ބާލިން (ޖުލައި 15) - މިއީ އޭނާ އިންގްލެންޑްގެ ކޯޗެއްގެ ގޮތުގައި ހުންނާނެތޯ ނޫނީ މުސްތަގުބަލާ މެދު ވާހަކަ ދައްކަން ރަނގަޅު ވަގުތެއް ނޫން ކަމަށް އިންގްލެންޑްގެ ކޯޗު ގަރެތު ސައުތުގޭޓް ބުނެފި އެވެ.
ފާއިތުވި އަށް އަހަރު އިންގްލެންޑް ކޯޗަކަށް ހުރި ސައުތުގޭޓް ވަނީ ރޭ ޖެހިޖެހިގެން ދެ ވަނަ ފަހަރަށް ޔޫރޯ ފުޓްބޯޅަ މުބާރާތުގެ ފައިނަލުން ބަލިވެފަ އެވެ. އަމިއްލަ ގައުމުގައި ކުޅުނު 2020 ވަނަ އަހަރުގެ ޔޫރޯ ފައިނަލުން އިިޓަލީ އަތުން ޕެނަލްޓީ ޖަހައިގެން ބަލިވި އިންގްލެންޑް ރޭ، ޖަރުމަނުގެ ބާލިންގައި މި ފަހަރުގެ ޔޫރޯގެ ފައިނަލުން ސްޕެއިން އަތުން ބަލިވީ 2-1 އިންނެެވެ.
އަންނަ ޑިސެމްބަރު މަހުގެ ނިޔަލަށް އިންގްލެންޑާ އެކު ކޮންޓްރެކްޓް ހަދާފައިވާ ސައުތުގޭޓް، 53، ގެ މުސްތަގުބަލާ ބެހޭގޮތުން، ސުވާލުކުރީ ބީބީސީ އިންނެެވެ. އޭނާ އެ އަށް ޖަވާބު ދޭން ބޭނުމެއް ނުވި އެވެ.
"މިއީ ތި ވާހަކަ ދައްކަން އެންމެ ރަނގަޅު ވަގުތެއް ނޫން. ތި ކަމާ ވާހަކަ ދައްކަން ޖެހޭ ރަނގަޅު މީހުންނާ އެކު އެކަން ކުރުމުގެ ކުރިން އަހަރެން އަމިއްލަ ނަފްސަށް ވަގުތު ކޮޅެއް ދޭން އެބަޖެހޭ،" ސައުތުގޭޓް ބުންޏެވެ.
"ފައިނަލަށް ދިއުމަކީ ޝަރަފެއް. އެކަަމަކު، މިހެން ހަނި ފަރަގަކުން ބަލިވެގެން ދާން ޖެހުން މިއީ ހިތްދަތިކަމެއް،"
ސައުތުގޭޓް ބުނީ ފައިނަލަށް ދެވުމުން އެ ކަމުގެ ކްރެޑިޓް ކުޅުންތެރިންނަށް ހައްގުވާނެ ކަމަށާއި އެކަމަކު، ގިނަ ބަޔަކު ގަބޫލުކުރާނީ ފައިނަލުގައި ކާމިޔާބު ހޯދަން ޖެހޭނެ ކަމަށް ކަމަށެވެ. އަދި ފައިނަލުގައި އިންގްލެންޑަށް ނަތީޖާ ނުނެރެވުނީ، ސްޕެއިނުން މެޗުގެ ބޮޑުބައި ކޮންޓްރޯލް ކޮށްގެންކުޅެ، މުހިންމު ވަގުތުތަކުގައި ތަފާތު ދައްކައިގެން ކަމަށް ސައުތުގޭޓް ވަނީ ބުނެފަ އެވެ.
ފައިނަލް މެޗުގެ ކުރިން އިނގިރޭސި ބައެއް މީޑިއާތަކުން ރިޕޯޓްކޮށްފައިވާ ގޮތުގައި، ފައިނަލުގައި ކޮންމެ ނަތީޖާއެއް ނުކުތް ނަމަވެސް، ސައުތުގޭޓާ އެކު، 2026 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް ކޮންޓްރެކްޓް އާ ކުރަން އިންގްލެންޑުން އޮތީ ތައްޔާރަށެވެ. އެކަމަކު، ބައެއް މީޑިއާތަކުން ރިޕޯޓްކޮށްފައިވަނީ، ޔޫރޯ ނިމުމުން ސައުތުގޭޓްގެ މަސައްކަތުގެ ޓެކްނިކަލް ރިވިއު އެއް ހެދުމަށް ފަހު މުސްތަގުބަލާ މެދު ގޮތެއް ނިންމާނެ ކަމަށެވެ.
