ފްރާންސްގެ ވެރިރަށް ޕެރިހުގައި 12 އަހަރުގެ އަންހެން ކުއްޖަކު މަރާލައި، އޭނާ ދިރިއުޅޭ އެޕާޓްމަންޓް އިމާރާތުގެ ގޯތިތެރޭގައި ފޮއްޓަކަށް ލާފައި އޮއްވައި ފެނިއްޖެ އެވެ.
ރިޕޯޓުތައް ބުނާ ގޮތުން މިދިޔަަ ހުކުރު ދުވަހު ލޯލާ އާދައިގެ މަތިން ސްކޫލުގައި ވަގުތުތައް ހޭދަކުރި އެވެ. އެކަމަކު މެންދުރު ފަހު އެނބުރި ގެޔަށް ނައުމުން، އޭނާގެ ބައްޕަ ފުލުހުންނަށް އެންގި އެވެ.
އިމާރާތުގެ ބޭރުގައި ފޮއްޓެއް ހުރިކަން އެނގުނީ ހުކުރު ދުވަހުގެ ރޭގެ ވަގުތެއްގަ އެވެ. އެ ކުއްޖާގެ ހަށިގަނޑު ފެނުނީ ފޮށިގަނޑު ތެރޭގައި ފޮތިގަނޑެއް އަޅައި ފޮރުވާފައި އޮއްވަ އެވެ.
ރިޕޯޓުތައް ބުނާ ގޮތުން އެ ކުއްޖާގެ އަތާއި ފައި އޮތީ ބަނދެފަ އެވެ. އަދި ކަަރުގައި ބޮޑު ޒަހަމެއް އޮތެވެ. ހަފުތާ ބަންދުގައި ހެދި އޮޓޮޕްސީން އެނގުނީ މަރުވީ ނޭވާ ހާސްވެގެން ކަމަށެވެ.
އެ ކުއްޖާގެ ފައިގައި ދެ ނޯޓު ހަރުކޮށްފައި އޮތް އިރު، އެއް ނޯޓުގައި ލިޔެފައި އޮތޯ "0" އެވެ. އަދި އަނެއް ނޯޓުގައި ލިޔެފައި އޮތީ "1" އެވެ.
ފުލުހުންނަށް ތުހުމަތު ކުރެވޭ އަންހެނަކު ހޮނިހިރު ދުވަހު ހައްޔަރު ކުރި އެވެ. އަލްޖީރިއާއަށް އުފަން 24 އަހަރުގެ އެ މީހާއަށް ނޫސްތަކުން ނިސްބަތް ކުރަނީ ޑާހްބިއާ ބީގެ ނަމުންނެވެ.
ރިޕޯޓުތައް ބުނާ ގޮތުން އެ އަންހެން މީހާ ފެނުނީ އިމާރާތުގެ ސެކިއުރިޓީ ވީޑިއޯއިންނެވެ. ހުކުރު ދުވަހުގެ މެންދުރު ލޯލާއާ އެކު އެ އަންހެން މީހާ އިމާރާތުގެ މައި ދޮރުން ވަންނަ މަންޒަރު ކެމެރާއަށް އެރި އެވެ.
އޭގެ ފަހުން ކޮންޓެއިނަރެއް ހިފައިގެން އިމާރާތުން ނުކުމެ، މަގުމަތީގައި ޝައްކު ކުރެވޭ ގޮތަކަށް އޭނާ އުޅުނެވެ. ފުލުހުން ދެކޭ ގޮތުގައި އެ އަންހެން މީހާއަކީ ނަފްސާނީ ގޮތުން މައްސަލަތަކެއް ހުރި މީހެކެވެ.
އޭގެ އިތުރުން ޑާހްބިއާ ބީއަށް ކޮންޓެއިނަރު އުފުލުމުގައި އެހީވި ކަމަށް ބެލެވޭ 43 އަަހަރުގެ ފިރިހެނަކު ވެސް ހުރީ ހައްޔަރުކޮށްފަ އެވެ. ކާރުގައި ދުއްވުމަށް ފަހު އޭނާ އެނބުރި އައީ އެޕާޓްމަންޓު އިމާރާތަށެވެ.
ޑާހްބިއާ ބީގެ ދައްތަ ދިރިއުޅެނީ އެ އިމާރާތުގަ އެވެ. ރިޕޯޓުތައް ބުނާ ގޮތުން އޭނާ އާއި އޭނާގެ ދައްތަ ޒުވާބު ކުރި އަޑު އިމާރާތުގައި އުޅޭ އެހެން މީހުންނަށް އިވުނެވެ.
އެ ކުއްޖާގެ މަރާ ގުޅިގެން ޕެރިހުގައި ގިނަ ބަޔަކު ހިތާމަ ފާޅުކުރަމުންދާ އިރު، އެޑިއުކޭޝަން މިނިސްޓަރާއި ޕެރިހުގެ މޭޔަރު ލޯލާގެ ސްކޫލަށް ވަޑައިގެންނެވި އެވެ.
