ހެއްކާ ބެހޭ ގާނޫނުގައި މަސްދަރު ހާމަކުރަން މަޖުބޫރު ކުރެވޭ ހާލަތްތަކެއް ކަނޑައަޅާފައިވާ މާއްދާއަށް ނޫސްވެރިން އެދުނު ބައެއް ބަދަލުތަކާއެކު ހެއްކާ ބެހޭ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހަޅާފައިވާއިރު، އަލުން ފޮނުވި ބިލުގައި ނޫސްވެރިންގެ ކަންބޮޑުވުންތައް ހުރުމުން އެ ބިލު އަނެއްކާވެސް އިސްލާހުކުރަން ނުޖެހޭނެތޯ މާފަންނު ހުޅުނގު ދާއިރާގެ މެމްބަރު ހަސަން ލަތީފް ސުވާލު އުފައްދަވައިފި އެވެ.
ނޫސްވެރިން އެދިފައިވާ ބައެއް ބަދަލުތައް ހިމަނައިގެން އެ މާއްދާ އިސްލާހު ކުރަން ހުށަހަޅާފައިވީނަމަވެސް، ބިލު ހުށަހަޅައިފައިވަނީ ނޫސްވެރިންގެ އެންމެ ބޮޑު ކަންބޮޑުވުން ހުރި ގައުމީ ސަލާމަތާ ބެހޭ މާއްދާ ހިމަނައިގެންނެވެ.
ބިލުގައި ހިމެނޭ އެއް ބަދަލަކީ، މަސްދަރު ހާމަކުރުމަށް ލާޒިމުކުރާ ހާލަތްތަކުގެ ތެރޭގައި ހިމެނޭ ގައުމީ ސަލާމަތާ ގުޅުން ހުރި ކުށްތަކާއި ޓެރަރިޒަމްގެ ކުށްތައް އިތުރަށް ސާފުވާނެ ގޮތަށް ގާނޫނުގައި މާނަކޮށްދިނުމެވެ.
ކުރިން ގާނޫނުގައި އޮތީ މަސްދަރު ހާމަކޮށްދިނުމަށް އެދި ދައުލަތުގެ އިތުރަށް ދައުވާ ކުރާ މީހުންނަށް ވެސް ހުށަހެޅޭ ގޮތަށެވެ. ފަހުން ފޮނުވި ބިލުގައި ހިމެނި ބަދަލަކީ، ދައުލަތް ތަމްސީލުކުރާ ޕްރޮސެކިއުޓާ ޖެނެރަލް ހުށަހަޅައިގެން، ހައި ކޯޓުން ކުރާ އަމުރެއްގެ ގޮތުގައި އެކަން ކަނޑައެޅުމަށެވެ.
އެންމެ ބޮޑު ކަންބޮޑުވުމެއް އޮތް ގައުމީ ސަލާމަތާ ބެހޭ މައްސަލަތައް އަދިވެސް ބިލުގައި އޮތުމުން ނޫސްވެރިންގެ ޖަމިއްޔާ، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވަނީ މީގެ ކުރިން ވެސް ކަންބޮޑުވުން ފާޅުކޮށްފަ އެވެ.
އެ ބިލާ ގުޅޭގޮތުން މިދިޔަ ބުދަ ދުވަހުގެ ޖަލްސާގައި ކުރިއަށް ދިޔަ ބަހުސްގައި ވާހަކަ ދައްކަވަމުން ހަސަން ލަތީފް ވިދާޅުވީ މަޖިލީހުގެ ޖުޑީޝަރީ ކޮމިޓީން މި ބިލު ފުރަތަމަ ދިރާސާކުރި އިރު ބަންޑަރަ ނައިބުގެ އޮފީސް ހިމެނޭ ގޮތަށް ވަރަށް ފުޅާ ދާއިރާއެއްގައި މަޝްވަރާ ކުރެވުނު ކަމަށެވެ.
"ބަންޑާރަ ނައިބުގެ އޮފީހުން، ސަރުކާރުން ވިދާޅުވަމުން ގެންދެވީ، އެ ބިލު އޭރު އޮތީ ވަރަށް ފުރިހަމަކޮށް ކަމަށް. އަދި ހަމަ އެއާ އެކީގައި ނޫސްވެރިންގެ ކަންބޮޑުވުންތަކަށް އެޑްރެސް ކުރެވިފައި ހުންނާނެ ކަމަށް ވެސް ވިދާޅުވަމުން ގެންދެވި،" ހަސަން ލަތީފް ވިދާޅުވި އެވެ.
ނަމަވެސް، ބައިނަލްއަގުވާމީ މިންގަނޑުތަކާ އެއްގޮތަށް އޮތް ކަމަށް ސަރުކާރުން ބުނާ ބިލު މަޖިލީހުން ފާސްކުރިތާ ތިން މަހެއްހާ ދުވަހުގެ ތެރޭގައި އެ ބިލު އިސްލާހުކުރަން ހުށަހަޅާފައިވާއިރު، މިހާރު ހުށަހެޅި އިސްލާހާމެދު ވެސް ނޫސްވެރިންގެ ކަންބޮޑުވުން ހުރި ކަން އޭނާ ފާހަގަކުރެއްވި އެވެ.
މަޖިލީހުގެ ޖަލްސާއެއްގައި ހަސަން ލަތީފް ވާހަކަ ދައްކަވަނީ. -ފޮޓޯ: މަޖިލިސް
"ދެން އަނެއްކާ ނޫސްވެރިންވީ މި މަޖިލީހުގެ ކަމާ ބެހޭ ކޮމިޓީއަށް ވަޑައިގެން އެ ވާހަކަތައް ދައްކަވަން. އަނެއްކާ ރައީސް އޮފީހަށް ވަޑައިގަންނަވަންވީ. އަނެއްކާ ބައްދަލުކުރައްވަންވީ ރައީސް އޮފީހުގެ ބޭފުޅުންނާ. އަނެއްކާ އެއީ ރަނގަޅު ކަމެއް ކަމަށް ވިސްނިވަޑައިގެން އަނެއްކާ ބަންޑާރަ ނައިބު އިސްލާހު ހުށަހަޅުއްވަންވީ. ދެން ކޮންއިރަކުނޮތޯ މި ނިމެނީ މި؟," ހަސަން ސުވާލު ކުރެއްވި އެވެ.
ހަސަން ލަތީފް ވިދާޅުވި ގޮތުގައި ނޫސްވެރިންނާ ސީދާ ގުޅުމެއް ވެސް ނެތް ހެއްކާބެހޭ ގޮތުން އެކުލަވައިލި މުހިންމު ގާނޫނަކަށް އަވަސް އަވަހަށް އިސްލާހު ކުރުން ދެކޮޅު ނުޖެހެ އެވެ.
ބިލު އޮތް ގޮތް ރަނގަޅު ކަމަށް ސަރުކާރުން ބުނާއިރު، އެ ގަބޫލުކުރުން މަތީގައި ދެމިއޮވެ، އެކަން ނޫސްވެރިންނަށް ވެސް ރަނގަޅަށް ވިސްނައިދޭންޖެހޭ ކަމަށް އޭނާ ވިދާޅުވި އެވެ.
އެހެންކަމުން ސަރުކާރުން ވަކި ގޮތަކަށް ނިންމައި، މަޖިލީހުގެ ވަގުތާއި މަސައްކަތް ވެސް ބޭކާރު ނުވާނޭ ގޮތަކަށް އަމަލުކުރުމަށް ހަސަން ލަތީފް ގޮވާލެއްވި އެވެ.
