ދޯހާ، ގަތަރު (ނޮވެމްބަރު 21) - ގަތަރުގައި ރޭ ފެށި ފީފާ ވޯލްޑް ކަޕް ފުޓްބޯޅަ މުބާރާތުގައި އިންގްލެންޑް ކުޅޭ ފުރަތަމަ މެޗުގައި މިއަދު އިރާނާ ދެކޮޅަށް ކުޅޭ މެޗުގެ ކުރިން އެ ގައުމުގައި ހިނގާ ސިޔާސީ ކަންތައްތަކުގެ ވާހަކަ ނުދައްކާނެ ކަމަށް އިނގިރޭސި ކޯޗު ގަރެތު ސައުތުގޭޓް ބުނެފި އެވެ.
ސައުތުގޭޓް ބުނީ މުބާރާތަށް އޭނާގެ "ސިކުނޑި ހުސްކޮށްގެން ހުރި ވިސްނުމަކީ" އިންގްލެންޑްގެ އުންމީދުތަކާ އެއްގޮތަށް ކުރިއަށް ގޮސް ކާމިޔާބު ހޯދުމަށް ކަމަށެވެ.
އިރާންގައި އަންހެނުންގެ ހައްގުތައް ރައްކާތެރިކުރުމަށް ގޮވާލާ ގިނަ މުޒާހަރާތަކެއް ފަށާފައިވަނީ މިދިޔަ ސެޕްޓެމްބަރު މަހު އިރާންގެ 22 އަހަރުގެ އަންހެން ކުއްޖަކު، ފުލުހުންގެ ބެލުމުގެ ދަށުގައި ހުއްޓައި މަރުވުމުންނެވެ. އެ މައްސަލައިގައި އިރާންގައި ހިނގަން ފެށި ހަމަނުޖެހުންތަކާ ހެދި އެ ގައުމު މި ފަހަރުގެ ވޯލްޑް ކަޕުން ބޭރުކުރަން ވެސް ގޮވާލި އެވެ. އެކަމަކު، ފީފާ އިން ނިންމީ އެ ފަދަ ކަމެއް ކުރަން ޖެހޭ ހާލަތެއް ނެތް ކަމަށެވެ.
މިއަދުގެ މެޗުގެ ކުރިން އިނގިރޭސި ކޯޗު ސައުތުގޭޓާ އަމާޒުވި ސުވާލަކީ އިރާންގެ ހާލަތާ މެދު ދެކެނީ ކިހިނެއްތޯ އެވެ.
"ފުރަތަމަ ކަމަކަށް އަހަރެން ސިޔާސީ ވާހަކައެއް ނުދައްކާނަން. ދެން، އަހަންނަށް ވިސްނޭ ގޮތުގައި ތި ދައްކާ ވާހަަކަތަކުގެ ފުރިހަމަ މައުލޫމާތެއް އަހަންނަށް ލިބިފައެއް ނެތް. އެހެންވީމަ ތިއީ އަހަރެން ވާހަކަ ދައްކަން ޖެހޭ ކަމެއް ކަމަށް ނުދެެކެން،" ސައުތުގޭޓް ބުންޏެވެ.
އިންގްލެންޑުން ވަނީ އެންމެ ފަހުން ބޭއްވި ވޯލްޑް ކަޕްގެ ސެމީގައި ކުޅެ، މިދިޔަ އަހަރުގެ ޔޫރޯ ފުޓްބޯޅަ މުބާރާތުގެ ފައިނަލުގައި ވެސް ވާދަކޮށްފަ އެވެ. އެ ތަޖުރިބާތަކުގެ އަލީގައި އިންގްލެންޑުން މި ފަހަރުގެ ވޯލްޑް ކަޕްގައި ކާމިޔާބެއް ހޯދަން ނުކުންނައިރު، އޮތް ގޮންޖެހުމަކީ އިންގްލެންޑް އެންމެ ފަހުން ކުޅުނު މެޗުތަކުގެ ނަތީޖާ ދަށްވުމެވެ.
އެންމެ ފަހުން ކުޅުނު ނޭޝަންސް ލީގުގެ މެޗުތަކުން އިންގްލެންޑްގެ ނަތީޖާތަށް ގޯސްވެފައިވާތީ، މި ފަހަރުގެ ވޯލްޑް ކަޕަށް ނުކުންނައިރު، އެންމެ ޕްރެޝަރު ބޮޑުވާނެ ޓީމުތަކުގެ ތެރޭގައި އިންގްލެންޑް ހިމެނެ އެވެ.
ސައުތުގޭޓް ބުނީ ހުރި ކަންބޮޑުވުންތަކަށް ހައްލު ހޯދޭނެ އޮތީ އެންމެ ގޮތެއް ކަމަށެވެ.
"އަހަރެމެންނަށް ތި ސުވާލުގެ ޖަވާބު ދެވޭނީ ދަނޑުމަތީގައި. އެއީ ގިނަ ލަނޑުތަކެއް ޖަހައި ނަތީޖާ ނެރެގެން،" ސައުތުގޭޓް ބުންޏެވެ. "ފުރަތަމަ ކަމަކަށް ހުރި ކޯޗަކު ކުރަން ޖެހޭނެ ކަމަކީ ޓީމަށް މޮޅުވެވޭނެ ހުރިހާ ކަމެއް ބުނެދިނުން. ދެން ކުރަން ޖެހޭނެ ކަަމަކީ، ސަޕޯޓަރުން ގަޔާވާ ކަަހަލަ ކުޅުމަކާ އެކު މޮޅުވެވޭތޯ ކުރަންޖެހޭ ކަންކަން ކުރުން،"
ސައުތުގޭޓް ވަނީ އިންގްލެންޑްގެ ސަޕޯޓަރުންނަށް އަމާޒުކޮށް މެސެޖެއް ވެސް ދީފަ އެވެ.
"މި ވަގުތަށް ބަލާއިރު އޮތް ޗެލެންޖަކީ އަހަރެމެންގެ ސަޕޯޓަރުން ހަނދާނުގައި ހުންނާނެ ވަރުގެ މުބާރާތެއް ދެއްކުން. އަހަރެމެން މި ވަނީ އެންމެ ފަހުން ދެ މުބާރާތުގައި ސަޕޯޓަރުންގެ އުންމީދުތައް މައްޗަށް ޖައްސާލާފައި،" ސައުތުގޭޓް ބުންޏެވެ.
އިންގްލެންޑުން މިރޭ އިރާނާ ދެކޮޅަށް ކުޅޭ މެޗުގެ ކުރިން ކަކޫޖައްސައިގެން އިށީނދެ، ނަސްލީ ތަފާތު ކުރުމާ (ރޭސިޒަމްއާ) ދެކޮޅަށް އަޑުއުފުލަން ވަނީ ނިންމައިފަ އެވެ. އިންގްލެންޑުން އެންމެ ފަހުން ކުޅުނު މެޗުތަކުގައި އެކަން ނުކުރި ނަމަވެސް މިއަދު އިރާނާ ދެކޮޅަށް ރޭސިޒަމްއާ ދެކޮޅަށް މި ހަރަކާތް ކުރިއަށްގެންދާނެ އެވެ.
ސައުތުގޭޓް ބުނީ ދުނިޔޭގެ ގިނަ ބަޔަކު ބަލާ މި ފަދަ މުބާރާތެއްގައި އިންގްލެންޑުން މި ފަދަ ކަންކަމުގައި ސާބިތުކޮށް ތިބިކަން ދައްކުވައި ދޭން ބޭނުންވާ ކަމަށެެވެ.
"މިއީ މުޅި ދުނިޔެ އަށް ދޭން ބޭނުންވާ މެސެޖެއް،" ސައުތުގޭޓް ބުންޏެވެ.
އޭގެ އިތުރުން، އެއް ޖިންސުގެ ގުޅުން ޕްރޮމޯޓްކުރާ އެލްޖީބީޓީ ކޮމިއުނިޓީ އަށް ހާއްސަ ކުލަތައް ރަމްޒުކޮށްދޭ ކެޕްޓަން ބޭންޑް ބޭނުންކުރަން އިންގްލެންޑްގެ ކެޕްޓަން، ހެރީ ކޭން ވަނީ ނިންމައިފަ އެވެ. ފީފާ އިން އެކަން އެ ގޮތަށް ނުކުރަން އަންގާފައިވީ ނަމަވެސް، އިންގްލެންޑުން ނިންމާފައިވަނީ އެ ބޭންޑް ބޭނުންކުރުމަށް ކަމަށް ރިޕޯޓްތައް ބުނެ އެވެ.
އިންގްލެންޑާއި އިރާން ކުޅޭ މެޗު ފަށާނީ މިއަދު އިރުއޮއްސި 6 ޖަހާއިރު އެވެ.
