ފޯޅަވަހި ހިމެނޭ ގޮތުން ޗާގޯސް ޖަޒީރާތަކަކީ މޮރިޝަސްގެ ސިޔާދަތީ ބާރު ހިނގާ ސަރަހައްދަކަށް ހަދަން އެގައުމުން ކުރާ މަސައްކަތަށް ތާއީދުކުރާ ގޮތަށް ރާއްޖޭގެ ސިޔާސަތު ބަދަލުކުރުމަކީ ގާނޫނުއަސާސީއާ ހިލާފަށް ސަރުކާރުން ނިންމި ނިންމުމެއް ކަމަށް ރައްޔިތުންގެ މަޖިލީހުގެ ބައެއް މެމްބަރުން މިއަދު ތުހުމަތުކުރައްވައިފި އެވެ.
ފޯޅަވަހީގެ މައްސަލައިގައި ރާއްޖޭން ކުރިން ގެންގުޅުނު ސިޔާސަތު ދަމަހައްޓަން ގޮވާލައި މަޑުއްވަރީ ދާއިރާގެ މެމްބަރު އާދަމް ޝަރީފު ހުށަހެޅުއްވި ކުއްލި މައްސަލައިގެ ބަހުސްގައި ގިނަ މެމްބަރުން ވިދާޅުވީ އެ ސިޔާސަތު ބަދަލުކުރާ ނަމަ ރައްޔިތުންގެ މަޖިލީހަށް ހުށަހަޅައި ރުހުން ހޯދަން ޖެހޭނެ ކަމަށެވެ. ސަރުކާރު ހިންގާ ކޯލިޝަނުގެ މައިޕާޓީ އަދި މަޖިލީހުގެ ސުޕަމެޖޯރިޓީ ވެސް އޮންނަ އެމްޑީޕީގެ ބައެއް މެމްބަރުން ވެސް ވާހަކަދެއްކެވީ އެ މޭރުމުންނެވެ.
ގަލޮޅު އުުތުރު ދާއިރާގެ އެމްޑީބީ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ޗާގޯސް މައްސަލާގައި ސަރުކާރުން ނިންމި ނިންމުމަކީ ކޮންމެވެސް ހިސާބަކުން ރާއްޖޭގެ ސަރަހައްދެއް ގެއްލިދާނެ ވަރުގެ ނިންމުމެއް ކަމަށެވެ.
"ދެވަނަ މައްސަލައަކީ އެ ނިންމުން ނިންމުމުގައި ރައްޔިތުންގެ މަޖިލީހާ މަޝްވަރާކުރެވިފައި ނެތުން އަދި މައްސަލައަކީ ރައްޔިތުންނަށް އެއްވެސް ވަރަކަށް އޭގެ މައުލޫމާތު [ދީފައި]ނެތުން،" އީވާ ވިދާޅުވި އެވެ.
އޭނާ ވިދާޅުވި ގޮތުގައި ޗާގޯސް މައްސަލާގައި ސަރުކާރުގެ ސްޓޭންޑު ބަދަލުވީ ކީއްވެކަން ސާފެއް ވެސް ނޫނެވެ. އެކަމުގައި ސަރުކާރުން 2019 ވަނަ އަހަރު ގެންގުޅުނު ސިޔާސަތާ މިހާރުގެ ސިޔާސަތާ ދެމެދު މިހާ ބޮޑު ތަފާތެއް ހުރީ ކީއްވެތޯ އޭނާ ސުވާލު އުފެއްދެވި އެވެ.
ޗާގޯސް މައްސަލައިގެ ވާހަކަ ކޮންމެ ގޮތަކަށް ދެއްކި ނަމަވެސް އެެކަމުގައި ސަރުކާރުން ނިންމި ނިންމުމުގެ އާހިރު ނަތީޖާއަކީ އޭނާ ވިދާޅުވި ގޮތުގައި ރާއްޖޭގެ ސަރަހައްދުން ބައެއް ގެއްލުމެވެ.
"ކޮންމެ ގޮތަކަށް ވެސް އަޅުގަނޑުމެންނަށް މިވާހަކަ ދެއްކިދާނެ. އިކުއިޑިސްޓެންސަށް ބަހާލަނިއްޔޭ، އިކުއިޑިސްޓެންސަށް ބަހާލިޔަސް އިއްޒަތްތެރި ރައީސް، އަޅުގަނޑުމެން މޮރިޝަސްގެ ކްލެއިމަށް ޖާގަ ދެނީކަމަށް 22 އޮގަސްޓް 2022 ގައި ރައީސުލް ޖުމްހޫރިއްޔާގެ ސިޓީފުޅެއް އެބަ އޮތް. އަދި ސްޕެޝަލް ޓްރައިބިއުނަލްގައި، އިންޓަނޭޝަނަލް ލޯ އޮފް ދަ ސީސްގެ ސްޕެޝަލް ޓްރައިބިއުނަލްގައި ބަންޑާރަމަނިކުފާނު [ބަންޑާރަނައިބު] ވިދާޅުވެފައި އެބަ އޮތް، އަޅުގަނޑުމެން ދޫކޮށްލަނީ ކަމަށް. އާހިރު ނަތީޖާއަކަށް ވަނީ ކަން ނިންމާ އިރު ރާއްޖޭގެ އިކޮނޮމިކް ޒޯނުން ބައެއް ގެއްލިދާނެކަން،" އީވާ ވިދާޅުވި އެވެ.
އީވާ ވިދާޅުވީ ރާއްޖޭގެ ސަރަހައްދުގެ ބޮޑުމިނަށް ބަދަލެއް އަތުވެދާނެ ފަދަ ނިންމުމެއް ނިންމާ އިރު ރައްޔިތުންގެ މަޖިލީހާ އެކަމުގައި މަޝްވަރާނުކުރުމަކީ މައްސަލައެއް ކަމަށެވެ. ހާރިޖީ ސިޔާސަތު ކަނޑައެޅުއްވުމަކީ ރައީސުލް ޖުމްހޫރިއްޔާގެ އިހުތިޔާރު ކަމަށާއި އެހެން ނަމަވެސް ރާއްޖޭގެ ސަރަހައްދުން ބައެއް ކޮންމެވެސް ދުވަހަކުން ގެއްލިދާނެ ފަދަ ނިންމުމެއް ނިންމަން ޖެހޭނީ މަޖިލީހާ މަޝްވަރާކޮށްގެން ކަމަށް ވެސް އޭނާ ވިދާޅުވި އެވެ.
ގައްދޫ ދާއިރާގެ އެމްޑީޕީ މެމްބަރު އަހުމަދު ޒާހިރު ވިދާޅުވީ ރާއްޖޭގެ ސަރަަހައްދުން އެންމެ ތަންކޮޅެއް ވެސް ގެއްލެން އެެއްވެސް ރައްޔިތަކު ބޭނުންނުވާނެ ކަމަށާއި ސަރުކާރެއް އޮންނަނީ އެފަދަ ކަންކަމުގައި އެންމެ ފަސޭހަ މަގުން ކަންތައްކުރަން ނޫން ކަމަށެވެ. މިއީ އާއްމުކޮށް ކުރިމަތިވާ ފަދަ މައްސަލައެއް ނޫން ކަމަށާއި އެހެންވީމާ ރައްޔިތުންނަށް މިކަމުގެ މައުލޫމާތު ސާފުކޮށް އެނގެން ޖެހޭނެ ކަމަށް ވެސް އޭނާ ވިދާޅުވި އެވެ.
"އެހެންވީމާ މީގައި ކަންކުރަން ޖެހޭނެ ގޮތް ރައްޔިތުންނަށް ވެސް އޮޅުން ފިލަން ޖެހޭނެ. ރައްޔިތުން ރުހޭގޮތް ހޯދަން ޖެހޭނެ، މި އިއްޒަތްތެރި މަޖިލީހާ މަޝްވަރާކުރެވިގެން، މި އެންމެހާ މެމްބަރުންނަށް ވާނުވާ އެނގިގެން،" ޒާހިރު ވިދާޅުވި އެވެ.
މަޖިލީހަށް ކުއްލި މައްސަލަ ހުށަހެޅުއްވި މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު ވިދާޅުވީ ޗާގޯސްގެ ސިޔާދަތީ ބާރު މޮރިޝަސް އަށް ލިބިއްޖެ ނަމަ އެގައުމުން، އިން ވަކިކުރާ ސަރަހައްދު އެގައުމުން ކަނޑައަޅާނީ ޗާގޯސްގެ އެންމެ އުތުރަށް އޮތް ރަށާ ހިސާބުން ކަމަށެވެ. އެގޮތަށް ކަންތައް ވެއްޖެނަމަ ރާއްޖޭގެ ސަރަހައްދެެއް ގެއްލޭނެ ކަމަށް ވެސް އޭނާ ވިދާޅުވި އެވެ.
"އެެއަށް ވުރެ ސީރިއަސް މައްސަލައަކީ، އިއްޒަތްތެރި ރައީސް މިބާވަތުގެ ކަމެއްގައި މުއާހަދާތަކެއް އޮތް ކަމަށް ބެލެވިގެން މިކަން ކުރާ އިރު. ގާނޫނު އަސާސީގެ 93 ވަނަ މާއްދާގައި ވަރަށް ސާފުކޮށް ބަޔާންކޮށްފައި އެބަ އޮތް މި ބާވަތުގެ މައްސަލައެއް ކަމަށް ވެއްޖެއްޔާ މިކަން މަޖިލީހަށް ގެނެސް މަޖިލީހުގައި ބަހުސްކުރެވިގެން ގޮތަކަށް ނިންމަން ޖެހޭނެ ކަމަށް. ހިތާމާއާ އެކު ދަންނަވަން ޖެހެނީ ސަރުކާރުން މިހާރު މި އޮތީ ގާނޫނު އަސާސީގެ 93 ވަނަ މާއްދާއާ ހިލާފުވެފައޭ،" އާދަމް ޝަރީފު ވިދާޅުވި އެވެ.
