ސަރުކާރުގެ މެޖޯރިޓީ ހިއްސާ އޮންނަ ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ޕަބްލިކް ލިމިޓެޑަށް މިއަހަރުގެ ތިން ވަނަ ކުއާޓާގައި އާމްދަނީގެ ގޮތުގައި 4.6 ބިލިއަން ރުފިޔާ ލިބި، ޖުމުލަ ފައިދާ 515 މިލިއަން ރުފިޔާ އަށް އަރައިފި އެވެ.
އެސްޓީއޯގެ ތިންވަނަ ކުއާޓާ މާލީ ރިޕޯޓުން ދައްކާ ގޮތުގައި ނިމިގެން ދިޔަ ކުއާޓާގައި ލިބިފައިވާ އާމްދަނީ، ދެ ވަނަ ކުއާޓާގެ އާމްދަނީއަށް ވުރެ 57 މިލިއަން ރުފިޔާ އިތުރެވެ. ދެ ވަނަ ކުއާޓާގެ ފައިދާއަކީ 458 މިލިއަން ރުފިޔާ އެވެ.
"މީގެ މައިގަނޑު ސަބަބަކީ އެސްޓީއޯއިން ކުރަމުން ގެންދާ ހުރިހާ ވިޔަފާރީތައް ރަނގަޅު ކުރެވި މުދާ ގަތުމަށް ކުރާ ހަރަދު ކުޑަކުރެވިފައިވުން،" އެ ކުންފުނިން ނެރުނު ބަޔާނެއްގައި ބުނެފައިވެ އެވެ.
ފައިދާ އިތުރުވި އަނެއް ސަބަބަކީ ހިންގުމުގެ ހަރަދު ވެސް ނިސްބަތުން ކުޑަކުރެވުން ކަމަށް ވެސް ބުނެފައިވެ އެވެ.
އާމްދަނީ
- ފުރަތަމަ ކުއާޓާ: 4.04 ބިލިއަން ރުފިޔާ
- ދެ ވަނަ ކުއާޓާ: 4.94 ބިލިއަން ރުފިޔާ
- ތިން ވަނަ ކުއާޓާ: 4.62 ބިލިއަން ރުފިޔާ
އެސްޓީއޯއިން ބުނީ ދުނިޔޭގެ ބާޒާރުގައި އަގުތައް މަތިވުމާއިއެކު ފައިނޭންސް ކުރުމުގެ ހަރަދު އިތުރުވެފައިވީ ނަމަވެސް ޖުމުލަ ފައިދާ އިތުރުވުމާއި ހިިންގުމުގެ ހަރަދު ނިސްބަތުން ކުޑަކުރެވުމާއެކު ސާފު ފައިދާ ވެސް އިތުރުވެފައިވާ ކަމަށެވެ.
ތިންވަނަ ކުއާޓާގެ ސާފު ފައިދާ 168 މިލިއަން ރުފިޔާގައި އުޅޭއިރު، ދެ ކުއާޓާގެ ސާފު ފައިދާގެ ގޮތުގައި ހުރީ 155 މިލިއަން ރުފިޔާ އެވެ.
ތިން ވަނަ ކުއާޓާގެ އުސްއަލިތައް
އާމްދަނީ: 4.62 ބިލިއަން ރުފިޔާ.
ހަރަދު: 276 މިލިއަން ރުފިޔާ
ސާފު ފައިދާ: 168 މިލިއަން ރުފިޔާ
ހިއްސާއަކަށް ޖެހޭ އާމްދަނީ: 149ރ.
ނިމިގެންދިޔަ ކުއާޓާގައި ހިއްސާއަކަށް ޖެހުނު އާމްދަނީ ވަނީ އިތުރުވެފަ އެވެ. ދެ ވަނަ ކުއާޓާގައި ހިއްސާއަކަށް ޖެހުނު އާމްދަނީ އަކީ 138ރ. އެވެ. ފުރަތަމަ ކުއާޓާގައި 133ރ. އެވެ. ތިން ވަނަ ކުއާޓާގައި ޖެނުނީ 149ރ. އެވެ.
ވޭތުވެދިޔަ ތިން ކުއާޓާގެ ޖުމުލަ އާމްދަނީ 13.6 ބިލިއަން ރުފިޔާގައި ހުރިއިރު، ޖުމުލަ ސާފު ފައިދާއަކީ 473 މިލިއަން ރުފިޔާ އެވެ.
