްގެ ޗެމްޕިއަން، ޒަޔާން ޒަކީ އާއި ފާތިމަތު ނަބާހާ (ނަބާ)ގެ ޕެއާ އިން ދުނިޔޭގެ ރޭންކިންގެ ގަދަ 100 ޕެއާގެ ތެރޭގައި ހިމެނި ތާރީހީ ކާމިޔާބެއް ހޯދައިފި އެވެ.
ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ނެރުނު އެންމެ ފަހުގެ ރޭންކިންގައި ރާއްޖޭގެ ގައުމީ މިކްސް ޗެމްޕިއަން ޕެއާ ޒަޔާން އާއި ނަބާގެ ޕެއާ އޮތީ ދުނިޔޭގެ 99 ވަނައިގަ އެވެ.
މިއީ ރާއްޖޭގެ މިކްސް ޑަބަލްސް ޕެއާ އެއް ދުނިޔޭގެ ރޭންކިންގެ ގަދަ 100 ތެރެއަށް ވަން ފުރަތަމަ ފަހަރެވެ. ޒަޔާނާއި ނަބާގެ ޕެއާ އަށް ރޭންކިން ޕޮއިންޓްގެ ގޮތުގައި 12،670 ޕޮއިންޓް ލިބިފައިވެ އެވެ. މި ކާމިޔާބީ ޒަޔާނަށް ހާއްސަ ވަނީ އޭނާ އަކީ އެއްވެސް އިވެންޓަކުން ބަލާއިރު، ދުނިޔޭގެ ގަދަ 100 ތެރެއިން ޖާގަ ހޯދި ރާއްޖޭގެ ފުރަތަމަ ފިިރިހެން ކުޅުންތެރިޔާ އަށް ވުމެވެ.
ރާއްޖޭގެ އެހެން މިކްސް ޑަބަލްސް ޕެއާތައް މި ވަގުތު ރޭންކްކުރެވިފައިވާ ގޮތަށް ބަލާއިރު، ދެން ރޭންކިންގައި އޮތް ރާއްޖޭގެ ޕެއާތަށް އޮތީ 758 ވަނައިގަ އެވެ.
ރޭންކިންގައި ޒަޔާން އާއި ނަބާގެ ޕެއާ އަށް މި ލިބުނު ކުރިއެރުންތަކުގެ އަސްލަކީ ބައިނަލްއަގުވާމީ މުބާރާތްތަކުގައި ވާދަކޮށް، އެ ޕެއާ އިން ހޯދަމުން އަންނަ ކާމިޔާބީތަކެވެ. އެ ގޮތުން، ޒަޔާން އާއި ނަބާގެ ޕެއާ އިން ވަނީ 2017 ވަނަ އަހަރު މޮރިޝަސްގައި ބޭއްވި ސީރީސް އިން ލޯ މެޑަލް ހޯދައި، ރާއްޖެ އަށް ބެޑްމިންތަން ވޯލްޑް ފެޑެރޭޝަން މުބާރާތަކުން ލިބުނު މިކްސް ޑަބަލްސްގެ ފުރަތަމަ މެޑަލް ގެނެސްދީފަ އެވެ.
އޭގެ ފަހުން، 2019 ވަނަ އަހަރު ޕާކިސްތާންގައި ބޭއްވި މުބާރާތެއްގެ މިކްސް ޑަަބަލްސް އިވެންޓުން ރަން މެޑަލް ގެނެސް، ޒަޔާން އާއި ނަބާގެ ޕެއާ ވަނީ ރާއްޖޭގެ ބެޑްމިންޓަން ތާރީހުން ޖާގަ ހޯދައިފަ އެވެ. ޒަޔާން އާއި ނަބާގެ ޕެއާ އެ ފަހަރު ވެފައިވަނީ ބެޑްމިންޓަން ވޯލްޑް ފެޑެރޭޝަންގެ ރުހުން ލިބިފައިވާ މުބާރާތަކުން ރާއްޖެ އަށް ރަން މެޑަލެއް ގެނެސްދިން ފުރަތަމަ ކުޅުންތެރިންނަށެވެ.
ގައުމީ މުބާރާތުގެ މިކްސް ޑަބަލްސް އިވެންޓް އެންމެ ފަހުން ހަތަރު ފަހަރު ވެސް ހޯދި ނަބާ އާއި ޒަޔާންގެ ޕެއާ އިން ވަނީ 2020 ވަނަ އަހަރު ޔޫގާންޑާގައި ބޭއްވި އިންޓަނޭޝަނަލް މުބާރާތުގެ މިކްސް ޑަބަލްސް އިވެންޓުން ވެސް ލޯ މެޑަލް ހޯދައިފަ އެވެ.
ރާއްޖޭގެ އަންހެން ޑަބަލްސް އެއް ވަނަ ޕެއާ، ނަބާ އާއި އައިމިނަތު ނަބީހާ (ނަބީ)ގެ ޕެއާ ވެސް އޮތީ ދުނިޔޭގެ ގަދަ 100 ޕެއާ ތެރޭގަ އެވެ. ނަބީ އާއި ނަބާގެ ޕެއާ އޮތީ ދުނިޔޭގެ 93 ވަނައިގަ އެވެ. މިއީ ދުނިޔޭގެ ގަދަ 100 ތެރޭގައި ނަބީ އާއި ނަބާގެ ޕެއާ ހިމެނުނު ދެ ވަނަ ފަހަރެވެ.
ބައިނަލްއަގުވާމީ މެޑަލަށް ބަލާއިރު، ނަބާ އާއި ޒަޔާންގެ ޕެއާ އިން މި ވަނީ ފާހަގަކޮށްލެވޭ ކާމިޔާބެއް ހޯދައިފަ އެވެ. މެޑަލް ޕޯޑިއަމް ފިނިޝް އަކާ ހަމައަށް ބައެއް އިންޓަނޭޝަނަލް މުބާރާތްތަކުގައި ނުދެވުނު ކަމުގައި ވިޔަސް، ޒަޔާން އާއި ނަބާގެ ޕެއާ އިން މެޗުތަކުން މޮޅުވެ، ރޭންކިން ޕޮއިންޓްސް ހޯދަ އެވެ.
