މާލެ އާއި ތިލަފުއްޓާ ދެމެދު އަޅާ ބުރިޖުގެ މަސައްކަތުގެ ތެރެއިން ވެއްޓުނު ކެރޭނު މިހާރު ނަގާފައިވާ ކަމަށާއި އެކަމުގެ ސަބަބުން މަސައްކަތުގެ ޝެޑިއުލަށް އެއްވެސް ބުރުއެއް ނާރާނެ ކަމަށް ޕްލޭނިން މިނިސްޓްރީން މިއަދު ބުނެފި އެވެ.
އިންޑިއާގެ އެފްކޮންސް ކުންފުނިން ކުރިއަށް ގެންދާ މި މަޝްރޫއުގެ މަސައްކަތުގެ ތެރެއިން ކެރޭނު ކަނޑަށް ވެއްޓުނީ އިއްޔެ މެންދުރު ފަހު އެވެ. ކެރޭނުގެ ބޮޑު ބައި ވެއްޓުނީ އެ މެޝިނު ބަހައްޓާފައިހުރި ޕްލެޓްފޯމުގެ ތެރެއަށެވެ.
ޕްލޭނިން މިނިސްޓްރީން މިއަދު ބުނީ ކެރޭނުގެ ބޫމް ފެއިލްވެފައިވަނީ ޕައިލިންގެ މަސައްކަތް ފެށުމަށް ބޭނުންވާ ބައެއް މެޓީރިއަލް އުފުލަނިކޮށް ކަމަށެވެ.
"ކްރޭންގެ ބޫމްވަނީ ޖެކްއަޕް ޕްލެޓްފޯމް މަތިން މިހާރު ނެގިފަ. އަދި މިކަމާއި ގުޅިގެން މި މަޝްރޫއުގެ މަސައްކަތުގެ ޝެޑިއުލްއަށް އެއްވެސް ބަދަލެއް އަންނާނެކަމަކަށް ނުބެލެވޭ،" ޕްލޭނިން މިނިސްޓްރީން ބުނެފައިވެ އެވެ.
އެ ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށް ވެސް އެ މިނިސްޓްރީން ބުނެ އެވެ.
ތިލަމާލެ ބުރިޖުގެ މަސައްކަތުގައި މީގެ ކުރިން ވެސް މިފަދަ ހާދިސާއެއް ވަނީ ހިނގާފަ އެވެ. އެގޮތުން ބުރިޖު ސާވޭއަށް ބޭނުންކުރަމުންދިޔަ ޕްލެޓްފޯމެއް ވިލިމާލެ ފަރަށް އަރާ ފަރަށް ބޮޑެތި ގެއްލުންތަކެއް ވަނީ ވެފަ އެވެ. މިދިޔަ އޮގަސްޓު 16، ވަނަ ދުވަހު ވިލިމާލެ ފަރަށް އެރި އެ ޕްލެޓްފޯމް އެފްކޮންސްއަށް ފުންކުރެވުނީ އޭގެ 12 ދުވަސް ފަހުންނެވެ.
