މަގުމަތީން ހުއްޓުވައި ބަލައިފާސްކުރަން އުޅުނު ފުލުހެއްގެ ގައިގައި ދަތް އެޅިކަން ސާބިތުވާ ކަމަށް ކަނޑައަޅައި، ދެ މަހަށް ޖަލަށް ލުމަށާއި ދެ އަހަރު ދުވަހުގެ މުއްދަތަކަށް ގޭބަންދުކުރުމަށް ކްރިމިނަލް ކޯޓުން ހުކުމްކޮށްފި އެވެ.
އެ މީހާގެ މައްޗަށް ދައުލަތުން ކުރާ ދައުވާގައިވާ ގޮތުން އެ ކަމެއް ހިނގައިދިޔައީ މިދިޔަ ޖެނުއަރީ މަހުގެ ދެވަނަ ދުވަހުގަ އެވެ. އޭނާ އަތުގައި ގަވާއިދާ ހިލާފު އެއްޗެއް އޮތް ކަމަށް ޝައްކު ކުރެވިގެން، ބަލައިފާސްކުރަން އުޅުނު ވަގުތު ދަތް އެޅީ ފުލުސް މީހާގެ ކަނާތު ކިހިލިފަތް ކައިރީގައި ކަމަށެވެ.
ދައުވާއަށް އެ މީހާ އިންކާރުކޮށްފައިވެ އެވެ. އަދި ފުލުހުން އޭނާއަށް އަނިޔާ ކުރި ކަމަށް ތުހުމަތުކޮށް ޝަރީއަތުގައި ވާހަކަ ދައްކާފައިވެ އެވެ.
ދައުވާ ސާބިތު ކުރުމަށް ދައުލަތުން ހުށަހެޅީ ހާދިސާ ހިނގި ތަނުގައި ތިބި އިތުރު ދެ ފުލުހެކެވެ. އަދި ކިތާބީ ހެކިންގެ ގޮތުގައި ފުލުސް މީހާއަށް އަނިޔާވެގެން ހޯދި ފަރުވާތަކުގެ ރިޕޯޓްތައް ހުށަހަޅާފައިވެ އެވެ.
އަނިޔާއެއް ދިނުމުގެ ކުށުގެ ދައުވާ އެ މީހާގެ މައްޗަށް އުފުލާފައިވާއިރު، ގާނޫނުލްއުގޫބާތުގައި އެ ކުށުގެ އަސާސީ އަދަބަކީ 1 އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށް ލުމެވެ.
ކުށްކުރި ހާލަތާއި، ދައުވާ ރައްދުވާ މީހާ އާމްދަނީ ހޯދޭނެ މަސައްކަތެއްކޮށްގެން އާއިލާއެއް ބަލަހައްޓަމުންދާ ކަް އެނގެން އޮންނާނީ އެ އަދަބުން ބައެއް ގޭބަންދަށް ބަދަލުކުރުމަށް މައްސަލަ ބެއްލެވި ގާޒީ މުހައްމަދު މިސްބާހް ނިންމެވި އެވެ.
ކްރިމިނަލް ކޯޓުން މިއަދު ހުކުމްކޮށްފައިވަނީ އެ މީހާ ދެ މަހާއި ހަތަރު ދުވަހަށް ޖަލަށް ލުމަށާއި ދެ އަހަރާއި 10 މަސް ދުވަހުގެ މުއްދަތަކަށް ޖަލަށް ލުމަށެވެ.
