ރައްޔިތުންގެ އަތުން ނަގާ ޓެކްސް ބޮޑުނުކޮށް ވެސް ދައުލަތަށް ލިބޭ އާމްދަނީ އިތުރުކުރެވިދާނެ ކަަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ އެމްޑީޕީ މެމްބަރު އަލީ އާޒިމް ދައްކަވާ ވާހަކަ މިއަދު ވެސް ތަކުރާރު ކުރައްވައިފި އެވެ.
ޖީއެސްޓީއާއި ޓީޖީއެސްޓީ ބޮޑުކުރުމަށް ޓަކައި ޓެކްސްގެ ގާނޫނު ބަދަލުކުރަން ސަރުކާރުން މަޖިލީހަށް ބިލެއް ހުށަހެޅުމުން، މީގެ ކުރިން ވެސް އާޒިމް ފާޑުވިދާޅުވި އެވެ. އެ ބިލު ދިރާސާކުރަން މުޅި މަޖިލިސް ކޮމިޓީއަށް ގޮސްގެން މިއަދު ކުރި މަޝްވަރާގައި އާޒިމް ވިދާޅުވީ ޓެކްސް ބޮޑުކޮށްގެން، ދައުލަތަށް އިތުރުވާނެ ކަމަށް ލަފާކުރާ އާމްދަނީއާ އެއްވަރުގެ އަދަދެއްގެ ފައިސާ، ހަރަދު ކުޑަކޮށްގެން ސަލާމަތް ކުރެވިދާނެ ކަމަށެވެ.
ޓެކްސް ބޮޑުކުރަން ޖެހޭ ސަބަބުތަކާ ބެހޭ ގޮތުން އޮޅުން ފިލުވަން ޖެހޭ ގިނަ ކަންތައްތަކެއް އެބަހުރި ކަމަށް ވެސް އޭނާ ވިދާޅުވި އެވެ.
"ސަރުކާރަށް މި ފައިސާ [ޓެކްސް ބޮޑުކުރުމުން ލިބޭނެ ކަމަށް ލަފާކުރާ ފައިސާ] ހޯދުމަށް ޓަކައި ކުންފުނިތަކުގެ ހިއްސާ ވެސް ވިއްކިދާނެ އެކި ފަރާތްތަކަށް. އެހެންވީމާ 2.5 ބިލިއަން ރުފިޔާ ހޯދާކަށް ރައްޔިތުންގެ އަތުން ޓެކްސް ނަގާކަށް އަޅުގަނޑެއް ހަމަ ޔަގީނުން ވެސް އެއްބަހެއް ނޫން،" އާޒިމް ވިދާޅުވި އެެވެ.
އެ ފައިސާ ހޯދުމަށް ޓަކައި ކުންފުނިތަކުގެ ހިއްސާ ވިއްކުމުގެ އިތުރުން، ބޭކާރު ކުންފުނިތައް އުވައި ވެސް ލެވިދާނެ ކަމަށް އޭނާ ވިދާޅުވި އެވެ. އާޒިމް ވިދާޅުވީ ސަރުކާރުގެ ކުންފުނިތަކުގެ ހަރަދު އިންތިހާއަށް ބޮޑު ކަމަށެވެ.
ރާއްޖޭގެ އިގުތިސާދު ރަނގަޅުވަމުން އަންނަ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެފައި ވާތީ، އެ ވާހަކައާ ގުޅުވައި، އާޒިމް ވިދާޅުވީ އަމީރު އެ ވިދާޅުވި ގޮތަށް ރާއްޖޭގެ ހާލަތު އޮތް ނަމަ، ޓެކްސް ބޮޑުކުރަނީ ކީއްކުރަންތޯ ސުވާލު އުފެދޭ ކަމަށެވެ.
އެ ސުވާލާއި އެހެން ގިނަ ސުވާލުތަކަށް ޖަވާބު ހޯދުމަށް ޓަކައި ފިނޭންސް މިނިސްޓަރާއި ވިޔަފާރިވެރިންނާއި ވިޔަފާރިވެރިން ތަމްސީލުކުރާ ޖަމިއްޔާތަކުގެ އިސް ފަރާތްތައް ވެސް މަޖިލީހަށް ގެނެސް ސުވާލުކުރަން އާޒިމް ހުށަހެޅުއްވި އެވެ.
އޭނާގެ ހުށަހެޅުއްވުމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ތާއީދުކުރެއްވި އެވެ. ހަސަން ލަތީފަކީ ވެސް މި ވަގުތު ޓެކްސް ބޮޑުކުރުމާ ދެކޮޅަށް ވާހަކަ ދައްކަވާ މެމްބަރެކެވެ.
ދުނިޔޭގެ އިގުތިސޯދަށް މިހާރު ކުރިމަތިވެފައިވާ ހީނަރުކަމުގެ އަސަރު ރާއްޖޭގެ އިގުތިސޯދަށް ވަރަށް ބޮޑަށް ކުރަމުންދަތީ، އާމްދަނީ އިތުރުކުރަން މިހާރު ނަގަމުންދާ މުދަލާއި ހިދުމަތުގެ ޓެކްސް (ޖީއެސްޓީ) އަށް ޕަސަންޓަށް އަދި ޓޫރިޒަމް ދާއިރާއިން ނަގާ ޓީޖީއެސްޓީ 16 ޕަސަންޓަށް ބޮޑު ކުރަން ސަރުކާރުން ވަނީ ނިންމައި، އިއުލާނުކޮށްފަ އެވެ.
