އަންކާރާ، ތުރުކީ (ނޮވެމްބަރު 12) - ހަތަރު އަހަރުގެ މެދުކެނޑުމަކަށް ފަހު ތުރުކީއިން އިޒްރޭލަށް ހާއްސަ ސަަފީރަކު އަލުން ކަނޑައަޅައިފި އެވެ.
އާ ސަަފީރަކަށް އައްޔަނު ކުރީ 2010 އިން 2014 އަށް ތުރުކީއިން އިޒްރޭލަށް ހާއްސަ ކޮންސުލް ޖެނެރަލްކަން ކުރައްވާފައިވާ ސަކިރް އޮޒްކާން ތޮރުންލާރް އެވެ.
އިޒްރޭލަށް ހާއްސަ ސަފީރު ތުރުކީއިން އަނބުރާ ގެންދިޔައީ މޭ 2018 ގައި ފަލަސްތީނުގެ ގިނަ ބަޔަކަށް އިޒްރޭލް ސިފައިން ހަމަލާދީ މަރާލުމުންނެވެ.
އޭގެ ފަހުން ވެސް ރައީސް ތައްޔިބް އުރުދުގާން ގެންދެވީ އިޒްރޭލުން ފަލަސްތީން ރައްޔިތުންނާ މެދު ގެންގުޅޭ ސިޔާސަތަށް ފާޑުކިޔުއްވަމުންނެވެ.
އެކަމަކު އޭރު ވެސް ބޮޑު ވަޒީރުކަމުގައި ހުންނެވި ބެންޖަމިން ނަތަންޔާހޫ އަލުން އިންތިހާބު ކާމިޔާބު ކުރެއްވުމުން އުރުދުގާން ވަނީ މަރުހަބާ ދަންނަވައިފި އެވެ.
ރިޕޯޓުތައް ބުނާ ގޮތުން ހަތަރު އަހަރަށް ފަހު ތުރުކީއިން އިޒްރޭލަށް ހާއްސަ ސަފީރަކު ކަނޑައެޅުމުން ބެލެވެނީ ކުރިއަށް އޮތް ތަނުގައި ދެ ގައުމުގެ ގުޅުން ރަނގަޅުވަމުން ދާނެ ކަމަށެވެ.
