ކުޅުދުއްފުށީގައި ސަރުކާރުން އިމާރާތްކުރި 165 ރޯހަރުސް އެ ރަށު ކައުންސިލާ ރޭ ރަސްމީކޮށް ހަވާލުކޮށްފި އެވެ.
ބޮޑުތިލަތުންމަތީގެ އެންމެ އާބާދީ ބޮޑު ރަށް، ކުޅުދުއްފުއްޓަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދިނުމަށް 2011 ފެށި ރޯހައުސްގެ މަޝްރޫއުގެ ބޮޑުބައެއް ނިމިފައި ހުއްޓައި، އެ މަޝްރޫއު ހުއްޓުނީ 2012 ވަނަ އަހަރު ފެބްރުއަރީ މަހު އޭރުގެ ރައީސް މުހައްމަދު ނަޝީދުގެ ވެރިކަން ބަދަލުވި ހިސާބުންނެވެ.
އެއަށް ފަހު އެ އިމާރާތްތައް ވީނާރާވާން ދޫކޮށްލާފައި ހުރުމަށް ފަހު، 2018 ވަނަ އަހަރުގެ ރިޔާސީ އިންތިހާބު ގާތްވެފައި ވަނިކޮށް އެތަނުން ބައެއް އިމާރާތް ނިންމައި މީހުން ވެއްދި އެވެ.
ބާކީ ހުރި 105 މަރާމާތުކުރުމުގެ މަސައްކަތް ބަޔަކާ ހަވާލުކުރީ މިދިޔަ އަހަރުގެ އޭޕްރީލް މަހު އެވެ.
އެ މަޝްރޫއުގެ މަސައްކަތް ނިންމައި ރޭ ބޭއްވި ރަސްމިއްޔާތުގައި ކުޅުދުއްފުށީގެ މޭޔަރު މުހައްމަދު އާތިފްއާ ރޯހައުސްތައް ހަވާލުކޮށް ދެއްވީ ހައުސިން މިނިސްޓަރު މުހައްމަދު އަސްލަމް އެވެ.
މި ސަރުކާރުން މަރާމާތުކޮށް ނިންމި 105 ރޯހައުސްއަށް މީހުން ވައްދާފައި ވަނީ ނިމިދިޔަ ހަފުތާގައި ކަމަށް ޕްލޭނިން މިނިސްޓްރީން ބުނެ އެވެ.
ދެ ފަންގިފިލާ އަށް ހަދާފައިވާ ރޯހައުސްތައް ދޫކޮށްފައިވަނީ އިމާރާތުގެ އަގު މަހު ކުލީގެ ގޮތުގައި އަދާކުރާ ގޮތަށެވެ.
