މާލެ އާއި ތިލަފުއްޓާ ދެމެދު އަޅާ ބުރިޖުގެ މަސައްކަތުގައި ގެންގުޅުނު ކެރޭނެއް މިއަދު ކަނޑަށް ވެއްޓުނީ ބުރިޖުގެ ތަނބެއް ޖެހުމުގެ ތެރޭގައި ކަމަށް ޕްލޭނިން މިނިސްޓްރީން ބުނެފި އެވެ.
އިންޑިއާގެ އެފްކޮންސް ކުންފުނިން ކުރިއަށް ގެންދާ މި މަޝްރޫއުގެ މަސައްކަތުގެ ތެރެއިން ކެރޭނު ކަނޑަށް ވެއްޓުނީ މިއަދު މެންދުރު ފަހުގެ ވަގުތެއްގަ އެވެ.
ޕްލޭނިން މިނިސްޓްރީގެ އޮފިޝަލަކު "އަދަދު" އަށް މައުލޫމާތު ދެއްވި ގޮތުގައި ކެރޭނުގެ ބޮޑު ބައި ވެއްޓުނީ ކެރޭނު ބަހައްޓާފައިހުރި ޕްލެޓްފޯމުގެ ތެރެއަށެވެ. އަދި މި ހާދިސާގައި އެއްވެސް މީހަކަށް އަނިޔާ ނުވާާ ކަމަށް ވިދާޅުވި އެވެ.
އޭގެއިތުރުން، މި ކެރޭނު ވެއްޓުމުގެ ސަބަބުން ބުރިޖުގެ މަސައްކަތަށް އެއްވެސް އަސަރެއް ނުކުރާނެ ކަމަށާއި ޕްލޭނާއި އެއްގޮތަށް މަސައްކަތް ކުރިއަށްދާނެ ކަމުގެ ޔަގީންކަން ޕްލޭނިން މިނިސްޓްރީން ވަނީ ދީފަ އެވެ. އަދި، މި ހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލާ ތަހުގީގެއް ކުރަން ޖެހޭނަމަ އެކަން ކުރާނެ ކަމަށްވެސް އެ މިނިސްޓްރީގެ އޮފިޝަލު ވިދާޅުވި އެވެ.
ތިލަމާލެ ބުރިޖުގެ މަސައްކަތުގައި މީގެ ކުރިންވެސް މިފަދަ ހާދިސާއެއް ވަނީ ހިނގާފަ އެވެ. އެގޮތުން ބުރިޖު ސާވޭއަށް ބޭނުންކުރަމުންދިޔަ ޕްލެޓްފޯމެއް ވިލިމާލެ ފަރަށް އަރާ ފަރަށް ބޮޑެތި ގެއްލުންތަކެއް ވަނީ ވެފަ އެވެ. މިދިޔަ އޮގަސްޓު މަހުގެ 16 ވަނަ ދުވަހު ވިލިމާލެ ފަރަށް އެރި އެ ޕްލެޓްފޯމް އެފްކޮންސްއަށް ފުންކުރެވުނީ އޭގެ 12 ދުވަސް ފަހުންނެވެ.
އެކަމާއި ގުޅިގެން ތިމާވެށީގެ ގިނަ ޖަމްއިއްޔާތަކުންނާއި އިދިކޮޅު ސިޔާސީ ފަރާތްތަކުންވެސް ވަނީ ސަރުކާރަށާއި އެފްކޮންސްއަށް ވަރަށް ބޮޑަށް ފާޑުކިޔާފަ އެވެ.
އޭގެ ފަހުން ވިލިމާލޭ ފަރަށް ލިބުނު ގެއްލުން ބެލުމަށް އީޕީއޭއިން ސާވޭއެއް ހެދުމުން އެފްކޮންސްއިން ވަނީ އެ ސާވޭގެ ރިޕޯޓު ބަލައިނުގަނެ އީޕީއޭގެ ހުއްދައާއެކު އަލުން ސާވޭއެއް ހަދާފަ އެވެ. ދެ ސާވޭއަށް ބެލުމަށްފަހު އީޕީއޭއިން ވަނީ އެފްކޮންސް ކުންފުނި ލިބުނު ގެއްލުންތަކުގެ ބަދަލުގެ ގޮތުގައި އެ ކުންފުނި 69.4 މިލިއަން ރުފިޔާއިން ޖޫރިމަނާ ކޮށްފަ އެވެ.
