އޮސްޓްރޭލިއާގެ ސިޑްނީގެ ސްކޫލެއްގައި ހެދި ސައިންސް އެކްސްޕެރިމެންޓެއް ފެއިލްވެ ކުދިންތަކަކަށް އަނިޔާވެއްޖެ އެވެ.
ރިޕޯޓުތައް ބުނާ ގޮތުން ސީރިއަސް ޒަހަމްތަކެއް ލިބުނު ދެ ކުދިން އެމްބިއުލާންސްގައި ހޮސްޕިޓަލަށް ގެންދިޔަ އެވެ. އެ ކުދިންގެ ހަށިގަނޑުން ބައެއް ފިހިފައިވާ ކަމަށް ބެލެވެ އެވެ. އިތުރު ނުވަ ކުދިންނަށް ކުދި އަނިޔާތަކެއް ލިބުނެވެ.
9ނިއުސްއިން ރިޕޯޓުކުރި ގޮތުގައި އެކްސްޕެރިމެންޓުގައި ބޭނުން ކުރީ ސޯޑިއަމް ބައިކާބޮނޭޓް އަދި މެތިލޭޓެޑް ސްޕިރިޓްސް އެވެ.
ހާދިސާ ހިނގުމާ އެކު ހެލިކޮޕްޓަރުތަކާއި ޕެރެމެޑިކް އަދި އަލިފާން ނިއްވާ ލޮރީތައް މޭންލީ ވެސްޓް ޕަބްލިކް ސްކޫލް ކައިރީގައި ހަރަކާތްތެރިވި އެވެ.
ބެލެވޭ ގޮތުގައި އެ ހާދިސާ ހިނގީ ވައި ގަދަވުމުގެ ސަބަބުން ބައެއް ކެމިކަލްތައް ބުރައިގެން ގޮސްގެންނެވެ. އަނިޔާވީ އުމުރުން 10 އަހަރާއި 11 އަހަރުގެ ކުދިންނަށެވެ. އެ ކުދިންނަށް އެކްސްޕެރިމެންޓުގައި އެހީވުމަށް އުޅުނު ޓީޗަރަކަށް ކުދި އަނިޔާތައް ލިބުނެވެ.
ސޯޑިއަމް ބައިކާބޮނޭޓް ނުވަތަ ބޭކިން ސޯޑާ އާއި މެތިލޭޓެޑް ސްޕިރިޓްސް ބޭނުންކޮށްގެން ސްކޫލްތަކުގައި އާއްމުކޮށް ހަދާ އެއް ސައިންސް އެކްސްޕެރިމެންޓުގެ ނަމަކީ ކާބަން ޝުގާ ސްނޭކެވެ.
އެހެން ނަމަަވެސް، ހާދިސާ ހިނގަން މެދުވެރިވި އިރު އެ ކުދިން ހެދީ ކޮން އެކްސްޕެރިމެންޓެއް ކަމެއް ސާފެއް ނޫނެވެ.
