ރާއްޖޭގެ ޓެކްސް ނިޒާމަށް ހަރުދަނާ ބަދަލުތަކެއް ގެނައުމުގެ އަމާޒުގައި ޓެކްސް ފޯ ސަސްޓެއިނަބަލް ޑިވެލޮޕްމަންޓު ގޯލްސް (އެސްޑީޖީ) ގެ ކަންޓްރީ އެންގޭޖުމަންޓު ޕްލޭނުގައި ފިނޭންސް މިނިސްޓްރީ އާއި ޔޫއެންޑީޕީ އަދި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިއަދު ސޮއިކޮށްފި އެވެ.
މި އެއްބަސްވުމުގައި ސޮއިކުރުމަށް މިއަދު މީރާ، ޔޫއެންޑީޕީ އަދި ފިނޭންސް މިނިސްޓްރީގެ ބޭފުޅުންނާ އެކު ހާއްްސަ ރަސްމިއްޔާތެއް ވަނީ ބާއްވާފަ އެވެ. މިއީ ޒަމާނާ އެކު ރާއްޖޭގެ ޓެކްސް ނިޒާމަށް ކުރިމަތިވަމުންދާ ގޮންޖެހުންތަކުން އަރައިގަތުމަށް މުހިންމު ޕްރޮގްރާމެއް ކަމަށް މީރާއިން ބުނެ އެވެ.
އެގޮތުން، ބައިނަލްއަގްވާމީ ޑިޖިޓަލް އިކޮނޮމީގެ ތެރެއިން ޓެކްސް ނިޒާމަށް އަންނަ ގޮންޖެހުންތަކާއި، ވަކި ޖިންސަކަށް އަމާޒުކޮށް ނަގާ ޓެކުހާއި، ގާނޫނާއި ގަވާއިދުތަކުގެ ބޭރުން ހިންގާ ވިޔަފާރިތައް ޓެކްސް ނިޒާމަށް ވެއްދުމުގައި ހުރި ގޮންޖެހުންތަކާ ގުޅޭގޮތުން މި ރަސްމިއްޔާތުގައި ކޮމިޝަނަރު ޖެނެރަލް އޮފް ޓެކްސޭޝަން ވާހަކަ ދެއްކެވި އެވެ.
ހަމައެހެންމެ، ޓެކްސް ނިޒާމު ހަރުދަނާ ކުރުމަށާއި ރާއްޖޭގެ އިގްތިސާދީ ލަނޑުދަނޑިތައް ހާސިލުކުރުމަށް ޔޫއެންޑީޕީން ވަމުންދާ އެހީތެރިކަން އޭނާ ފާހަގަކުރެއްވި އެވެ.
މި ޕްރޮގްރާމްގެ ތެރެއިން ރާއްޖޭގެ ޓެކްސް ނިޒާމާ ގުޅުން ހުރި އިދާރާތަކަށް ބަދަލުތައް ގެނައުމަށް ވަނީ ނިންމާފަ އެވެ. މިއީ ދެ އަހަރު ދުވަހުގެ މުއްދަތަށް ކުރިއަށްގެންދިޔުމަށް ނިންމާފައިވާ ޕްރޮގްރާމެކެވެ.
މީރާއިން މި ޕްރޮގްރާމްގެ ތެރެއިން އަމާޒުކުރަނީ ޑޭޓާ ގަވަނެންސް ފްރޭމްވޯކެއްގެ ތެރެއިން ޓެކްސްގެ މަސައްކަތްތައް ޑިޖިޓަލް ކުރުމަށާއި އެންޓަޕްރައިޒް ރިސްކު މެނޭޖުމަންޓު ފްރޭމްވޯކަކާއި ކޮވިޑް-19 ފަދަ އިމަޖެންސީ ހާލަތެއް ދިމާވެއްޖެނަމަ ހުއްޓުމެއް ނެތި އޮޕަރޭޝަންތައް ކުރިއަށްގެންދެވޭނެ ޕްލޭނެއް އެކުލަވާލުމަށެވެ.
