މާލޭގައި މަސްތުވާތަކެއްޗާ އެކު ޕާޓީ ކުރަން ތިއްބައި ހައްޔަރުކުރި 12 މީހުންގެ ތެރޭގައި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރާ ފުލުހެއް ހިމެނޭ ކަން އެނގިއްޖެ އެވެ.
"އަދަދު" އަށް އެނގިފައިވާ ގޮތުގައި އެއީ ފުލުހުން ހޯދާ މަސްތުވާތަކެތީގެ ސްޓޮކް ބެލެހެއްޓުމާ ހަވާލުވެފައި ހުންނަ އޮފިސަރު ހަސަން ޝުޖާއު އެވެ. އޭނާ ފުލުހުންގެ ހިދުމަތާ ގުޅިފައިވަނީ މީގެ 16 އަހަރު ކުރިންނެވެ.
އެއީ ޑްރަގް އެންފޯސްމަންޓް ޑިޕާޓްމަންޓްގައި މަސައްކަތް ކުރާ ފުލުހެއް ކަން ކޮމިޝަނާ އޮފް ޕޮލިސް މުހައްމަދު ހަމީދު ވެސް ވަނީ "އަދަދު"އަށް ކަށަވަރުކޮށް ދެއްވާފަ އެވެ.
"އޭނަގެ މައްޗަށް މިކަހަލަ ތުހުމަތުތަކެއް ކުރެވިގެންދާތާ ދުވަސްކޮޅެއް ފަހުން މައްސަލަ ބަލަމުން ދަނިކޮށް މި މައްސަަލައާ ގުޅިގެން ހައްޔަރު ކުރެވުނީ،" ހަމީދު ވިދާޅުވި އެވެ.
މަސްތުވާތަކެތީގެ ވިޔަފާރި ކުރުމާއި ބޭނުން ކުރުމުގެ މައްސަލަތަކުގައި، ފުލުހަކަށް ވީތީ އިސްތިސްނާއެއް ނުވާނެ ކަމަށް ހަމީދު ވިދާޅުވި އެވެ. އަދި އޭނައާ މެދު ތުހުމަތު ކުރެވޭ މައްސަލައާ ގުޅިގެން އަޅަން ޖެހޭ ފިޔަވަޅެއް އަޅާނެ ކަމުގެ ޔަގީންކަން ވެސް ސީޕީ ދެއްވި އެވެ.
މަސްތުވާތަކެއްޗާ ދެކޮޅަށް ފުލުހުން ހިންގި އޮޕަރޭޝަންގެ ތެރެއިން ހައްޔަރުކޮށްފައި ވަނީ އަށް ފިރިހެނަކާއި ހަތަރު އަންހެނެކެވެ. މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
އެނގިފައިވާ ގޮތުގައި ފުލުހުން ހައްޔަރު ކުރި މީހުންގެ ތެރޭގައި ފިލްމު ކުޅޭ ބައެއް މީހުންނާއި ސޯޝަލް މީޑިއާގައި މަޝްހޫރު ބައެއް މީހުން ހިމެނެ އެވެ.
