ނިޔޯން، ސްވިޒަލެންޑް (ނޮވެމްބަރު 7) - ޔުއެފާ ޗެމްޕިއަންސް ލީގުގެ ގަދަ 16 ޓީމު ކުޅޭ ބުުރުގައި މިިދިޔަ އަހަރުގެ ފައިނަލުގައި ކުޅުނު ރެއާލް މެޑްރިޑާއި ލިވަޕޫލް ބައްދަލުކުރަން ޖެހިއްޖެ އެވެ.
ރެއާލުން ވަނީ މިދިޔަ ސީޒަނުގެ ފައިނަލުގައި ލިވަޕޫލް 1-0 އިން ބަލިކޮށް 14 ވަނަ ފަހަރަށް މުބާރާތުގެ ތަށި އުފުލާލައިފަ އެވެ. މީގެ ކުރިން 2018 ވަނަ އަހަރުގެ ފައިނަލުގައި ވެސް ލިވަޕޫލާ ކުޅެގެން ރެއާލް ވަނީ 3-1 އިން ލިވަޕޫލް އަތުން މޮޅުވެފަ އެވެ.
ޗެމްޕިއަންސް ލީގުގެ ނޮކައުޓް ބުރުގައި 2020/2021 ވަނަ އަހަރުގެ ސީޒަނުގެ ކުއާޓާ ފައިނަލުގައި ރެއާލުން ވަނީ ލިވަޕޫލް ކަޓުވާލައިފަ އެވެ. އެކަމަކު، 2008/2009 ވަނަ އަހަރުގެ ގަދަ 16 ބުރުގައި ލިވަޕޫލުން ވަނީ ރެއާލްގެ މައްޗަށް ބޮޑު މޮޅެއް ހޯދައިފަ އެވެ. އޭގެ ފަހުން، 2014/2015 ވަނަ ސީޒަނުގައި ރެއާލާއި ލިވަޕޫލް އޮތީ އެއް ގްރޫޕެއްގަ އެވެ. އެ ފަހަރު ދެ މެޗުން ވެސް މޮޅުވީ ރެއާލް އެވެ.
ޗެމްޕިއަންސް ލީގުގެ ގަދަ 16 ބުރުގެ މެޗުތައް ރޭވިފައިވާ ގޮތް.
މި ފަހަރުގެ ޗެމްޕިއަންސް ލީގުގެ ގަދަ 16 ބުރުގައި ދެން އެންމެ ފޯރިގަދަވާނެ ކަމަށް ބެލެވެނީ ފްރާންސްގެ ޗެމްޕިއަން ޕީއެސްޖީ އާއި ޖަރުމަނުގެ ޗެމްޕިއަން ބަޔާން މިއުނިކްގެ ކުރިމަތިލުމެވެ. ބަޔާނުން ހަަ ސީޒަނުގެ ތެރޭގައި ތިން ވަަނަ ފަހަރަށް ގްރޫޕް ސްޓޭޖުގެ ހުރިހާ މެޗަކުން މޮޅުވި މި ފަހަރުގެ، ޕީއެސްޖީއާ ދެކޮޅަށް ގަދަ 16 ބުރުގައި ކުޅެން ޖެހުމަކީ ޗެލެންޖެކެވެ.
ގަދަ 16 ބުރުގެ އެހެން މެޗުތަކަށް ބަލާއިރު، ޖަރުމަނުގެ އާރްބީ ލައިޕްޒިގު ކުޅޭނީ މެންޗެސްޓާ ސިޓީއާ އެވެ. މުޅިން އަލަށް ނޮކައުޓް ބުރުގައި ކުޅޭ ބެލްޖިއަމްގެ ކްލަބް ބްރޫޖުން ދެ ވަނަ ބުރުގައި ކުޅޭނީ ޕޯޗުގަލްގެ ބެންފީކާއާ އެވެ. ނުވަ އަހަރު ތެރޭ ފުރަތަމަ ފަހަރަށް ޗެމްޕިއަންސް ލީގުގެ ނޮކައުޓް ބުރުގައި ކުޅޭ އޭސީ މިލާނުން ދެ ވަނަ ބުރުގައި ކުޅޭނީ އެންޓޯނިއޯ ކޮންޓޭގެ ކޯޗުކަމުގައި ކުޅެމުން އަންނަ ޓޮޓެންހަމް ހޮޓްސްޕާސްއާ ދެކޮޅަށެވެ.
ޖަރުމަނުގެ އައިންޓްރަކްޓް ފްރޭންކްފާޓް ދެ ވަނަ ބުރުގައި ކުޅޭނީ އިޓަލީގެ ނަޕޯލީއާ އެވެ. އިންޓަ މިލާނުން ޖެހިޖެހިގެން ދެ ވަނަ އަހަރަކު ޗެމްޕިއަންސް ލީގުގެ ނޮކައުޓް ބުރުގައި ކުޅޭއިރު، އެ ޓީމު މި ފަހަރު ވާދަކުރާނީ ޕޯޓޯއާ އެވެ. ދެ ފަހަރު ޗެމްޕިއަންކަން ހޯދާފައިވާ ޗެލްސީން ނޮކައުޓް ބުރުގެ ފުރަތަމަ މެޗުގައި ކުޅޭނީ ޖަރުމަނުގެ ބޮރޫޝިއާ ޑޯޓްމަންޑާ އެވެ.
ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގެ މެޗުތައް އޮތީ އަންނަ ފެބްރުއަރީ މަހުގެ 14،15 އާއި 21،22ގަ އެވެ. ދެ ވަަނަ ލެގުގެ މެޗުތައް އޮންނާނީ މާޗް މަހުގެ 7،8 އާއި 14،15 ގަ އެވެ.
