މެޑްރިޑް (ނޮވެމްބަރު 3) - ޗެމްޕިއަންސް ލީގުގައި މިރޭ ސެލްޓިކް އަތުން 5-1 އިން ރެއާލް މެޑްރިޑް މޮޅުވި މެޗުގައި އެ ޓީމުގެ ކޯޗު ކާލޯ އަންޗެލޮޓީ މުބާރާތުގެ ތާރީހުގައި ހާއްސަ ރެކޯޑެއް މުގުރާލައިފި އެވެ.
މިއީ އަންޗެލޮޓީ ޗެމްޕިއަންސް ލީގުގައި ހޯދި 103 ވަނަ މޮޅެވެ. މީގެ ކުރިން ޗެމްޕިއަންސް ލީގުގައި އެންމެ ގިނަ މެޗުން މޮޅުވުމުގެ ރެކޯޑް އޮތީ މެންޗެސްޓާ ޔުނައިޓެޑްގެ ކުރީގެ ކޯޗު އަލެކްސް ފާގަސަން އަތުގަ އެވެ. ފާގަސަން ރެކޯޑް ހެދީ 102 މެޗުން މޮޅުވެގެންނެވެ.
އަންޗެލޮޓީ ޗެމްޕިއަންސް ލީގުގައި ކޯޗުކޮށްދިނީ ޔުވެންޓަސް، މިލާން، ޗެލްސީ، ރެއާލް، ނަޕޯލީ، ބަޔާން މިއުނިކް އަދި ޕީއެސްޖީ އެވެ. ހަވާލުވި ޓީމުތަކުގެ ތެރެއިން އަންޗެލޮޓީ ޗެމްޕިއަންްސް ލީގުގައި ވާދަނުކުރަނީ ރެޖިއާނާ އާއި އެވަޓަންއާ އެކު އެވެ.
އިޓަލީ އަށް އުފަން އަންޗެލޮޓީ އަކީ ޗެމްޕިއަންސް ލީގުގެ ތާރީހުގައި އެންމެ ކާމިޔާބު ކޯޗެވެ. އޭނާ ވަނީ ހަތަރު ފަހަރު (ރެއާލާ އެކު ދެ ފަަހަރު، އޭސީ މިލާނާ އެކު ދެ ފަހަރު) ޗެމްޕިއަންސް ލީގު ކާމިޔާބުކޮށްފަ އެވެ.
އަންޗެލޮޓީއާ އެންމެ ވާދަކުރަނީ ތިން ތަށްޓާ އެކު އޮތް ރެއާލްގެ ކުރީގެ ކޯޗު ޒިނެދިން ޒިދާން އާއި ލިވަޕޫލްގެ ކުރީގެ ކޯޗު ބޮބް ޕެއިސްލީ އެވެ. ޕެޕް ގާޑިއޯލާ އާއި ހޯސޭ މޮރީނިއޯ، ވިސެންޓޭ ޑެލް ބޮސްކޭ އަދި ފާގަސަން ވަނީ ދެ ފަހަރު ތަށި ހޯދައިފަ އެެވެ.
ރެއާލްގެ އަސެންސިއޯ ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: ގެޓީއިމޭޖަސް
ރެއާލުން މިރޭ އަމިއްލަ ދަނޑުގައި ކުޅުނު މެޗުގެ ފުރަތަމަ 21 މިނިޓް ތެރޭ ދެ ގޯލުގެ ލީޑެއް ނެގީ ދެ ޕެނަލްޓީން ޖެހި ގޯލުންނެވެ. ފުރަތަމަ ޕެނަލްޓީ ވައްދާލީ ލޫކަ މޮޑްރިޗް އެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ ވައްދާލައި، ރޮޑްރީގޯ ވަނީ ރެއާލަށް ލީޑުފުޅާކޮށްދީފަ އެވެ.
އަލުން މެޗުގެ ތެރެއަށް ވަންނަން، ފުރަތަމަ ހާފުގައި ސެލްޓިކަށް ލިބުނު ފުރުސަތުގައި މެޗުގެ 35 ވަނަ މިނިޓްގައި އެ ޓީމަށް ލިބުނު ޕެނަލްޓީން ޔޯސިޕް ޔުރަނޮވިޗް ޖެހި ބޯޅަ ރެއާލް ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ދެ ވަނަ ހާފުގައި ރެއާލުން އިތުރު ތިން ގޯލު ޖެހިއިރު، މި ލަނޑުތައް ޖެހީ އޭރިއާތެރެއިން ލިބުނު ފުރުސަތުތަކުން މާކޯ އަސެންސިއޯ އާއި ވިނީޝިއުސް ޖޫނިއާ އަދި މެޗުގެ މޮޅު ކުޅުންތެރިއަކަށް ހޮވުނު, ފެޑެރީކޯ ވަލްވޭޑޭ އެެވެ. ރެއާލް އެންމެ ފަހުން ކުޅުނު 19 މެޗުގައި ވަލްވޭޑޭ ވަނީ އަށް ގޯލު ޖަހައި، ފަސް ގޯލު ޖަހަން ފުރުސަތު ތަނަވަސްކޮށްދީފަ އެވެ.
ހިލޭ ޖެހުމަކުން ސެލްޓިކްގެ ހަމައެކަނި ގޯލު ޖެހީ ޖޮޓާ އެވެ. އޭގެ ފަހުން ވެސް ޖޮޓާ ޖެހި ރަަނގަޅު ބޯޅައެއް ކީޕަރު ކޯޓުއާ ހުއްޓުވި އެވެ.
އެންމެ ފަހުގެ ޗެމްޕިއަން ރެއާލް ގްރޫޕް އެފްގެ އެއް ވަނަ ހޯދީ ހަ މެޗުން 13 ޕޮއިންޓާ އެކު އެވެ. ގްރޫޕްގެ ދެ ވަނައިގެ ގޮތުގައި އަނެއް ބުރުން ފުރުސަތު ހޯދީ ފަސް މެޗުން 12 ޕޮއިންޓް ހޯދި އާރްބީ ލައިޕްޒިގު އެވެ. ލައިޕްޒިގުން މިރޭ ވަނީ ޝަހުތަރު ޑޮނެސްކްގެ ދަނޑުގައި 4-0 އިން މޮޅުވެފަ އެވެ. ތިން ވަނައިގައި ނިންމާލި ޝަހުތަރަށް ލިބުނީ ހަ މެޗުން ހަ ޕޮއިންޓެވެ. ސެލްޓިކް ގްރޫޕް ނިންމާލީ ހަ މެޗުން ދެ ޕޮއިންޓާ އެކު އެވެ.
