އިޒްރޭލުގެ ވެރިރަށަކީ ހުޅަނގު ގުދުސް ކަމަށް ބަލައިގަަންނަަން މީގެ ހަތަރު އަހަރު ކުރިން އޮސްޓްރޭލިއާއިން ނިންމި ނިންމުން އަނބުރާ ގެންގޮސްފި އެވެ.
ފޮރިން މިނިސްޓަރު ޕެނީ ވޮންގް ވިދާޅުވީ 2018 ވަނަ އަހަރު ސަރުކާރުން ނިންމި ނިންމުމާ ހެދި ސުލްހައަށް އުނިކަން ލިބި އެހެން ގައުމުތަކުގެ ވިސްނުމާ ދުރަށް އޮސްޓްރޭލިއާ ދިޔަ ކަމަށެވެ.
ވޮންގް ވިދާޅުވީ އޮސްޓްރޭލިއާ ދެމިއޮންނާނީ އިޒްރޭލުގެ އެކުވެރިއެއްގެ ގޮތުގައި ކަމަށެވެ. އެހެން ނަމަވެސް އޮސްޓްރޭލިއާގެ އެމްބަސީ ހުޅަަނގު ގުދުސްއަށް ބަަދަަލުނުކޮށް، ތެލް އަވީވްގައި ދަހަަމައްޓާނެ އެވެ.
އިޒްރޭލާއި ފަލަސްތީނުގެ މައްސަލައިގައި އެންމެ ބޮޑު ހިޔާލު ތަފާތުވުމެއް އޮތް އެއް ކަމަކީ ގުދުސް އެވެ. އިޒްރޭލުން ދެކެނީ މުޅި ގުދުސްއަކީ އެ މީހުންގެ ވެރިރަށް ކަމަށެވެ. އެކަމަކު ފަލަސްތީނުން ބޭނުންވަނީ އިރުމަތީ ގުދުސްއަކީ ފަލަސްތީނުގެ ވެރިރަށަށް ހެދުމަަށެވެ.
އޮސްޓްރޭލިއާގެ ނިންމުމާ ގުޅިގެން އިޒްރޭލުގެ ބޮޑު ވަޒީރު ޔެއާ ލަޕިދް އޮސްޓްރޭލިއާއާ މެދު ހިތްހަމަަނުޖެހުން ފާޅުކޮށް ވިދާޅުވީ ގުދުސް އަބަދުވެސް ދެމިއޮންނާނީ އިޒްރޭލުގެ ވެރިރަށުގެ ގޮތުގައި ކަމަށެވެ.
ގުދުސްއަކީ އިޒްރޭލުގެ ވެރިރަށް ކަމަށް އެންމެ ފުރަތަމަ ނިންމީ 2017 ވަނަ އަހަރު އެމެރިކާއިންނެވެ. އޭގެ ފަހުން އެމެރިކާގެ އެމްބަސީ ވެސް ގުދުސްއަށް ބަދަލުކުރި އެވެ.
އޮސްޓްރޭލިއާާއިން އެ ނިންމުމަށް ތާއީދުކުރި އެވެ. އެހެން ނަމަވެސް، އޮސްޓްރޭލިއާއިން އޭރު ބުނީ އެމްބަސީ ގުދުސްއަށް ބަދަލުކުރާނީ ސުލްހައިގެ އެއްބަސްވުމަކަށް ދިޔުމުން ކަމަށެވެ.
އިނގިރޭސިވިލާތުން މިހާރު ދަނީ އެމްބަަސީ ގުދުސްއަށް ބަދަލުކުރުމާ މެދު ވިސްނަމުންނެވެ. އެމެރިކާގެ އިތުރުން ގުދުސްގައި އެމްބަސީ ހުރި ގައުމުތަަކަކީ ހޮންޑިޔުރަސް، ގުއާޓެމާލާ އަދި ކޮސޯވޯ އެވެ.
އިޒްރޭލުން އިރުމަތީ ގުދުސް އާއި ހުޅަނގު އައްސޭރި އަދި ގާޒާ ހިފީ 1967 ވަނަ އަހަރު އެވެ. ބައިނަލްއަގްވާމީ ގާނޫނުގައިވާ ގޮތުން އިޒްރޭލުން އެ ތަންތަން ހިފައިގެން އުޅެނީ ނުހައްގުންނެވެ.
