ސިޑްނީ، އޮސްޓްރޭލިއާ (ޑިސެމްބަރު 12) - އޮސްޓްރޭލިއާގެ ކުއީންސްލޭންޑް ސްޓޭޓުގައި ބަޑިޖަހައި މަރުވި ތިން މީހުންގެ ތެރޭގައި ދެ ފުލުހުން ހިމެނޭ ކަމަށް އިދާރާތަކުން ބުނެފި އެވެ.
ހަމަލާ ދިން ކަމަށް ތުހުމަތު ކުރެވޭ މީހުން ވަނީ ފިލައިފަ އެވެ. އެ ސްޓޭޓްގެ ވެރިރަށް ބްރިޒްބޭންއާ 270 ކިލޯމީޓަރު ހުޅަނގުން އޮންނަ ވިއެމްބިލާ ކޮމިއުނިޓީގެ މީހުން ގެތަކުން ނުނިކުތުމަށް ވަނީ އަންގައިފަ އެވެ.
ފުލުހުން ބުނީ ތުހުމަތު ކުރެވޭ ފަރާތްތައް ހޯދައި ހައްޔަރު ކުރުމުގެ މަސައްކަތް ކުރަމުންދާ އިރު، އެ ސަރަހައްދުގައި އުޅޭ މީހުން އެއްވެސް ވަރަކަށް ބޭރަށް ނުދިޔުމަށް އެދޭ ކަމަށެވެ.
ބަޑިއާ ގުޅޭ އެންމެ ހަރުކަށި ގާނޫނުތައް އޮންނަ އެއް ގައުމަކީ އޮސްޓްރޭލިއާ އެވެ. ގާނޫނުތައް ވަަރުގަދަ ކުރީ 1996 ވަނަ އަހަރު ދެކުނު ޓެސްމޭނިއާ ސްޓޭޓްގެ ޕޯޓް އާތާގައި ބަޑި ޖަހައި 35 މީހުން މަރުވުމުންނެވެ.
"ވިއެމްބިލާއިން ފެންނަމުން މި ދަނީ ހިތްދަތި މަންޒަރުތަކެއް. މިއީ ކުއީންސްލޭންޑް ފުލުހުންގެ އާއިލާތަކާއި އެކުވެރިންނަށް ހިތާމަވެރި ދުވަހެއް،" ބޮޑު ވަޒީރު އެންތަނީ އަލްބަނީޒް ޓްވިޓާގައި ވިދާޅުވި އެވެ.
ހާދިސާ ހިނގި އިމާރާތަށް ހޯމަ ދުވަހު ފުލުހުން ދިޔައީ ނިއު ސައުތު ވޭލްސް ސްޓޭޓުން ގެއްލުނު މީހެއްގެ ރިޕޯޓު ލިބިގެން، އެކަމާ ގުޅޭ ގޮތުން ކަަމަށް ރިޕޯޓުތައް ބުނެ އެވެ.
އެ އިމާރާތުގައި އަލިފާން ރޯވެފައި އޮތް މަންޒަރު ފެނި ކައިރީގައި ހުރި ދަނޑެއްގައި އުޅޭ ފިރިހެނަކު ވެސް އެ ތަނަށް ދިޔަ އެވެ. ބަޑި ޖަހަން ފެށީ އެ ހިސާބުންނެވެ.
ބަޑި ޖަހަން ފެށި އިރު އެ ތަނުގައި ހަތަރު ފުލުހުން ތިއްބެވެ. ވަޒަން އަރައި މަރުވީ އޭގެން ދެ ފުލުހުންނާއި ޖެހިގެން ހުރި ދަނޑުން އައި ފިރިހެން މީހާ އެވެ. ތިން ވަނަ ފުލުހަކަށް އަނިޔާވި އެވެ.
އޮސްޓްރޭލިއަން ބްރޯޑްކާސްޓިން ކޯޕޮރޭޝަނުން ބުނީ ބަޑީގެ އަޑުފަށްގަނޑު އަވަައްޓެރިންނަށް އިވުނު ކަމަށާއި ކާރުތަކުގައި ރޯވެފައި އޮތް މަންޒަރު ވެސް ފެނުނު ކަމަށެވެ.
ސިޑްނީ މޯނިން ހެރަލްޑް ނޫހުން ބުނީ އެ ތަނަށް ދިޔައީ ހަތަރު ވަނަ ފުލުސް މީހާ ސަލާމަތްވެގެން ގޮސް، އިތުރު ފުލުހުންގެ ސަމާލުކަމަށް ގެނައި ކަމަށެވެ.
