ޕަބްލިކް ސާވިސް މީޑީއާ (ޕީއެސްއެމް) ގެ ކުޅިވަރު ޗެނަލް، ޔެސް ޓީވީން ގެނެސްދޭ ވޯލްޑްކަޕް ކަވަރޭޖްގެ ތެރެއިން ރޭގެ ޕްރޮގްރާމްގައި ގައުމީ ޓީމުގެ ކުރީގެ ގޯލްކީޕަރު އިސްމާއީލް ޒަރިޔަންދު ދެއްކި ވާހަކާގައި މައްސަލައެއް ވޭތޯ ބަލަމުންދާ ކަމަށް އެ މީޑިއާގެ ސްޕޯޓްސް ޓީމުން ބުނެފި އެވެ.
ވޯލްޑް ކަޕްގެ ދެވަނަ ބުރުގައި ރޭ ސްޕެއިން އަދި މޮރޮކޯ ބައްދަލުކުރި މެޗަށް ފަހު، މެޗާ ގުޅޭ ގޮތުން ވާހަކަ ދައްކަމުން ޒަރިޔަންދު ވަނީ ސްޕެއިންގެ ދެ ކުޅުންތެރިއަކަށް ނިސްބަތްކޮށް "ހަންކަޅު ދެ ކުދިން އަރުވައިގެން، ސްޕެއިނަށް ފައިދާއެއް ނުކުރި" ކަމަށް ބުނެފަ އެވެ.
ޒަރިޔަންދުގެ އެ ވާހަަކައަކީ ނަސްލީ ތަފާތު ކުރުމަށް ހިތްވަރުދިނުން ކަމަށް ބުނެ ސޯޝަލް މީޑިއާގައި އާންމުންނާއި ކުޅިވަރު ސަޕޯޓަރުންގެ ގިނަ ބަޔަކު ދަނީ ފާޑުކިޔަމުންނެވެ.
ޕީއެސްއެމްގެ ސްޕޯޓްސް ކަވަރޭޖް ހެޑް ހުސައިން ފަރިޔާޒް "އަދަދު" ނޫހަށް ވިދާޅުވީ ޕަބްލިކް ސާވިސް މީޑިއާގެ ގާނޫނުގައި އޮންނަ ގޮތުގެ މަތިން، އެ ސާވިސްގެ އެއްވެސް ޗެނަލެއްގައި މީހަކު ދެއްކި ވާހަކައަކާ ގުޅިގެން، އެއީ ރަނގަޅު ނޫން ވާހަކައެއް ކަމަށް ބެލެވޭނަމަ އެ މައްސަލައެއް ބަލާނެ ކަމަށެވެ.
"އަބަދުވެސް، މި ތަނުގެ އޮންނަ ސިސްޓަމް އެއީ، ޒަރިޔަންދުގެ ވާހަކާގައި ވެސް، މައްސަލައެއް އޮތްތޯ ބަލާނެ، މައްސަލައެއް އޮތް ނަމަ ފިޔަވަޅު ވެސް އަޅާނެ، ޕަބްލިކް ސާވިސްގެ ޗެނަލްއެއްގެ ލައިވް ފީޑަކަށް އަރުވާނެތޯ ނުވަތަ ނޫންތޯ ވެސް ނިންމާނެ،" ފަރިޔާޒް ވިދާޅުވި އެވެ.
