މެޑްރިޑް (ޑިސެމްބަރު 8) - ސީޒަންގެ ބާކީ ހުރި މެޗުތަކަށް ތައްޔާރުވަމުން އަންނަ މެންޗެސްޓާ ޔުނައިޓެޑުން ސްޕެއިންގައި ކުރަމުން އަންނަ ތަމްރީންތަކުގެ ތެރެއިން ކުޅުނު އެކުވެރިކަމުގެ މެޗެއްގައި ސްޕެނިޝް ލަލީގާގެ ކާޑިޒް އަތުން 4-2 ގެ ނަތީޖާ އަކުން ބަލިވެއްޖެ އެވެ.
ވޯލްޑް ކަޕްގައި ކުޅެމުން އަންނަ ކުޅުންތެރިން ނުލައި، ސްޕެއިންގައި ޔުނައިޓެޑުން ތަމްރީން ހަދަމުން މި އަންނަނީ މި މަހުގެ ފަހުކޮޅު ލީގުގެ ކުޅުން އަލުން ފަށާތީ އެވެ. ސީނިއާ ޓީމުގެ ގިނަ ކުޅުންތެރިންނާ އެކު ސްޕެއިންގައި ކުރަމުން އަންނަ ތަމްރީންތަކުގައި ކާޑިޒް އަތުން ޔުނައިޓެޑް ބަލިވީ ގިނަ ބަދަލުތަކެއް ކުރެވޭ ގޮތަށް ކުޅުނު މެޗެއްގަ އެވެ.
މި މެޗުގައި ޔުނައިޓެޑްގެ ވިކްޓާ ލިންޑެލޮފް، އާރޮން ވެން-ބިސާކާ، ސްކޮޓް މެކްޓޮމިނޭ، ޑޮނީ ވެންޑަބީކް، އަލެހަންދްރޯ ގާނާޗޯ، އެންތަނީ އެލަންގާ އަދި އެންތަނީ މާޝިއަލް ކުޅުނެވެ. ނަމަވެސް، މި ކުޅުންތެރިންނާ އެކު އެޓީމަށް މެޗުގައި މާ އެދެވޭ ކުޅުމެއް ނުދެއްކުނެވެ.
މެޗު ފަށައިގެން ފުރަތަމަ ދެ ގޯލު ޖަހައި ލީޑު ނެގީވެސް ކާޑިޒް އިންނެވެ. މާޝިއާލް ކާމިޔާބުކުރި ޕެނަލްޓީ އާއި ބެންޗުން އެރި ކޮބީ މައިނޯގެ ގޯލުން އެއްވަރުކުރި ނަމަވެސް ލަލީގާގެ ރެލިގޭޝަނުގައި އޮތް އުޅޭ ކާޑިޒް އިން ވަނީ ފަހު 15 މިނެޓުގައި ދެ ގޯލު ޖަހައި މެޗުން މޮޅުވެފަ އެވެ.
މެޗަށްފަހު ޔުނައިޓެޑްގެ ކޯޗު އެރިކް ޓެން ހާގް ވަނީ ކުޅުންތެރިންނަށް ވަރަށް ބޮޑަށް ފާޑުކިޔާފަ އެވެ. އެ ގޮތުން ޑިފެންސް ލައިނުގައި ކުޅުނު ކުޅުންތެރިންގެ ފަރާތުން ފެނުނީ ވަރަށް އާދައިގެ ގޯސްތަކެއްކަން އޭނާ ފާހަގަކުރި އެވެ. އަދި ބައެއް ކުޅުންތެރިން މެޗަށް އަރައިތިބީ ކުޅިބަލަން ކަމަށާއި އިދިކޮޅު ކުޅުންތެރިން މާކުކުރަން ހަނދާން ވެސް ނެތްކަމަށް އޭނާ ވަނީ ބުނެފަ އެވެ.
ޓެން ހާގް ބުނީ ޔުނައިޓެޑްގެ ކުޅުންތެރިން ތިބީ "ނިދާފައި" ކަމަށެވެ. މެޗުން ބަލިވި ކަހަލަ ގޮތަކަށް ކަންތައްތައް ދިޔަ ގޮތުން ލަދުގަންނަން ޖެހޭކަމަށް ވެސް ޓެން ހާގް ވަނީ ބުނެފަ އެވެ. އަދި ކުޅުންތެރިންގެ ފަރާތުން ފެނުނީ އޭނާ ގަބޫލުކުރާ ފެންވަރުގެ ކުޅުމެއް ނޫންކަން ފާހަގަކޮށް ޓެން ހާގް ބުނީ، ހުރި މައްސަލަތަކަށް ހައްލު ހޯދައި، ބައެއް ކުޅުންތެރިންގެ ހުރި ކަންތައްތައް ރަނގަޅު ނުކޮށްފި ނަމަ ސީޒަންގެ ބާކީ ބައިގައި ޔުނައިޓެޑްގެ ޓީމުން އެ ކުޅުންތެރިންނަށް ފުރުސަތު ނުދޭނެ ކަމަށެވެ.
ސްޕެއިންގައި ކުރަމުން އަންނަ ތަމްރީންތަކުގެ ތެރެއިން ޔުނައިޓެޑުން ރެއާލް ބެޓިސްއާ ދެކޮޅަށް ވެސް އެކުވެރިކަމުގެ މެޗެއް ކުޅޭނެ އެވެ.
