މޯލްޑިވްސް އިސްލާމިކް ބޭންކުގެ އުޖާލާ ދިރިއުޅުން ފެސިލިޓީ މެދުވެރިކޮށް ސްޓެލްކޯ ސޭލްސް ސެންޓަރުން މުދާ ގަނެވޭނެ ގޮތް ހަދައިފި އެވެ.
ސްޓެލްކޯއިން މައުލޫމާތު ދިން ގޮތުގައި ކަރަންޓުލުމަށް ބޭނުންވާ ހުރިހާ ސާމާނާއި ކަރަންޓު ވައިރުކުރުމަށް ބޭނުންވާ އާލާތްތަކުގެ އިތުރުން ކަރަންޓާގުޅޭ ތަފާތު ބްރޭންޑުތަކުގެ އުފެއްދުންތައް ވެސް އެ ސްކީމްގެ ދަށުން ގަނެވޭނެ އެވެ.
އެމްއައިބީގެ އުޖާލާ ދިރިއުޅުން ސްކީމަކީ މަހުންމަހަށް ބަހާލައިގެން ފައިސާ ދައްކަމުން ގޮސް ހަލާސްކުރާ ގޮތަށް، ދިރިއުޅުމުގެ ބޭނުންތަކާއި މަސައްކަތްތަކަށް ބޭނުންވާ ތަކެތި ނަގައިދޭ ސްކީމެކެވެ. އެ ސްކީމުގެ ދަށުން އެމްއައިބީން ގަބޫލުކުރާ ތަނެއްގައި ވަޒީފާ އަދާކުރާ 18 އަހަރުން މަތީގެ ކޮންމެ ދިވެއްސަކަށް ވެސް މުދާ ގަނެވޭނެ އެވެ.
ކަރަންޓާ ގުޅޭ ހުރިހާ ސާމާނެއް އުޖާލާ ދިރިއުޅުން ސްކީމުގެ ދަށުން ގަނެވޭނެ
އެއްފަހަރާ ފައިސާ ދައްކަން ދަތިވާ ފަރާތްތަކަށް ގިނަ ފަސޭހަތައް ލިބޭ އެ ސްކީމުގެ ދަށުން ގިނަވެގެން ނެގޭނީ 400،000ރ. ގެ މުދަލެވެ. އެގޮތުން ލިބޭ ފައިސާގެ ލިމިޓު، އެ ލިބޭ ތާރީހުން ފެށިގެން ހަ މަސް ވަންދެން ބޭނުންކުރެވޭނެ އެވެ.
ފައިނޭންސިން އެހެން ސްކީމްތަކާ ހިލާފަށް އުޖާލާ ދިރިއުޅުން ސްކީމުގައި ފައިސާ ދައްކަން ބޭނުންވާ މުއްދަތު 18 މަހާއި 48 މަހާ ދެމެދުގެ މުއްދަތަކަށް ބަހާލެވޭނެ އެވެ. އެ ސްކީމުގެ ދަށުން މުދާ ގަތުމަށް ހަމައެކަނި ގަންނަން ބޭނުންވާ އެއްޗެއްގެ ކޯޓޭޝަން އެ ބޭންކަށް ހުށަހެޅުމުން، އެ ދުވަހުން ދުވަހަށް މުދާ ލިބޭނެ އެވެ.
ސްޓެލްކޯ ސޭލްސް ސެންޓަރަކީ ކަސްޓަމަރުންނަށް ކަރަންޓާ ގުޅުންހުރި ކޮލެޓީ ސާމާނު ލިބޭނެ މަގު ފަހިކޮށްދިނުމަށް ހުޅުވި ސްޓެލްކޯގެ ފިހާރައެކެވެ. އެ ތަނުން ކަރަންޓާ ގުޅޭ ސާމާނުގެ އިތުރުން ކަރަންޓާ ގުޅޭ ހުރިހާ ހިދުމަތެއް ވެސް ފޯރުކޮށް ދެއެވެ.
