ދެކުނު ކޮރެއާއާ ގުޅިގެން އެމެރިކާއިން އަސްކަރީ ތަމްރީންތައް ހިންގުން ހުއްޓާނުލާ ނަމަ "ރައްދުގައި ވަރުގަދަ ފިޔަވަޅުތަކެއް" އަޅާނެކަމުގެ އިންޒާރު އުތުރު ކޮރެއާއިން ދީފި އެވެ.
އެމެރިކާ އާއި ދެކުނު ކޮރެއާގެ ބޮޑު އަސްކަރީ ތަމްރީނެއް ފެށީ ހޯމަ ދުވަހު އެވެ. އެ ތަމްރީން ނިންމާނީ އަންނަ ހުކުރު ދުވަހު އެވެ.
މީގެ ކުރިން ދެ ގައުމުން ހިންގި ތަމްރީންތަކަށް ރައްދު ދިނުމުގެ ގޮތުން އުތުރު ކޮރެއާއިން ވަނީ ގިނަ އަދަދެއްގެ މިސައިލްތައް ޓެސްޓުކޮށްފަ އެވެ.
އެ މިސައިލް ޓެސްޓުތަކާ ގުޅިގެން ޖާސޫސީ ފަރާތްތަކުން ބުނީ އުތުރު ކޮރެއާއިން ތައްޔާރު ވަނީ 2017 ވަނަ އަހަރަށް ފަހު ފުރަތަމަ ފަހަރަށް ނިޔުކްލިއާ ހަތިޔާރެއް ޓެސްޓު ކުރުމަށް ކަމަށެވެ.
"އެމެރިކާއިން ތަކުރާރުކޮށް އަސްކަރީ ގޮތުން ގޮންޖަހަމުންދާ ނަމަ، އެއަށްވުރެ ވަރުގަދަ ފިޔަވަޅުތަކެއް ރައްދުގައި އަޅަން ވިސްނާނަން،" އުތުރު ކޮރެއާގެ ފޮރިން މިނިސްޓްރީން ނެރުނު ބަޔާނުގައި ބުންޏެވެ.
"އެމެރިކާގެ ސަލާމަތަށް ނުރައްކާވާ ފަދަ ސީރިއަސް ކަންތައްތަކެއް ފެންނަން ބޭނުންނުވާ ނަމަ، އެމެރިކާގެ އަސްކަރީ ތަމްރީންތައް ވަގުތުން ހުއްޓާލަން ޖެހޭ. އެހެން ނޫން ނަމަ ކުރިމަތިވާ ނަތީޖާ ޒިންމާ ނަގަން ޖެހޭނީ އެމެރިކާއިން."
ހޯމަ ދުވަހު އެމެރިކާ އާއި ދެކުނު ކޮރެއާއިން ފެށި ތަމްރީނުގެ ނަމަކީ "ވިޖިލަންޓް ސްޓޯމް" އެވެ. އެ ތަމްރީންގައި އެތައް ސަަތޭކަ ވައިގެ އުޅަނދު ބައިވެރިކޮށްގެން، ހަމަލާއެއް ދޭނެ ގޮތުގެ ރިހާސަލް ކުރާނެ އެވެ.
