ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު ގދ. ތިނަދޫއަށް ވަޑައިގަތުމުން އެ ރަށުން އެމަނިކުފާނަށް ހޫނު މަރުހަބާއެއް ކިޔައިފި އެވެ.
މައުލޫމާތު ލިބިފައިވާ ގޮތުގައި ނަޝީދުގެ މި ދަތުރުފުޅަކީ އަމިއްލަ ފަރާތެެއްގެ ދައުވަތަކަށް ކުރައްވާ ދަތުރުފުޅެކެވެ. ނަޝީދު ތިނަދޫއަށް މި ވަޑައިގަތަކީ ގިނަ އަހަރުތަކަކަށްފަހު އެވެ.
ނަޝީދު ތިނަދޫއަށް ވަޑައިގަންނަވާ ކަމުގެ އަޑާއެކު ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި އެ މަނިކުފާނު ވާދަކުރައްވާކަން ރަސްމީކޮށް އިއުލާންކުރައްވާނީ އެ ރަށުގައި ކަމަށް ވަނީ އަޑު ފެތުރިފަ އެވެ.
މިރޭ ތިނަދޫގައި ބާއްޕާ ޖަގަހަ ޖަލްސާއެއްގައި ނަޝީދު ބައިވެރިވެ ވަޑައިގަންނަވާނެކަމަށްވެސް މައުލޫމާތު ލިބެ އެވެ.
އަންނަ އަހަރު އޮންނަ ރިޔާސީ އިންތިހާބުގައި އެމްޑީޕީއިން ވާދަކުރާ ކެންޑިޑޭޓެއް ހޮވުމަށް ބާއްވާ އިންތިހާބުގައި ނަޝީދުގެ އިތުރުން ރައީސް އިބްރާހިމް މުހައްމަދު ސޯލިހު ވެސް ވާދަކުރައްވާނެ ކަމަށް ވަނީ ވިދާޅުވެފަ އެވެ. ނަމަވެސް ޕްރައިމަރީ ބާއްވާނެ ދުވަހެއް އަދި އެމްޑީޕީއިން އިއުލާނުކޮށްފައެއް ނުވެ އެވެ.
ދެ ރައީސުން ޕްރައިމަރީއަށް ތައްޔާރުވާން ފަށާފައިވާއިރު ޕާޓީގެ ތެރޭގައި ދެ ފެކްޝަނެއް އުފެދި ވާދަވެރިކަން ދަނީ އިތުރުވަމުންނެވެ.
