ބޯކޮށް ވާރޭވެހުމުގެ ސަބަބުން ފެންބޮޑުވުމުގެ ހާދިސާތައް ހިނގަމުން ދާތީ އޮސްޓްރޭލިއާގެ ތިން ސްޓޭޓެއްގެ އެކި ހިސާބުތަކުން މީހުން ރައްކާތެރި ސަރަހައްދުތަކަށް ބަދަލުވުމަށް އަންގައިފި އެވެ.
މުޅި އޮކްޓޯބަރު މަހު އެވްރެޖުކޮށް ވާރޭ ވެހޭ މިންވަރަށް ވުރެ ހަތަރު ގުނަ އިތުރަށް ފާއިތުވި 24 ގަޑިއިރުގެ ތެރޭގައި ބައެއް ހިސާބުތަކަށް ވާރޭ ވެހިފައިވެ އެވެ.
އެކަކު މަރުވެ އިތުރު މީހަކު ގެއްލިގެން ހޯދަމުންދާ އިރު، 500 އަަށް ވުރެ ގިނަ ގެޔަށް ފެންބޮޑުވުމުގެ އަސަރުކޮށްފައިވެ އެވެ.
މި އަހަރުގެ މިހާތަނަށް މޫސުން ގޯސްވެ ހިނގި ފެންބޮޑުވުމުގެ ހާދިސާތަކުގައި އޮސްޓްރޭލިއާއިން ޖުމްލަ 20 މީހުން މަރުވެފައިވެ އެވެ.
މިހާރު ކުރަމުންދާ ވިއްސާރައިގައި އެންމެ ބޮޑަށް އަސަރު ކުރަނީ ދެ ވަނައަށް އެންމެ އާބާދީ ބޮޑު ވިކްޓޯރިއާ ސްޓޭޓަށެވެ. އެ ތަނުގައި ބައެއް ހިސާބުތަކުން މީހުން އިވެކުއޭޓް ކުރަމުންދާ އިރު، އެ ސްޓޭޓުގެ ވެރިރަށް މެލްބޯންގެ ބައެއް ހިސާބުތަަކުން ވެސް މީހުން ދިޔުމަށް އަންގާފައިވެ އެވެ.
ކުރިއަށް އޮތް ހަފުތާތަކުގައި އިތުރަށް ވާރޭ ވެހޭނެ ކަމަށް ލަފާކުރެވެ އެވެ. ތަޖުރިބާކާރުން ބުނާާ ގޮތުގައި އޮސްޓްރޭލިއާގައި ފެންބޮޑުވުން އިތުރުވެ، ލިބޭ ގެއްލުން ބޮޑުވަމުން ދަނީ މޫސުމީ ބަދަލާ ހެދި އެވެ.
