ސަގާފަތާއީ ދީނީ ކަންކަމާ ގުޅޭ ގޮތުން ދައްކާފައިވާ ވާހަކަތާ ގުޅިގެން ޖަޕާނުގައި މަގްބޫލުވި ސޯޝިއޮލޮޖިސްޓަކަށް ވަޅިން ހަމަލާ ދިނުމުން ހާލު ސީރިއަސްވެއްޖެ އެވެ.
ޖަޕާނުގެ ނޫސްތަކުން ބުނީ ޓޯކިޔޯ މެޓްރޮޕޮލިޓަން ޔުނިވާސިޓީގެ ޕްރޮފެސަރު ޝިންޖީ މިޔަޑައިއަށް އަންގާރަ ދުވަހު ވަޅިން ހަމަލާ ދިނީ ޔުނިވާސިޓީގެ ކެމްޕަހުގައި ކަމަށެވެ.
އޭނާގެ ކަރަށް ތަަކުރާރުކޮށް ވަޅިން ހަމަލާދީފައިވާ ކަމަށް އެންއެޗްކޭއިން ބުންޏެވެ. އުމުރުން 63 އަހަރުގެ ޕްރޮފެސަރަށް ވަޅިން ހަމަލާ ދިނީ ފަހަތުންނެވެ.
ފުލުހުންނާ ހަވާލަދީ އެންއެޗްކޭއިން ބުނީ އޭނާ ހޮސްޕިޓަލަށް ގެންދިޔަ އިރު ވެސް ހޭހުރި ކަމަށެވެ. އޭނާގެ ހާލު ސީރިއަސް ނަމަވެސް، ފުރާނައަށް ނުރައްކަލެއް ނެތް ކަމަށް ރިޕޯޓުތައް ބުނެ އެވެ.
ހަމަލާ ދިން ކަމަށް ތުހުމަތު ކުރެވޭ މީހާ ވަނީ ހަމަލާ ދިނުމަށް ފަހު ދުވެ ފިލައިފަ އެވެ. އެއީ ޒުވާން އުމުރުގެ ފިރިހެނެއް ކަމަށް ފުލުހުން ބުނެ އެވެ. އޭނާ ހޯދުމުގެ މަސައްކަތް ދަނީ ކުރަމުންނެވެ.
މިޔަޑައިއަކީ ވަރަށް ގިނައިން ނޫސްތަކަަށް އިންޓަވިއު ދޭ މީހެކެވެ. އޭނާ ވާހަކަދައްކަނީ ތާރީހާއި ދީން އަދި ސަގާފަތާއި އާދަކާދައާ ގުޅޭ މައުލޫތަކުގަ އެވެ.
