އެމްއެމްޕީއާރުސީއާއި ކޮޒްމޯ ޓުރެވެލްއާ ގުޅިގެން ގަތަރާއި މެދުއިރުމަތީގެ ގައުމުތަކަށް ރާއްޖެ އިޝްތިހާރު ކުރުމަށް ހައިބުރިޑް މާކެޓިން ކެމްޕޭނެއް ފަށައިފި އެވެ.
އަންނަ މާޗު މަހުގެ ނިޔަލަށް ކުރިއަށް ގެންދާ އެ ކެމްޕޭނުގައި ޖިއޮގުރަފިކަލް ގޮތުން ރާއްޖެއަށް ލިބިފައިވާ ހާއްސަ ސިފަތަކާއި ރާއްޖެއަށް ޒިޔާރަތް ކުރާ ފަރާތްތަކަށް ދޭ ހިދުމަތްތަކުގެ އިތުރުން ރާއްޖޭގައި ޗުއްޓީ ހޭދަ ކުރަން އަންނަ ފަރާތްތަކަށް ތަޖުރިބާ ކޮށްލަން ލިބޭނެ ކަންކަމަށް އަލި އަޅުވާލާނެ ކަމަށް އެމްއެމްޕީއާރުސީން ބުނެ އެވެ.
އޮންލައިންކޮށް އަދި އޮފްލައިންކޮށް ވެސް ކުރިއަށް ގެންދިއުމަށް ހަމަޖެހިފައިވާ އެ ކެމްޕޭނުގެ ދަށުން ކޮޒްމޯ ޓުރެވެލްގެ ވެބްސައިޓާއި ގޫގުލް ޑިސްޕްލޭ ނެޓުވޯކުގެ އިތުރުން ޔޫޓިއުބު ޗެނަލް މެދުވެރިކޮށް ރާއްޖެއާ ބެހޭ މައުލޫމާތު މެދުއިރުމަތީގެ ގައުމުތަކަށް ފޯރުކޮށްދޭނެ ކަމަށް އެމްއެމްޕީއާރުސީން ބުންޏެވެ.
އޭގެ އިތުރުން، ކޮޒްމޯ ޓުރެވެލްގެ ޑޭޓާބޭސް މެދުވެރިކޮށް ރާއްޖެއާ ބެހޭ މައުލޫމާތު ހިމެނޭ އެސްއެމްއެސްއާއި އީމެއިލް ފޮނުވުމުގެ އިތުރުން މެދުއިރުމައްޗާއި ގަތަރުގައި ހުންނަ އެ ކުންފުނީގެ ރީޓެއިލް އައުޓުލެތުތަކުގެ އިސްކުރީނުތަކުގައި ވެސް ރާއްޖޭގެ އިޝްތިހާރުތައް އަޅުވާނެ ކަމަށް އެމްއެމްޕީއާރުސީން ބުނެ އެވެ.
އެ ކެމްޕޭނުގައި ގާތްގަނޑަކަށް 1.1 މިލިއަން މީހުންނަށް ރާއްޖެއާ ބެހޭ މައުލޫމާތު ކޮންމެވެސް ސިފައެއްގައި ފޯރުކޮށްދެވޭނެ ކަމަށް އެމްއެމްޕީއާރުސީން ލަފާކޮށްފައިވެ އެވެ.
ކޮޒްމޯ ޓުރެވެލްއަކީ މިނިވަން އަދި ކޯޕަރޭޓު ފަތުރުވެރިންނަށް ރެޑީ މޭޑު ޕެކޭޖުތަކުގެ އިތުރުން ކަސްޓަމައިޒްޑު ޓުރެވެލް ޕެކޭޖުތައް ވެސް ވިއްކާ ޓުރެވެލް މެނޭޖުމަންޓު ކުންފުންޏެކެވެ. އެ ކުންފުނިން ދޭ ހިދުމަތްތަކުގެ ތެރޭގައި ޓިކެޓިންއާއި އިންބައުންޑު އަދި އައުޓުބައުންޑު ހޮޓެލް ބުކިން ހިދުމަތުގެ އިތުރުން ވިސާ ހަމަޖައްސައިދިނުމާއި ދަތުރު ކުރާ މަންޒިލުގައި ތަފާތު ޕުރޮގުރާމުތައް ހމަޖައްސައިދިނުން ހިމެނެ އެވެ. މެދުއިރުމައްޗާއި އިންޑިއާގައި އެކަނި ވެސް ކޮޒްމޯ ޓުރެވެލްއިން ޖުމްލަ 73 ގޮފި ހިންގަ އެވެ.
މިދިޔަ އަހަރު މެދުއިރުމަތީގެ ގައުމުތަކުން ރާއްޖެއަށް ޒިޔާރަތް ކުރީ 100،494 ފަތުރުވެރިންނެވެ. އޭގެތެރެއިން 6060 މީހުންނަކީ ގަތަރުން އައި މީހުންނެވެ.
އެމްއެމްޕީއާރުސީން ބުނީ މެދުއިރުމަތީގެ ގައުމުތަކުން ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު އިތުރު ކުރުމަށްޓަކައި އެމާކެޓަށް ހާއްސަކޮށްގެން މިދިޔަ އަހަރު ވެސް ތަފާތު ކެމްޕޭނުތައް ކުރިއަށް ގެންދިޔަ ކަމަށާއި މިއަހަރުގެ ކުރިއަށް އޮތް ތަނުގައި ވެސް އިތުރު ކެމްޕޭނުތައް އެ ސަރަހައްދަށް އަމާޒު ކޮށްގެން ކުރިއަށް ގެންދިއުމަށް ނިންމާފައިވާ ކަމަށެވެ.
