ޓޯކިޔޯ، ޖަޕާން (އޮކްޓޯބަރު 17) - ޖަޕާނުގެ ޔުނިފިކޭޝަން ޗާޗަށް ފާޑުކިޔުން އިތުރުވެފައި ވަނިކޮށް، އެ ފައްޅީގެ މައްސަލަ ތަހުގީގު ކުރުމަށް ބޮޑު ވަޒީރު ފުމިއޯ ކިޝީޑާ އަމުރު ކުރައްވައިފި އެވެ.
ރިޕޯޓުތައް ބުނާ ގޮތުން ކުރީގެ ބޮޑު ވަޒީރު ޝިންޒޯ އަބޭ އަވަހާރަކޮށްލީ ޔުނިފިކޭޝަން ޗާޗްއާ އޮތް ގުޅުމުގެ ސަބަބުން ކަމަށް ބަޑިން ހަމަލާ ދިން މީހާ ވަނީ ބުނެފަ އެވެ.
ބައެއް ފަރާތްތަކުން ބުނާ ގޮތުން ޔުނިފިކޭޝާން ޗާޗްއަށް ދާ މީހުން ބޮޑެތި ފައިސާގެ ޑޮނޭޝަން ކުރަން ޖެހުމާއި ދަރިންނަށް އިހުމާލުވެ ފައްޅީގެ ހިދުމަތުގައި އުޅޭކަމުގެ ތުހުމަތު ކުރެވެ އެވެ.
ޔުނިފިކޭޝަން ޗާޗްގެ ރަސްމީ ނަމަކީ ފެމިލީ ފެޑެރޭޝަން ފޯ ވޯލްޑް ޕީސް އެންޑް ޔުނިފިކޭޝަން އެވެ. އެ ޖަމިއްޔާ އުފެދުނީ ކޮރެއާގައި ސުން މިޔުންގް މޫން ނަމަކަަށް ކިޔާ މީހެއްގެ އިސްނެގުމަށޭވެ.
ފައްޅިން ތުހުމަތުތައް ދޮގުކުރި ނަމަވެސް، ކުރިން އެ ފައްޅީގެ މެމްބަރުންގެ ގޮތުގައި އުޅުނު ބައެއް މީހުން ވަނީ ފާޑުކިޔައި، ފައްޅި އާއި ބައެއް ސިޔާސީ އިސްވެރިންނާ ގުޅުން އޮތް ކަމަށް ބުނެފަ އެވެ.
ހޯމަ ދުވަހު ޕާލިމެންޓުގައި ބޮޑު ވަޒީރު ކިޝީޑާ ވިދާޅުވީ ފައްޅީގެ "ޝިކާރައަކަށްވި" އެތައް ބަޔަކު އެބަަ އުޅޭ ކަމަށާއި ބައެއް މީހުން ފަގީރުކަމަށް ގޮސް އާއިލާ ރޫޅިފައިވާ ކަމަށެވެ.
އެމަނިކުފާނު ވިދާޅުވީ ދީނީ ޖަމިއްޔާތަކާ ގުޅޭ ގާނޫނުގެ ދަށުން އެ ފައްޅީގެ ހަގީގަތް ތަހުގީގު ކުރުމަށް ސަރުކާރަށް ލިބިފައިވާ ހައްގުގެ ބޭނުން ކުރާނެ ކަމަށެވެ.
ތަހުގީގުގެ ތެރެއިން ފަައްޅިއާ ގުޅިފައިވާ ތުހުމަތުތަކަކީ ހަގީގަތެއްކަން ސާބިތުވެއްޖެ ނަމަ، އެ ފައްޅިއަކީ ޓެކްސް ނުދައްކާ ހިންގޭ ޖަމިއްޔާއެއްގެ ގޮތުގައި އޮތް އޮތުމަށް ނިމުމެއް ގެނެވޭނެ އެވެ. އެހެން ނަމަވެސް، ފައްޅި ހިންގުމަކަށް ހުރަހެއް ނޭޅޭނެ އެވެ.
މީގެ ކުރިން ޖަޕާނުގައި ދީނީ ދެ ގްރޫޕަކާ ދެކޮޅަށް އެ ފިޔަވަޅު އެޅި އެވެ. އޭގެ ތެރޭގައި 1995 ވަނަ އަހަރު ޓޯކިޔޯގެ މެޓްރޯ ސްޓޭޝަނުގައި ކެމިކަލް ހަމަލާ ދިން އައުމް ޝިރިންކިޔޯ ކަލްޓް ހިމެނެ އެވެ. އަނެއް ގްރޫޕަކީ މެމްބަރުންނަށް އޮޅުވާލައިގެން ފައިސާ ހޯދި ގްރޫޕެކެވެ.
އެކަމަކު ޔުނިފިކޭޝަން ޗާޗްއާ ގުޅިގެން އެފަދަަ ފިޔަަވަޅެއް އަޅައިފި ނަމަ، ދީނީ މިނިވަންކަމުގެ ހައްގަށް އުނިކަން ލިބިދާނެތީ ސަރުކާރުން ކަންބޮޑުވާ ކަމަށް އޮފިޝަލުން ބުނެ އެވެ.
