މިއަހަރަށް ފާސްކޮށްފައިވާ ދައުލަތުގެ ބަޖެޓުގެ ޑެފިސިޓު، އަހަރު ނިމޭއިރު، 11 ބިލިއަން ރުފިޔާ ހުރަސްކުރާނެ ކަމަށް އަންދާޒާ ކުރެވޭ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
މި އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅީ 36.92 ބިލިއަން ރުފިޔާގެ ބަޖެޓެކެވެ.
އެކަމަކު މަޖިލީހުން ވަނީ ބައެއް ރަށްރަށުގެ ޕީއެސްއައިޕީގެ މަޝްރޫއުތަކަށާއި ބައެއް މުއައްސަސާތަކުން ބަޖެޓަށް ޖުމުލަ 73.8 މިލިއަން ރުފިޔާ އިތުރުކޮށް، މި އަހަރަށް 36.99 ބިލިއަން ރުފިޔާގެ ބަޖެޓެއް ފާސްކޮށްފަ އެވެ.
އެއީ އޭރު އަންދާޒާކުރި ގޮތުންނަމަ، ގާތްގަނޑަކަށް 9.7 ބިލިއަން ރުފިޔާގެ ޑެފިސިޓު ބަޖެޓެކެވެ.
މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެމްބަރު އިބްރާހިމް ޝަރީފް ކުރެއްވި ސުވާލަކަށް ޖަވާބު ދެއްވަމުން މާލީ ވަޒީރު ވިދާޅުވީ ދުނިޔޭގެ ބާޒާރުގައި ތެލުގެ އަގު އުފުލިގެން ދިޔުމުގެ ސަބަބުން ސަބްސިޑީއަށް ކުރަންޖެހޭ ހޭދަ އެތައް ގުނައެއް އިތުރުވެގެން ދިޔުމާއެކު، މިއަހަރުގެ ބަޖެޓު ޑެފިސިޓު ވެސް ބޮޑުވެގެންދިޔުން އެކަށީގެންވާ ކަމަށެވެ.
ބަޖެޓު ޑެފިސިޓު ފޫބެއްދުމަށްޓަކައި ބޭރުގެ އެހީއާއި ބަޖެޓު ސަޕޯޓުގެ އިތުރުން އެތެރޭގެ ބާޒާރުގައި ސަރުކާރުން ބޮންޑު ވިއްކައިގެން ފައިސާ ހޯދުމުގެ މަސައްކަތް ކުރެވެމުންދާކަން އަމީރު ފާހަގަކުރެއްވި އެވެ.
"މިހާރު ރިވައިސްޑް ޑެފިސިޓެއްގެ ގޮތުގަ އަޅުގަނޑަށް މި ފާހަގަވަނީ ގާތްގަނޑަކަށް 11 ބިލިއަން ރުފިޔާއަށް ޑެފިސިޓު އަރައިގެން ދާނެ ކަމަށް،" މިނިސްޓަރު ވިދާޅުވި އެވެ.
އަމީރު އިތުރަށް ވިދާޅުވި ގޮތުގައި ބަޖެޓު ޑެފިސިޓު ބޮޑުވެގެން ދިޔަ ނަމަވެސް، ދައުލަތުގެ ރިޒާވް މިއަހަރަށް ލަފާކުރި މިންވަރުގައި ހިފެހެއްޓޭނެ އެވެ.
ރަޝިއާ-ޔޫކްރޭނު ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި ކާބޯތަކެތީގެ އަގުތައް އިންތިހާއަށް އުފުލުމާއެކު، ސަރުކާރުން ސަބްސިޑީއަށް ކުރަންޖެހޭ ހަރަދު ވެސް ވަނީ އެތައް ގުނައެއް އިތުރުވެފަ އެވެ.
ތެލުގެ ސަބްސިޑީއަށް އެކަނި ބަލާއިރު، ގާތްނޑަކަށް 341.5 މިލިއަން ރުފިޔާ ބަޖެޓު ކުރެވުނު ނަމަވެސް، މި އަހަރުގެ ނިޔަލަށް އެކަމަށް ކުރަންޖެހޭ ހޭދަ 1.95 ބިލިއަން ރުފިޔާ ހުރަސްކުރާނެ ކަމަށް ވަނީ ލަފާކުރެވިފަ އެވެ.
