އަންނަ އަހަރުގެ ޖެނުއަރީ އިންޓޭކަށް އެޕްލިކޭޝަން ހުށަހެޅުމުގެ ފުރުސަތު ވިލާ ކޮލެޖުން ހުޅުވާލައިފި އެވެ.
ޖެނުއަރީ މަހު ކިޔެވުން ފަށާ އިންޓޭކުގައި ތަފާތު ދާއިރާތަކުން ސެޓިފިކެޓު ލެވެލް އެކަކުން ފެށިގެން މާސްޓާސް ޑިގުރީއާ ހަމައަށް ކިޔެވޭ ޖުމްލަ 139 ކޯހެއްގައި ބައިވެރި ވުމުގެ ފުރުސަތު ހުޅުވާލާފައި ވެއެވެ.
އެގޮތުން 16 މާސްޓާސް ޕުރޮގުރާމާއި، ނުވަ ޕޯސްޓު ގުރެޖުއޭޓު ޑިޕްލޮމާ/ސެޓިފިކެޓް ޕުރޮގުރާމާއި، 38 ޑިގުރީ ޕުރޮގުރާމާއި، 29 ޑިޕްލޮމާ ޕުރޮގުރާމާއި، ސެޓިފިކެޓް ލެވެލް ހަތަރެއްގެ 17 ޕުރޮގުރާމަކާއި، ލެވެލް ތިނެއްގެ 16 ޕުރޮގުރާމަކާއި، ސެޓިފިކެޓު ދޭއްގެ ޕުރޮގުރާމެއް ހިމެނެ އެވެ.
މީގެ އިތުރުން އެކައުންޓިން ދާއިރާއިން ތައުލީމު ހާސިލު ކުރާ ދަރިވަރުންނަށް ހާއްސަކޮށްގެން ވިލާ ކޮލެޖުން ހިންގާ އޭސީސީއޭގެ ތަފާތު އެކި ފެންވަރުގެ ކޯސްތަކާއި އިނގިރޭސިވިލާތުގެ އޮކްސްފޯޑު ބުރޫކްސް ޔުނިވާސިޓީގެ ބެޗެލާސް އޮފް ސައިންސް އިން އެޕްލައިޑް އެކައުންޓިން ކޯހުގައި ބައިވެރިވުމުގެ ފުރުސަތު ވެސް ވަނީ ހުޅުވާލާފަ އެވެ.
އާ އިންޓޭކަށް އެޕްލިކޭޝަން ހުށަހެޅޭނެ އެންމެ ފަހު ތާރީހަކީ އަންނަ މަހުގެ 16، ވަނަ ދުވަހެވެ.
މާލޭގައި ހުންނަ ވިލާ ކޮލެޖުގެ ކެމްޕަސްގެ އިތުރުން ރާއްޖޭގެ އެކި ކަންކޮޅުގައި ހުންނަ ވިލާ ކޮލެޖުގެ ކެމްޕަސްތަކުން ވެސް މި ކޯސްތަކުގައި ބައިވެރިވެ ކިޔެވުމުގެ ފުރުސަތު ލިބޭނެ އެވެ.
ވިލާ ކޮލެޖުން ކިޔަވާ ދަރިވަރުން ކޯހަށް ދައްކަން ޖެހޭ ފައިސާ، މަހުންމަހަށް ބަހާލައިގެން ފަސޭހަކަމާ އެކު ދައްކަމުން ދެވޭނެ އެވެ. އޭގެއިތުރުން ސަރުކާރުގެ ހިލޭ ޑިގުރީ ޕުރޮގުރާމުގެ ދަށުން ކިޔެވުމުގެ ފުރުސަތު ވެސް ވިލާ ކޮލެޖުން ލިބެ އެވެ.
