މޭ 2021 އަށް ފަހު ފުރަތަމަ ފަހަރަށް ތުރުކީގެ އިންފްލޭޝަން މަޑުޖެހެން ފަށާފައިވާ ކަމަށް ރަސްމީ ތަފާސްހިސާބުން ދައްކައިފި އެވެ.
ތަފާސްހިސާބާ ބެހޭ އެޖެންސީ ތުއިކްއިން ބުނި ގޮތުގައި އޮކްޓޯބަރު މަހު އިންފްލޭޝަން ހުރީ 85.51 ޕަސެންޓުގަ އެވެ. އެކަމަކު ނޮވެމްބަރު މަހު އިންފްލޭޝަން ވަނީ 84.39 ޕަސެންޓަށް މަޑުޖެހިފަ އެވެ.
ތުރުކީގެ އިންފްލޭޝަން 16.6 ޕަސެންޓަށް ތިރިވުމަށް ފަހު މަހަކަށް ވުރެ މަހެއް އަގުތައް އުފުލެމުން ދިޔައީ މޭ 2021 އިން ފެށިގެންނެވެ.
އެހެން ނަމަވެސް ރަަސްމީ ތަފާސްހިސާބާއި ހަގީގީ އިންފްލޭޝަން ރޭޓް ތަފާތު ކަމަށް އެނެލިސްޓުން ބުނެ އެވެ. އެގޮތުން ނޮވެމްބަރު މަހުގެ ހަގީގީ ރޭޓަކީ 170.7 ޕަސެންޓު ކަމަށް ތަޖުރިބާކާރުން ބުނެ އެވެ.
ފާއިތުވި ހަފުތާ ބަންދުގައި ރައީސް ތައްޔިބް އުރުދުގާން ވިދާޅުވީ ތަކެތީގެ އަގުތައް ވަރަށް އަވަހަށް ތިރިވާން ފަށާނެ ކަމަށެވެ.
ތުރުކީ ސަރުކާރުން ބުނާ ގޮތުގައި އިންފްލޭޝަން މަތިވަމުން ދަނީ ދުނިޔޭގައި ހިނގާ އެކި ކަންކަމާ ގެދި އެވެ. އެގޮތުން ޔޫކްރެއިން ހަނގުރާމައާ ހެދި ކާބޯތަކެއްޗާއި ތެލުގެ އަގު އުފުލުން ފާހަގަކުރެ އެވެ.
