ތުރުކީގެ އުތުރުގައި ބޯޓުދެލި ނަގާ މައިނެއްގައި ހިނގި ގޮވުމެއްގައި 41 މީހުން މަރުވެފައިވާ ކަމަށް އެ ގައުމުގެ ރައީސް ތައްޔިބް އުރުދުގާން ވިދާޅުވެއްޖެ އެވެ.
ހުކުރު ދުވަހު ހިނގި ނުރައްކާތެރި ގޮވުމަށް ފަހު ގެއްލުނު ބައެއް މީހުން ހޯދުމަށް 20 ގަޑިއިރުގެ އޮޕަރޭޝަނެއް ކުރިއަށް ގެންދިޔަ އެވެ.
އިންޓީރިއާ މިނިސްޓަރު ސުލެއިމާން ސޮއިލޫ ވިދާޅުވީ އެ ހާދިސާ ހިނގި އިރު މައިނުގެ ތެރޭގައި 110 މީހުން ތިބި ކަމަށާއި އޭގެ ތެރެއިން 58 މީހުން ސަލާމަތްވި ކަމަށެވެ.
ދިހަ މީހުންނަށް ހޮސްޕިޓަލުގައި ފަރުވާދެމުންދާ ކަމަށް ވެސް އޭނާ ވިދާޅުވި އެވެ. ހުކުރު ދުވަހު މައިނުގައި ގޮވުމެއް ހިނގި އިރު، ގިނަ ބަޔަކު ތިބީ ބިމުގެ 300 މީޓަރު އަޑީގަ އެވެ.
އެ ހާދިސާއަށް ފަހު މީހުން ސަލާމަތް ކުރުމަށް ރެސްކިއު ޓީމުތަކުން ހުކުރު ދުވަހުގެ ދަންވަރު މައިނުގެ ތެރެއަށް ކޮނެ، ބުރަ މަސައްކަތްތަކެއް ކުރި އެވެ.
ރައީސް އުރުދުގާން އާއި ބައެއް އިސް މިނިސްޓަރުން އެ ސަރަހައްދަށް ވަޑައިގެން ވިދާޅުވީ، ގެއްލުނު ހުރިހާ އެންމެން ވެސް މިހާރު ފެނިފައިވާ ކަމަށެވެ.
އެ ގޮވުން ހިނގި ގޮތް ދެނެގަތުމަށް ތަހުގީގެއް ފަށާފައިވާ އިރު، ރިޕޯޓުތައް ބުނާ ގޮތުން އެކަން ދިމާވީ މައިނުގެ ތެރޭގައި މީތޭން ގޭސް އުފެދުމުންނެވެ.
ހާދިސާ ހިނގި މައިނަކީ ތުރުކީގެ ދައުލަތުގެ ކުންފުނި ޓާކިޝް ހާޑް ކޯލް އެންޓަޕްރައިޒަޒްގެ ތަނެކެވެ.
ތުރުކީގެ ތާރީހުގައި ބޯޓުދެލި ނަގާ މައިނެއްގައި އެންމެ ބޮޑު ހާދިސާ ހިނގީ 2014 ގަ އެވެ. އެ ފަހަރު ހުޅަނގު ސޯމާ އަވަށުގެ މައިނެއް ގޮވައި 301 މީހުން މަރުވި އެވެ.
