ފާއިތުވި 32 އަހަރުގެ ތެރޭގައި ނުވެއްޓޭ ވަރަށް ޖަޕާން ޔެންގެ އަގު ވެއްޓިއްޖެ އެވެ.
ހުކުރު ދުވަހު ޔެންގެ އަގު 147.66 އެމެރިކާ ޑޮލަަރަށް ވެއްޓުމަށް ފަހު، މިހާރު ހުރީ 148.71 ޑޮލަރުގަ އެވެ.
ފިނޭންސް މިނިސްޓަރު ޝުނިޗީ ސުޒުކީ ވިދާޅުވީ ފައިސާގެ އަގަށް އަންނަމުންދާ ބަދަލުތައް މެނޭޖު ކުރުމަށް "އެކަށީގެންވާ ފިޔަވަޅު" ސަރުކާރުން އަޅާނެ ކަމަށެވެ.
ފައިސާގެ އަގު ދެމެހެއްޓުމަށް ސެޕްޓެމްބަރު މަހު ވެސް ޖަޕާނުން ގާތްގަނޑަކަށް 20 ބިލިއަން ޑޮލަރު ހޭދަކުރި އެވެ.
މިދިޔަ ސެޕްޓެމްބަރު މަހު ޖަޕާން ޔެންގެ އަގު ވެއްޓެން ފެށުމުން 1998 ވަނަ އަހަރަށް ފަހު ފުރަތަމަ ފަހަރަށް ބޭންކް އޮފް ޖަޕާނުން އަގު ހިފަހައްޓަން ފިޔަވަޅު އެޅި އެވެ.
އެހެން ނަމަވެސް އެނެލިސްޓުން ބުނާ ގޮތުގައި އެމެރިކާގައި އިންޓްރެސްޓް ރޭޓް ހުރި ވަރަށް ވުރެ ކުޑަކޮށް ޖަޕާނުގެ އިންޓްރެސްޓް ރޭޓް ހުންނަ ނަމަ، ބޭންކުން އަޅާ ފިޔަވަޅަކުން ނަތީޖާއެއް ނުފެންނާނެ އެވެ.
ދުނިޔޭގައި ފާހަގަކުރެވޭ އެހެން ފައިސާތަކާ އަޅާ ބަލާއިރު، ޑޮލަރުގެ އަަގު ދަނީ އުފުލެމުންނެވެ. އެއީ އެމެރިކާގެ މަރުކަޒީ ބޭންކުން އިންޓްރެސްޓް ރޭޓުތައް މަތި ކުރުމުންނެވެ.
އިނގިރޭސި ޕައުންޑާއި ޗައިނާ ޔުއާންގެ އަގު ވެސް ރެކޯޑް މިންވަރަށް ވެއްޓިފައިވާ އިރު، ޔޫރޯގެ އަގު ވެސް ވަނީ 20 އަހަރުގެ ތެރޭގައި ދަށް ނުވާ މިންވަރަށް ދަށްވެފަ އެވެ.
ދުނިޔެއަށް ކާރިސާތައް ކުރިމަތިވާ ވަގުތުތަކުގައި ގިނަ އިންވެސްޓަަރުން ފައިސާ ރައްކާ ކުރަނީ ޑޮލަރުގެ ގޮތުގަ އެވެ. އެހެން ފައިސާތަަކުގެ އަގު ވެއްޓި ޑޮލަރުގެ އަގު އުފުލެނީ އެހެންވެ އެވެ.
