އެމްޑަބްލިޔުއެސްސީން ފޯރުކޮށްދެމުންދާ ހިދުމަތްތައް އަޕްގްރޭޑު ކުރުމަށް ބޭނުންވާ ބައެއް ވަސީލަތްތައް ލިބުން ދަތިވެ، އަމީނީ މަގުގެ މަސައްކަތް ވަގުތީ ގޮތުން މަޑުޖެހިއްޖެ އެވެ.
އެ މަސައްކަތް ކުރަމުން އަންނަ ރޯޑް ޑިވޮލޮޕްމެންޓް ކޯޕަރޭޝަން (އާރްޑީސީ)އިން މިއަދު ނެރުނު ބަޔާނެއްގައި ބުނީ މަގު ހެދުން ކުރިއަށް ދަނީ ޕްލޭން ކޮށްފައިވާ ގޮތަށް ކަމަށާއި ތާރު ނާޅައި މަގުގެ މަސައްކަތް މަޑުޖެހިފައިވާ ކަމަށް ދެކެވޭ ވާހަކައިގައި ހަގީގަތެއް ނެތް ކަމަށެވެ.
"ނަމަވެސް މިވަގުތު އެ މަގުގެ މަސައްކަތް ވަނީ މަޑުޖައްސާލަން ޖެހިފައި ކަން ހިތާމައާއެކު ފާހަގަކުރަމެވެ." ބަޔާނުގައިވެ އެވެ.
އަމީނީ މަގުގެ މަސައްކަތް ކުރަމުން އަންނަނީ ރޭވިފައިވާ ގޮތަށް ކަމަށާއި އާރްޑީސީން އޮތީ 24 ގަޑިއިރު މަސައްކަތް ކޮށްގެން މަގު ނިންމަން ނަމަވެސް އެކަމުގައި ބައެއް ދަތިތައް ހުރިކަން ބަޔާނުގައި ފާހަގަކޮށްފައިވެ އެވެ. އެގޮތުން, ހިދުމަތްތައް އަޕްގްރޭޑު ކުރުމަށް ބޭނުންވާ ބައެއް ވަސީލަތްތައް ނުލިބި ހުރިކަން ފާހަގަކޮށްފައިވެ އެވެ.
"އަދި އެ މަސައްކަތް ހުއްޓާނުލާ ކުރިއަށް ގެންދެވެން ދެން އަމީނީ މަގުގެ މަސައްކަތް މަޑުޖައްސާލުމަށް މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން އެދިފައިވާތީ އެވެ." އާރްޑީސީން ބުނެފައިވެ އެވެ.
އާރްޑީސީން ބުނެފައިވާ ގޮތުގައި މަގުގެ މަސައްކަތް ކުރަމުން އަންނަނީ ދެ ފިޔަވައްސަކަށް ބަހާލައިގެންނެވެ. އެގޮތުން, ފުރަތަމަ ތާރު އަޅަން ފަށާނީ ބިލަބޮންގް ހައި ސުކޫލާ ހަމައަށް މަގު ހެދުމަށް ފަހު ކަމަށާއި މިހާރު ބަންދުކޮށްފައި އޮތް ހިސާބުގައި ތާރު އެޅުން ނޫން ހުރިހާ މަަސައްކަތެއް ކޮށް ނިމިފައިވާ ކަމަށް ބުނެފައިވެ އެވެ.
