މެޑްރިޑް (އޮކްޓޫބަރު 23) - ސްޕެނިޝް ލީގުގައި ރޭ ކުޅުނު މެޗުން ސެވިއްޔާ އަތުން 3-1 އިން މޮޅުވެ، ލީގުގެ އެއް ވަނައިގައި ރެއާލް މެޑްރިޑް ހަމަޖެހިލައިފި އެވެ.
ރޭގެ މޮޅާ އެކު ރެއާލަށް ވަނީ އެއް ވަނައިގައި ހަ ޕޮއިންޓުގެ ލީޑެއް ލިބިފަ އެވެ. ރެއާލަށް 11 މެޗުން 31 ޕޮއިންޓް ލިބިފައިވާއިރު، ދެ ވަނައިގައި އޮތް ބާސެލޯނާ އަށް 10 މެޗުން ލިބިފައިވަނީ 25 ޕޮއިންޓެވެ. ތިން ވަނައިގައި އޮތް ރެއާލް ސޮސިއެޑާޑް ވަނީ ރޭ ރެއާލް ވަލޮޑޮލިޑް އަތުން 1-0 އިން ބަލިވެފަ އެވެ. ސޮސިއެޑާޑަށް 11 މެޗުން ލިބުނީ 22 ޕޮއިންޓެވެ.
ރެއާލް ދަނޑުގައި ކުޅުނު ރޭގެ މެޗުގެ ފަސް ވަނަ މިނިޓްގައި އެ ޓީމުން ލީޑުނެގީ ވިނީޝިއުސް ޖޫނިއާ ހުސްކޮށްލާފައި ދިން ބޯޅައަކުން ލޫކަ މޮޑްރިޗް ޖެހި ގޯލުންނެވެ. މެޗުގެ 18 ވަނަ މިނިޓްގައި ރެއާލްގެ ޑޭވިޑް އަލަބާ ހިލޭ ޖެހުމަކުން އެ ޓީމަށް ގޯލެއް ޖަހައިދޭން ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ.
ދެ ވަނަ ހާފްގެ ކުޅުން ފެށިތާ އަށް މިނިޓް ތެރޭ ސެވިއްޔާ އިން ވަނީ އެއްވަރުކޮށްފަ އެވެ. ރެއާލްގެ އޭރިއާތެރެއަށް ހުސްކޮށް އަރައި، ސެވިއްޔާގެ އެރިކް ލަމޭލާ ޖެހި ބޯޅަ ގޯލަށް ވަނީ ރެއާލްގެ ކީޕަރު ތިބައު ކޯޓުއާ އަތުގައި ޖެހިފަ އެވެ. އޭގެ ފަސް މިނިޓް ފަހުން، ކައުންޓަ އެޓޭކެއްގައި ތަނަވަސްކުރި ފުރުސަތަކުން ސެވިއްޔާ އަށް ލީޑުނަގައިދޭން ލަމޭލާ ޖެހި ޝޮޓް ދިޔައީ ދަނޑިކައިރިން ބޭރުންނެވެ.
އަލުން ލީޑުނަގަން ކުރި މަސައްކަތް ރެއާލުން ކާމިޔާބުކުރީ މެޗުގެ 78 ވަނަ މިނިޓްގަ އެވެ. މާކޯ އަސެންސިއޯ ހުސްކޮށްލާފައި ދިން ބޯޅަ ހިފައިގެން ގޮސް، އޭރިއާ ކައިރިން ވިނީޝިއުސް ޖޫނިއާ ޖައްސާލީ އެ ޓީމުގެ ލޫކަސް ވަޒްކޭޒް އަށެވެ. އޭނާ ވަނީ ހަމަޖެހިލާފައި ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިފަ އެވެ. އޭގެ ދެ މިނިޓް ފަހުން ރެއާލުން ތިން ވަަނަ ގޯލެއް ޖެހި އެވެ. އޭރިއާބޭރުން ފެޑެރީކޯ ވަލްވޭޑޭ ޖެހި ބާރު ބޯޅަ އަމާޒުވީ ގޯލުގެ މަތީ ކަނަށެވެ.
މިއީ މި ފަހަރުގެ ލީގުގައި ރެއާލުން ކުޅުނު 11 މެޗުގެ ތެެރެއިން ހޯދި 10 ވަނަ މޮޅެވެ.
