ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ދަށުން ހިންގަމުންދާ އެސްޓީއޯ ކޮންސްޓްރަކްޝަންސްގެ ވިޔަފާރި ބައިނަލްއަގްވާމީ މާކެޓަށް ފުޅާކުރުމުގެ އަމާޒުގައި އެކުންފުނިން "ބިގް 5" ފެއާގައި ބައިވެރިވެއްޖެ އެވެ.
މިއީ އިމާރާތް ކުރުމުގެ ދާއިރާގައި އެންމެ ނޫފުޒު ގަދަ އަދި އެންމެ ބޮޑު އެއް ފެއާ އެވެ. އެގްޒިބިޓަރެއްގެ ގޮތުގައި އެސްޓީއޯއިން މި ފެއާގައި ބައިވެރިވިއިރު އެސްޓީއޯ މޯލްޑިވްސްގެ ނަމުގައި މި ފެއާގައި ގާއިމްކޮށްފައިވާ ސްޓޯލްގައި އެސްޓީއޯ ކޮންސްޓްރަކްޝަން ސޮލިއުޝަންސް ގެ މުދާ ދައްކާލާނެ އެވެ.
އެގޮތުން، އެތަނުން ވިއްކާ، ހިލަ ހިލަވެލި، ދަގަނޑު، ދަގަނޑު ހޮޅި، ފަތި ހޮޅި އަދި ޕްލައިވުޑާއި، ޝަޓަރިންގ ފިލާގެ އިތުރުން އެސްޓީއޯ ސިމެންތި ދައްކާލާނެ އެވެ.
މި ފެއާ ކުރިއަށްދަނީ ޔޫއޭއީގެ ދުބާއީގައި މި މަހުގެ 5 އިން 8 އަށެވެ. ދުނިޔޭގެ އެކި ކަންކޮޅުތަކުން 150 އަށްވުރެ ގިނަ ގައުމަކުންނާއި 60 އަށްވުރެ ގިނަ އެގްޒިބިޓަރުން މި ފެއާގައި ބައިވެރިވެފައިވެ އެވެ.
