މުއްސަނދި ވާން ކަމަށް ބުނެ އިންޑިއާގައި "ގުރުބާނީއެއްގެ" ގޮތުގައި ދެ އަންހެނުން މަރާލިކަމުގެ ތުހުމަތުގައި ތިން މީހުން ހައްޔަރުކޮށްފި އެވެ.
އެ މައްސަަލައިގައި ހައްޔަރު ކުރީ ދެމަފިރިއަކާއި ފަންޑިތަވެރިޔެއް ކަމަށް ބުނާ ފިރިހެނެކެވެ. މުހައްމަދު ޝާފީ ނަމަކަށް ކިޔާ މީހާއަށް އެ އަމަލު ހިންގަން އެ ދެމަފިރިން 3،640 ޑޮލަރު ދިނެވެ.
ފުލުހުންގެ ތަރުޖަމާނު ޕްރަމޯދް ކުމާރް އޭއެފްޕީއަށް ބުނީ މުހައްމަދު ޝާފީ ފުރަތަމަ އަންހެން މީހާ މަރާލިތާ ތިން މަސް ފަހުން ދެ ވަނަ އަންހެން މީހާ ވެސް މަރާލި ކަމަަށެވެ.
ބަގަވަލް ސިންގް އާއި އޭނާގެ އަންހެނުން ލައިލާއަށް މާލީ ދަތިތަކާ ކުރިމަތިވާތީ އެކަން ހަައްލު ކުރެވޭނީ އިންސާނުން ގުރުބާން ކުރުމުން ކަމަށް ޝާފީ އެ މީހުން ކައިރީގައި ބުންޏެވެ.
ކެރަލާ ސްޓޭޓުގައި ހިނގި އެ ހާދިސާގައި ހިމެނޭ ޝާފީއަކީ މީގެ ކުރިން ވެސް ރޭޕްގެ ތުހުމަތު ކުރެވިފައިވާ މީހެކެވެ. ފުލުހުން އޭނާ ސިފަކުރަނީ "ޖިންސީ ނުބައި އަމަލުތައް ހިންގާ މީހެއްގެ" ގޮތުގަ އެވެ.
ފިލްމެއްގެ ރޯލަކަށް ކަމަށް ބުނެ ފުރަތަމަ އަންހެން މީހާ ބަގަވަލް ސިންގްގެ ގެޔަށް ގެނައީ ޖޫން މަހު އެވެ. އެ އަންހެން މީހާ "ގުރުބާން" ކުރުމަށް ފަހު ވެސް މުއްސަނދި ނުވުމުން އެ ދެމަފިރިން ޝަކުވާކުރި އެވެ.
އެހެންވެ، ޝާފީ އެންގި ގޮތަށް ދެ ވަނަ "ގުރުބާނީގެ" ގޮތުގައި ސެޕްޓެމްބަރު މަހު އިތުރު އަންހެނަކު މަރާލި އެވެ.
"ފުރަތަމަ އަންހެން މީހާ ގެއްލިގެން ތަހުގީގު ކުރަމުން ދަނިކޮށް، ސެޕްޓެމްބަރު މަހު ގެއްލުނު އެހެން އަންހެން މީހެއްގެ މޮބައިލް ފޯނުގެ އެންމެ ފަހުގެ ސިގްނަލް ލިބުނީ އެ ގެ ކައިރިން،" ފުލުހުންގެ ތަރުޖަމާން ކުމާރް ވިދާޅުވި އެވެ.
ދެ އަންހެން މީހުންގެ ގަބުރު ވެސް ފެނުނީ އެ ގޭގެ ގޯތިތެރޭގައި ވަޅުލާފައި އޮއްވަ އެވެ. ފުލުހުން މިހާރު ތަހުގީގު ކުރަނީ އެހެން މައްސަލަތަކާ ޝާފީއާ ގުޅުން އޮތްތޯ ބެލުމަށެވެ.
ފަންޑިތަވެރިކަމާއި ސިހުރުގެ ބޭނުންކޮށް ކަންކަން ހާސިލްކުރުމަކީ އިންޑިއާގައި އާއްމު ކަމެކެވެ. އެފަދަ ކަންކަމުގެ ތެރެއިން ބައެއް ފަހަރު އިންސާނުން "ގުރުބާން" ކުރެ އެވެ.
މި މަހުގެ ކުރީކޮޅު ވެރިރަށް ނިއު ދިއްލީގައި ވެސް އެފަދަ ކަމެއްގެ ތެރެއިން އުމުރުން ހަ އަހަރުގެ ކުއްޖަކު މަރާލިކަމުގެ ތުހުމަތުގައި ދެ ފިރިހެނުން ހައްޔަރުކުރި އެވެ.
އެ ދެ ފިރިހެނުން ބުނީ އެ މީހުން ތިބީ މަސްތުވާތަކެތީގެ ބާވަތެއް ކަމަށްވާ ކެނެބިސް ބޭނުންކޮށްގެން ކަމަށާއި އެ ފިރިހެން ކުއްޖާ މަރާލީ މުއްސަނދިވުމަށް ހިންދޫ ކަލާނގެ ޝިވާއަށް ގުރުބާނީއެއްގެ ގޮތުގައި ކަމަށެވެ.
